LUKA 23 - Lai (Hakha) Common Language Bible 2006

Pilat Hmaiah Jesuh Taza An Cuai

¹ An bu ningpi khan an tho i Jesuh cu Pilat hmaiah khan an kalpi.

² Anih cu sual kha an phawt i, “Hi pa nih hin kan mi hna a pingah a hruai hna kha kan tlaih, a thawh hna i Sizar Siangpahrang sinah ngunkhuai nan pe lai lo, a ti hna i, keimah hi siangpahrang Khrih cu ka si, a ti hna,” an ti.

³ Cun Pilat nih cun, “Judah mi hna siangpahrang cu na si maw?” tiah a hal. Jesuh nih cun, “Na chim bangin ka si ko,” tiah a leh.

⁴ Khi tikah Pilat nih cun tlangbawi upa pawl hna le mizapi cu, “Hi pa hi a sualnak zeihmanh ka hmu lo,” tiah a ti hna.

⁵ Sihmanhsehlaw fak chinchin in an au i, “Hi pa nih hin a cawnpiaknak in mizapi lakah hnahnawhnak a chuahter. Galilee ram in aa thawk i Judea ram vialte kha a cul dih i atu cu hika hi a phan cang,” an ti.

Herod Hmaiah Jesuh An Chuahpi

⁶ Cucu Pilat nih a theih tikah, “Hi pa hi Galilee mi maw a si?” tiah a hal hna.

⁷ Jesuh cu Herod nih a ukmi peng chungin a si ti kha a hngalh tikah amah cu Herod sinah cun a hei kuat; cu lioah cun Herod zong cu Jerusalem khua ah a um.

⁸ Herod cu Jesuh a hmuh tikah khan a lung aa lawm ngaingai, zeicahtiah amah kong kha a rak theih tawnmi a si i hmuh a duhnak kha a saupi cang; cun Jesuh nih cun khuaruahharnak pakhatkhat a tuah lai tiah a ruah.

⁹ Cucaah Herod nih cun Jesuh cu bia tampi a hal len, sihmanhsehlaw Jesuh nih kaa khat hmanh a let lo.

¹⁰ Tlangbawi upa pawl hna kha le Phungbia cawnpiaktu saya hna kha an chuak i Jesuh cu fak piin sual an puh.

¹¹ Herod le a ralkap hna nih khan Jesuh cu capo ah an saih i zeirello ngaiin an ti. Puan ṭha ngaingai an aihter i Pilat sinah khan an kuat ṭhan.

¹² Cu ni hrimhrim ah cun Pilat le Herod cu hawikom ah an cang; cu hlanah cun ral an rak si.

Jesuh Cu Thah Awkah Bia An Khiah

¹³ Pilat nih tlangbawi upa pawl kha le hruaitu hna le mi zapi kha a auh hna i,

¹⁴ “Hi pa hi ka sinah nan ratpi i mizapi kha a pingah a hruai hna, nan ti. Atu cu amah kha nan hmaiah ka kher i thil ṭhalo a tuah tiah nan puhmi vialte kha pakhat hmanh a tuah tiah ka hmu kho lo.

¹⁵ Herod zong nih a sualnak a hmu ve lo, cucaah ka sinah a rak thlah ṭhan: Hi pa nih hin thah awk tlak thil a tuahmi pakhat hmanh a um lo.

¹⁶ Cucaah ka tukter hna lai i ka thlah lai,” tiah a ti. (

¹⁷ Lanhtak puai paoh ah Pilat nih thongtla pakhat lengmang a thlahpiak hna awk a si.)

¹⁸ Mizapi cu an au ciammam i, “Amah cu that ko. Bar-Abbas tu kan thlahpiak,” tiah an ti.

¹⁹ (Bar-Abbas cu khua chung i zapi buainak a ummi ruangah le lainawn ruangah thong ah cun an rak thlak.)

²⁰ Pilat nih Jesuh cu luatter a duh caah zapi cu bia a chimh ṭhan hna,

²¹ sihmanhsehlaw an au ṭhan i, “Vailam ah khenh ko, vailam ah khenh ko,” an ti.

²² Pilat nih cun a chimh ṭhan hoi hna i, “Zei sualnak dah a tuah? Thih awktlak thil a tuahmi pakhat hmanh ka hmu kho lo. Fung in ka tukter hna lai i ka thlah lai,” a ti.

²³ Sihmanhsehlaw an awreng chuak in, Jesuh cu vailam ah khenh chih ko, tiin an au lengmang i a donghnak ah cun an aunak nih cun a tei.

²⁴ Cucaah an hal lengmangmi biakhiahnak kha Jesuh cungah cun a tuahpiak hna.

²⁵ Chuak seh ti an duhmi pa, hnahnawhnak a chuahter ruang le lai a nawn ruang i thong i an thlakmipa kha, a chuahter i Jesuh cu anmah duh paoh in tuah awkah an kut chungah a pek hna.

Jesuh Cu Vailam Ah An Khenh Chih

²⁶ Jesuh cu ralkap nih khan an kalpi i lampi ah khuate lei in khuapi ah a rami Sairin khuami Simon kha an ton. An tlaih i vailam tahnak kha an khinh i Jesuh hnulei khan an zulhter.

²⁷ Mi tampi nih an zulh i cu hna lakah cun a ṭang aa cum i amah a rak ṭah lengmangmi nu tlawmpal zong an um.

²⁸ Jesuh nih annih kha a merhnawh hna i, “Jerusalem minu hna, keimah caah ṭap hlah u; nanmah le nan fale ca tu ah ṭap deuh u.

²⁹ Zeicahtiah mi nih, ‘Fa a ngei bal lo i fa a hring bal lo i fa hnuk a din bal lomi nu hna cu an van a va ṭha dah,’ an ti caan a phan lai.

³⁰ Cu caan cu mi nih tlang hna cu, ‘Kan tlak u,’ an ti hna i, fing hna cu, ‘Kan khuh u,’ an ti caan a si lai.

³¹ Zeicahtiah thing cu a hrin lioah cu bantuk thil hna cu tuah a si ahcun a ro tik chinchin ahcun zeidah a lawh lai?” tiah a ti.

³² A dang pahnih, misual veve kha, Jesuh sin i thah awkah cun an kalpi ve hna.

³³ Cun “Lu Ruh” an timi hmun kha an phak tikah Jesuh cu vailam ah an khenh chih i misual pahnih hna zong kha a orhlei ah pakhat a kehlei ah pakhat an khenh chih ve hna.

³⁴ Jesuh nih aa thawh i, “Ka Pa, ngaithiam hna. An tuahmi hi zei a si ti awk an hngal lo,” tiah a ti. Camcawhfung zuh in a hnipuan kha an i phaw.

³⁵ Judah mi hruaitu pawl nih an nihsawh i, “Midang cu a khamh hna, amah cu Pathian nih a thimmi Messiah a si ahcun amah le amah kha i khamh kun ngat seh,” tiin an ti lioah khan zapi nih cun an dir i an zoh ko.

³⁶ Ralkap pawl zong nih khan an nihsawh i an hun hnawh i mitsur hang thor kha an pek i,

³⁷ “Judah Siangpahrang na si ahcun i khamh kun ngat,” an ti,

³⁸ A lucung i an ṭialmi bia cu: “Hihi Judah Siangpahrang cu a si,” ti hi a si.

³⁹ Cuka i aa thlai vemi misual pakhat nih cun Jesuh cu a nihsawh i, “Messiah cu na si kun lo maw? Nangmah cu i khamh law kannih zong kan khamh ve ngat?” tiah a ti.

⁴⁰ Sihmanhsehlaw a dang pakhat nih khan a mawhchiat i “Pathian na ṭih lo maw? Hika ah hin cun biakhiahnak aa khatmi toiah kan um.

⁴¹ Sihmanhsehlaw kannih ca i biakhiahnak an tuahmi cu ahmaanmi a si, zeicahtiah kan tuahmi ruangah kan hmuh awk a simi kha kan hmuh; sihmanhsehlaw anih hi cu ṭhat lonak zeihmanh a tuah lo,” tiah a ti.

⁴² Cun Jesuh cu a thawh i, “Jesuh, Siangpahrang in na rat tikah ka philh te hlah,” tiah a ti.

⁴³ Cun Jesuh nih cun, “Mah hihi kan chimh: nihin ah Paradis ah keimah sinah na um lai,” a ti.

Jesuh Thihnak

⁴⁴ Chun suimilam hleihnih tluk ah ni cu a mui i muihnak nih ram cu a pumpuluk in zanlei suimilam pathum tiang a khuh;

⁴⁵ cun Biakinn chung puanzar kha cheu hnih ah aa cheu.

⁴⁶ Jesuh cu aw thangpi in a au i, “Ka Pa, na kut chungah ka thlarau kha ka chiah,” tiah a ti. Cucu a chim dih in a cat.

⁴⁷ Cucu ralbawipa nih khan a hmuh i Pathian kha a thangṭhat i; “Hi pa hi a sual hrimhrim lo,” tiah a ti.

⁴⁸ Cu thil va zoh awkah cuka i aa pummi hna nih thil umtuning kha an hmuh tikah an ṭang i cum lengmang in inn ah an ṭin.

⁴⁹ Jesuh kha pumpak in a rak hngalmi hna le Galilee ram in amah a rak zultu nu hna nih khan, hi thil cu a langin an cuanh.

Jesuh Vuinak

^50-51 Judea ram khua, Arimathea an timi ah hin mipa pakhat a min Josef a simi a um. Amah cu miṭha le hmaizah awktlakmi a si i Pathian Pennak a tlun lainak a hngakmi kha a si. Amah cu Khawngsil chungah khan aa telmi a si ve nain an biachahnak le an thil tinak kha a hna a tla lo.

⁵² Pilat hmaiah khan a vung lut i Jesuh ruak kha a hal.

⁵³ A ruak kha a ṭhumh i puan rang in a zual i lungkua i an cawhmi thlan ah a vui. Cu thlan cu thlan thar a si i ahohmanh nih an hmang rih lo.

⁵⁴ Cu caan cu Cawnningani a si i Sabbath ni kha aa thawk dengmang cang.

⁵⁵ Galilee ram in Jesuh a zulmi nu hna kha Josef sinah cun an kal i thlan le a chungah zeitindah Jesuh ruak cu an chiah ti kha an hmuh.

⁵⁶ Cun inn ah an ṭin i a ruak caah khan zihmui le sathau kha an timh. Sabbath ni ah cun Nawlbia bangin an i din.