LUKA 2 - Lai (Hakha) Common Language Bible 2006

Jesuh Hrinnak Kong

¹ Khi caan ah Siangpahrang Awkastas nih nawlbia a chuah i, ‘Ram chung i a ummi vialte nih milu relnak caah nan min nan i thla dih lai,’ tiah a ti.

² Hi milu relnak hmasa bik a hung um ah hin Kuirinias cu Siria ram uktu a rak si.

³ Cucaah min i thlak awkah a mi paohpaoh in anmahle an khua cio ah khan an kal.

⁴ Josef cu Galilee ram i Nazareth khua in Judea ram i Bethlehem khua an timi, Siangpahrang David chuahnak khua ah khan a kal. Josef kha khika i a kalnak cu amah kha David hrinsor a si caah a si.

⁵ Cun minthlak awk i a kal ah khan a hammi Mary kha a sinah aa kalpi. A nithla kha a tling dengmang i

⁶ Khika i an um lioah khan a hrin caan kha a phan, fapate kha a hrin i cucu a fater a si.

⁷ Puan in a zual i caw rawl einak kuang chungah khan a thlim — riahnak khualbuk ah khan an caah hmun a um lo.

Tuukhal Hna le Vancungmi Hna

⁸ Cuka hrawngah cun, an tuurun a zohkhenh i ramlak i a riakmi tuukhal hna kha an um.

⁹ Bawipa vancungmi cu an sinah a lang i Bawipa sunparnak cu an velchum in a ceu. Annih cu an thin a phang tuk hringhran,

¹⁰ sihmanhsehlaw vancungmi nih cun a thawh hna i, “Nan thinphang hlah u; zeicahtiah nan sin i ka ratnak cu nan ca i thawngṭha he a si, cu thawngṭha nih cun mi vialte sinah lunglawmhnak a tlunter lai.

¹¹ Tu zan hrimhrim ah hin David khua chungah nan Khamhtu kha a chuak cang — Khrih Bawipa cu!

¹² Cun hihi nan ca i hmelchunhnak cu a si lai: ngakchiate pakhat kha puan in an zual i caw rawl einak kuang chung i an thlim kha nan va hmuh lai,” tiah a ti.

¹³ Cu cangka cun vancung ralkapbu nganpi cu vancungmi sinah khan an rung lang i Pathian kha hla in an thangṭhat:

¹⁴ “A sang bik van ah khin Pathian cu sunparnak hmu ko seh, Cun a dawtmi hna umnak vawlei ah hin remnak um ko seh,” tiah an ti.

¹⁵ Cun vancungmi hna cu annih sinin vancung i an kir ṭhan tikah khan tuukhal hna cu pakhat le pakhat kha, “Bethlehem khua ah cun va kal u si law Bawipa nih a kan chimhmi thil cu va zoh tuah u sih,” an i ti.

¹⁶ Cucaah khulrang in an kal i Mary le Josef cu an va ton hna i ngakchiate cu caw rawl einak kuang chung i a rak ih ko kha an va hmuh.

¹⁷ Tuukhal pawl nih ngakchia cu an hmuh tikah amah kong i vancungmi nih a chimmi kha an chimh hna

¹⁸ Tuukhal pawl nih an chimmi a theimi paoh cu an khuaruah a har dih.

¹⁹ Mary nih hi thil vialte hi aa cinken hna i thuk piin a ruah hna.

²⁰ Tuukhal pawl cu an kir i an va hmuhmi le an theihmi ruangah khan Pathian cu an thangṭhat; vancungmi nih a chimh hna bantukte khan a si taktak ko.

Jesuh Cu Min An Sak

²¹ Cu hnu zarh khat ah, ngakchia cu cuarpartan caan a phak tikah khan, a min ah Jesuh an sak — cu min cu a nu nih a pawi hlan i vancungmi nih a rak sak cangmi kha a si.

Jesuh Biakinn Ah An Chuahpi

²² Moses Nawlbia nih nan tuah lai tiah a timi i thianh caan kha Josef le Mary caah cun a phan. Cucaah annih nih ngakchia cu Bawipa hmai i chanh awkah Jerusalem khua ah khan an i kalpi.

²³ Bawipa nawlbia chungah cun, Nan fater, pa a simi hna paoh kha Bawipa sinah nan pekchanh hna lai, tiah aa ṭial.

²⁴ Cun Bawipa nawlbia nih, Ṭhuro tuah khat, asiloah, laileng no pahnih, raithawinak ah nan pekchanh hna lai, a ti bantukin annih nih raithawinak kha an pekchanh.

²⁵ Jerusalem khua ah khan mipa pakhat, a min Simeon a simi a rak um. Amah cu miṭha le Pathian a ṭihmi kha a si i Israel khamhnak ding a rak hngakmi kha a si. Thiang Thlarau nih khan a umpi i

²⁶ Thiang Thlarau nih cun Bawipa biakamhmi Messiah na hmuh hlanah cun na thi lai lo, tiah a ti.

²⁷ Thlarau nih a hruainak thawngin Simeon cu Biakinn chungah cun a lut. Ngakchia Jesuh cu a nu le a pa nih, phung nih tuah awk a si tiah a tining in, Biakinn chungah an run luhpi tikah,

²⁸ Simeon nih cun a rak pom i Pathian cu a thangṭhat i:

²⁹ “Nihin ah hin, maw Bawipa, nangmah nih na salpa cu dai tein ka rian na ka limter cang, Atu cu nangmah na biakamnak kha a tling cang.

^30-31 Zeicahtiah miphun vialte zohchih in khamhnak ding na rak timhmi cu ka mit hrimhrim in ka hmuh cang;

³² Cucu Jentail mi hna caah na lam a langhtertu a simi ceunak le na mi Israel mi hna ca i sunparnak cu a si,” tiah a ti.

³³ Simeon nih ngakchiapa kong a chimmi nih cun a nu le a pa kha an lung a sukhai ngaingai hna.

³⁴ Simeon nih cun thluachuahnak a pek hna i a nu Mary kha a thawh i, “Hi ngakchia cu Pathian nih Israel mi lakah mi tampi an rawk nakhnga le khamh an si nakhnga caah a thimmi a si. Amah hi Pathian sinin a rami hmelchunhnak, mi tampi nih an doh laimi a si i

³⁵ an dohnak thawng cun mi tampi an lungthin chunglei kha a lang lai. Cun ngaihchiatnak nih vainam bantukin na lungthin kha a chunh lai,” a ti.

³⁶ Profet nu pakhat, a min Anna an timi zong kha a um ve, amah cu Asher phun chung mi Fanuel fanu kha a si. Amah cu a tar ngaingai cang, a va he kum sarih lawng an rak um ṭi manh i atu cu

³⁷ kum sawm riat le kum li a si cang. Biakinn kha a kaltak bal lo i chun he zan he Pathian kha rawl ulh le thlacam in a biak.

³⁸ Amah zong cu, cu caan te ah cun a ra ve i Pathian cu a thangṭhat i Pathian nih Jerusalem cu a tlanh ṭhan lai tiah a hngakmi vialte hna sinah khan ngakchiapa kong kha a chim.

Nazareth Khua Ah An Kir Ṭhan

³⁹ Bawipa nawlbia nih nan tuah awk a si tiah a timi vialte kha an tuah dih in Galilee ram i an umnak khua Nazareth khua ah khan an kir ṭhan.

⁴⁰ Ngakchia cu a hung ṭhang i a hung ṭhawng; fimnak in a khat i Pathian thluachuahnak kha a cungah a um.

Ngakchiapa Jesuh Biakinn Chungah

⁴¹ Lanhtak Puai paoh ah khan, kum fate in, Jesuh nu le pa hna cu Jerusalem ah khan an kal lengmang.

⁴² Jesuh kha kum hleihnih a si tikah voi dang bantukin puai ah cun an kal ṭhan.

⁴³ Puai ni kha a dih tikah inn lei tlun ah khan an i thawh, sihmanhsehlaw ngakchiapa Jesuh kha Jerusalem khua ah cun a tang. Cucu a nu le a pa nih an hngal lo;

⁴⁴ annih ruahnak ah cun an hawile sinah khan a um rua, an ti i cucaah chun nitlak hlam loin an kal. An sahlawh pawl le an hawikom hna sin i an va kawl tikah khan an hmu ti lo.

⁴⁵ Cucaah amah kawl awkah cun Jerusalem ah khan an kir ṭhan.

⁴⁶ A ni thumnak ni ah Biakinn chungah khan an va hmuh i cawnpiaktu Judah mi hna sinah khan a rak ṭhu i an bia kha a rak ngai i bia a rak hal len ve ko hna.

⁴⁷ A bia a theimi paoh cu a fimning le a bia lehning ah khan an khuahruah a har.

⁴⁸ An va hmuh tikah a nu le a pa zong cu an khuaruah a har ve. A nu nih cun a thawh i, “Ka fa, zeicahdah hi bantukin na kan tuah? Na pa le na nu nih awlokchong in pei kan in kawl cu,” tiah a ti.

⁴⁹ Annih cu “Zeicahdah nan ka kawl? Ka Pa inn ah ka um awk a si ti kha nan hngal lo maw?” tiah a ti hna.

⁵⁰ Sihmanhsehlaw annih nih a chimhmi hna kha a sullam an hngal lo.

⁵¹ Cuticun Jesuh cu an sinah Nazareth khua ah khan a kir i a nu le a pa kut tangah nawl ngai tein a um: Hi thil vialte hi a nu nih a lung chungah aa ken dih.

⁵² Cun Jesuh cu pum lei in siseh, fimnak lei in siseh, a hung ṭhang i Pathian hmai le minung hmaiah mithmai ṭha a hmu.