LUKA 19 - Lai (Hakha) Common Language Bible 2006

Jesuh le Zakia

¹ Jesuh cu Jeriko khua ah cun a vung lut i khua cu a hei tan.

² Cuka ah cun ngunkhuai khawltu upa bik pakhat a min Zakia a simi a rak um i amah cu mirum a si.

³ Jesuh cu ahodah a si hnga ti kha hngalh a duh caah hmuh aa zuam i asinain amah cu miniamte a si caah le mizapi nih an phenh caah a hmu kho lo.

⁴ Cucaah cun hmaiah khan a rak tli i saikamor thingkung pakhat ah, cukalei i a kalmi Jesuh hmuh duh ah cun a rak kai.

⁵ Cuka hmun cu a phak tikah Jesuh nih cun cunglei kha a hun zoh i Zakia cu, “Zakia, khulrang in rung ṭum, na inn ah kan tlung lai,” tiah a ti.

⁶ Zakia cu, khulrang in a ṭum i lunglawmhnak in a inn ah cun a tlunter.

⁷ Cu a hmumi vialte cu an zai i, “Hi pa hi misual mi inn i tlun awkah a kal,” an ti.

⁸ Zakia cu a dir i Bawipa cu, “Bawipa, ngaihmanh, misifak caah ka ngeihmi thil hnarcheu ka pek lai; cun ka hlenmi hna an um ahcun a let li in ka cham hna lai,” tiah a si.

⁹ Jesuh nih a thawh i, “Nihin ah hi inn ah khamhnak a phan; hi pa zong hi Abraham tefa a si ve.

¹⁰ Zeicahtiah Mi Fapa cu a tlaumi kawl awk le khamh awkah a ra,” tiah a ti.

Sui Tangka Tahchunhnak

¹¹ Hi bia a chimmi a theimi hna sinah khan hi tahchunhnak bia hi a chim. Jerusalem khua kha a hei phanh dengmang cang caah Pathian Pennak kha a lang hnik lengmang cang tiah an ruah.

¹² Cucaah a thawh hna i, “Bawi pakhat cu ram hlapi pakhat ah a kal i cuka ram i siangpahrang a si hnuah inn ah ra tlun ṭhan aa tim.

¹³ A kal hlanah a sal pahra kha a kawh hna i sui tangka phar khat cio a pek hna. Cun a thawh hna i, ‘Ka um lo karah hi hin chaw rak let u,’ a ti hna.

¹⁴ A ram mi nih cun amah cu an huat i, ‘Hi pa hi kan siangpahrang si awkah kan duh lo,’ tiin lamkal a hnu in an hei thlah hna.

¹⁵ Cu bawi cu siangpahrang ah cun an rak ser i a ra kir. Tangka a pekmi sal hna kha hmakhatte ah a auh hna i, zeizat dah nan hmuh tiah a hal hna.

¹⁶ A hmasa bikpa kha a hung chuak i, ‘Bawipa, na ka pekmi sui tangka phar khat khan sui tangka phar hra ka hmuh,’ tiah a ti.

¹⁷ Aa thawh i, ‘A ṭha, nangmah cu sal ṭha na si. Thil hmete ah zumhawktlak na si caah khua pahra uktu ah kan chiah lai,’ a ti.

¹⁸ A pahnihnak sal kha a ra i, ‘Bawipa, na ka pekmi sui tangka phar khat khan sui tangka phar nga ka hmuh,’ tiah a ti.

¹⁹ Amah zong cu a thawh i, ‘Khua panga uktu na si lai,’ tiah a ti.

²⁰ Cun a dang sal pakhat kha a ra i, ‘Bawipa, na sui tangka kha a um ko; puanchia in ka fun i ka chiah ko.

²¹ Nangmah cu mikhepkha na si caah kan ṭih, Nangmah ta a si lomi kha na lak i thlaici na tuh lonak hmun ah na zun tawn,’ tiah a ti.

²² Amah cu a thawh i, ‘Sal ṭhalo. Nangmah bia lila cu nangmah biaceihnak ah ka hman lai. Nangmah nih keimah cu mikhepkha ka si le ka ta a si lomi a la tawn i ka tuh lonak hmun i a zun tawntu ka si cu na hngalh.

²³ A si kun ahcun zeicahdah tangka cu tangka chiahnak beng ah na rak chiah lo? Rak chia law cu, ka kir tikah hin a miak he ka hmu hnga lo maw?’ tiah a ti.

²⁴ Cuka i a dirmi hna cu a thawh hna i, ‘Amah cu sui tangka kha chut u law phar hra a ngeimi pa kha va pe u,’ a ti hna.

²⁵ Annih nih an thawh i, ‘Bawipa, anih cu phar hra a ngeih cang ṭung,’ an ti.

²⁶ Annih cu a leh hna i, ‘A ngeimi paoh kha tam chin chap an si lai i a ngei lomi kha a ngeihmi hnihchunte hmanh kha chuh an si lai.

²⁷ Cun an siangpahrang si awkah a ka duh lotu ka ral hna kha cu, hika ah hin ratpi hna u law ka hmaiah that hna u, a ti,’ ” tiah a ti.

Jerusalem Ah Sunparnak In A Lut

²⁸ Jesuh nih hi bianabia a chim dih in an hmaiah cun Jerusalem khua lei ah khan a kal.

²⁹ Oliv Tlang i Bethfeih le Bethani khua kha a phak deng tikah a zultu pahnih kha hmaiah a hei thlah hna i,

³⁰ “Nan hmai khua ah khin rak kal u law nan va luhpah ah khin cit bal rih lomi laafa nan hmuh lai. Cucu a hri va phoih u law hika ah hin ratpi u.

³¹ Pakhatkhat nih, ‘Zeicahdah mah khakha a hri nan phoih?’ an in ti hna ahcun, ‘Bawipa nih a herh,’ tiah va ti ko u,” tiah a ti hna.

³² An va kal i Jesuh nih a chimh hna ningte cun zeizong vialte kha an va hmuh.

³³ Laafate cu an phoih lioah khan a ngeitu hna nih khan, “Zeicahdah nan phoih?” tiah an ti hna.

³⁴ Annih nih, “Bawipa nih a herh,” tiah an leh hna i

³⁵ laafate cu Jesuh sinah khan an kalpi. Cun laa cungah khan an puan an danh i Jesuh cu an citter.

³⁶ A kalnak ah khan lam ah puan kha an phah.

³⁷ Jerusalem khua kha a hei naih i lam cu Oliv Tlang in chuk i a vung zuannak ah khan a zultu mibu nganpi nih cun, an hmuhmi thil lianngan vialte ruangah khan Pathian cu an lawmh i aw fak piin an thangṭhat.

³⁸ “Bawipa min in a rami siangpahrang cu Pathian nih thluachuahnak pe ko seh. Vancung ah daihnak um seh law, Pathian cu sunparnak pek si ko seh,” tiah an au.

³⁹ Cun mizapi chung cun Farasi mi a cheukhat hna nih Jesuh cu an hun thawh i, “Saya, na zultu hna hi daihter hna,” an ti.

⁴⁰ Jesuh nih cun a leh hna i, “Hi hna hi an daih ahcun lung hrimhrim hi an au lai,” tiah a ti.

Jesuh Nih Jerusalem A Ṭah

⁴¹ Khuapi cu a hei naih chin lengmang i a hei hmuh tikah a ṭah i,

⁴² “Nihin ah hin daihnak caah zeidah a herh ti kha hei hngal law cu mu! Sihmanhsehlaw cucu na hmu kho ṭung lo.

⁴³ Zeicahtiah na ral nih raltuknak chuntlung in an in kulh i an in hren i a kenkip in an in luhhnawh caan kha a phan lai.

⁴⁴ Nangmah le na vampang kulh chung i a ummi minung hna cu an in hrawh dih cikcek hna lai: Pathian cu nangmah khamh awkah a rat caan kha na hngalh lo caah cuka hmun ah cun aa chonhmi lung pakhat hmanh leh loin an kaltakmi a um lai lo.”

Jesuh Cu Biakinn Ah A Kal

⁴⁵ Jesuh cu Biakinn chungah khan a vung lut i chawdawr pawl kha a ṭhawl hna i,

⁴⁶ “Cathiang chungah, ‘Pathian nih ka inn cu thlacamnak inn a si lai,’ a ti, tiah aa ṭial. Sihmanhsehlaw nannih nih cun mifir thuhnak kua ah nan ser cang,” a ti hna.

⁴⁷ Jesuh nih Biakinn ah khan nifate in a cawnpiak hna. Tlangbawi upa pawl hna le Phungbia cawnpiaktu saya hna le hruaitu pawl nih khan thah an duh,

⁴⁸ sihmanhsehlaw mi vialte nih khan a bia cu an ngaih i pakhat hrelh hmanh kha an duh lo caah annih nih cu tuahnak ding caah cun lam an hmu kho lo.