LUKA 1 - Lai (Hakha) Common Language Bible 2006

¹ Theofilas Bawipa, Mi tampi nih kan lak i thil a cangmi kong hi an thiam khawh chungin ṭial an rak i zuam cio.

² Cu an ṭialmi cu a hramthawk lio i an mit in a rak hmumi hna nih an kan chimhmi le hi bia a rak chimtu hna nih an rak chimning khan a si.

³ Cucaah Bawipa, kei zong nih hi thil vialte hi a hramthawk tein ṭha tein ka dothlat cikcek hnuah na sinah aa tlai thliahmah in ṭial ah a ṭha tiah ka ruah.

⁴ A chimh zong an in chimh len cangmi kong biatak kha a ningcang tein na hngalh khawh nakhnga, tiin hi ca hi kan kuat.

Tipil Petu Johan Hrinnak

⁵ Herod kha Judea Siangpahrang a si lioah, Abijah tlangbawi phu chungah aa telmi tlangbawi pakhat a min Zekhariah an timi kha a rak um. A nupi min cu Elizabeth a si i amah zong cu tlangbawi hrinthlak a si ve.

⁶ An pahnih in Pathian hmaiah nuncan ṭha in a nung i Bawipa nawlbia vialte le phunglam vialte tlamtling tein a zulmi an si.

⁷ Elizabeth cu a cin caah fa pakhat hmanh an ngei lo. An pahnih in an tar ngaingai cang.

⁸ Ni khat cu Zekhariah kha, nifate an rianṭuannak ah a caan a hung phan ve i Pathian hmaiah khan tlangbawi rian cu a ṭuan.

⁹ Tlangbawi hna nih an zulhmi phungning in, biakṭheng cung i rimhmui khangh awkah khan amah cu camcawhfung zuh in an thim. Cucaah Bawipa Biakinn chungah khan a vung lut.

¹⁰ Cu caan cu rimhmui khangh lio i mi zapi Biakinn leng i thla an cam caan kha a si.

¹¹ A sinah Bawipa vancungmi pakhat a rung lang i rimhmui an khanghnak biakṭheng orhlei kamah khan a dir.

¹² Amah cu Zekhariah nih khan a hmuh tikah a lau i a thin a phang.

¹³ Sihmanhsehlaw vancungmi nih cun a thawh i, “Zekhariah, na thinphang hlah! Pathian nih na thlacamnak kha a theih i na nupi Elizabeth nih fapa an hrinpiak lai. A min ah Johan na sak lai.

¹⁴ Amah cu a chuah tikah naa lawm hringhran lai i midang tampi zong an i lawm ngaingai ve lai.

¹⁵ Zeicahtiah amah cu Bawipa hmaiah mi ngan a si lai. Zu siseh, zureu siseh, zeihmanh a ding lai lo. A chuahka hrimhrim in Thiang Thlarau in a khat lai;

¹⁶ Israel mi mi tampi kha Bawipa an Pathian sinah a kirpi ṭhan hna lai.

¹⁷ Amah cu Pathian thlahmi lamkaltu a si lai i profet Elijah bantukin a fekmi le a ṭhawngmi a si lai. Pale hna le fale hna kha hmunkhat ah a fonh ṭhan hna lai i nawl a ngai lomi hna kha miding mi hna ruahnak lam leiah a hruai ṭhan hna lai. Bawipa mi hna cu Bawipa ca i aa tlakmi minung si awkah a rak timh hna lai,” tiah a ti.

¹⁸ Zekhariah nih vancungmi cu a thawh i, “Cucu a si kho lai tiah zeitindah ka zumh khawh lai? Zeicahtiah kei cu ka tar cang i ka nupi zong a tar ve fawn,” tiah a ti.

¹⁹ Vancungmi nih cun a leh i, “Kei cu Gabriel, hi thawngṭha nangmah chimh awkah a ka thlahtu Pathian hmai i a dirmi cu ka si.

²⁰ Ka bia cu na ka zum lo, asinain a caan a phak tikah cun a tling ṭhiamṭhiam te ko lai. Na zumh lo caah holh kho loin na um lai i kan chimhmi thil kha a tlin ni a phak hlantiang bia pakhat hmanh na chim kho lai lo,” tiah a ti.

²¹ Cu chung cu zapi nih khan Zekhariah cu an rak hngah ko i zeicahdah Biakinn chungah cu cancan cu a rauh hnga, tiah an khuaruah a har.

²² A hung chuah tikah a chawn kho hna lo — cucaah Biakinn chungah langhnak a hmu ti kha an hngalh. A kut in hmelchunhnak kha a tuah i cuticun a chawnh hna, bia pakhat hmanh a chim kho lo.

²³ Biakinn chung i a rianṭuannak caan kha a dih tikah Zekhariah cu inn ah a ṭin.

²⁴ Cu hnu tlawmpal ah cun a nupi Elizabeth cu nau kha a hun pawi i thla nga chung leng chuak loin a um.

²⁵ A thawh i, “Atu cu a donghnak ah Bawipa nih hi tlukin maw a ka bawmh! Zapi hmai i ka ningzahnak cu a ka lakpiak cang,” tiah a ti.

Jesuh Hrinnak Kong

²⁶ Elizabeth pumlawnglo in a um thla ruknak ah, Pathian nih vancungmi Gabriel cu Galilee ram khua pakhat Nazareth timi ah cun a thlah.

²⁷ Siangpahrang David hrinsor a simipa Josef an timi he kan i ṭhi lai tiah bia aa kammi ngaknu kha bia na va chimh lai tiah a fial. Cu ngaknu cu a min ah Mary a si.

²⁸ Vancungmi kha a sinah cun a ra i. “Na cungah daihnak um ko seh. Bawipa cu na sinah a um i thluachuahnak tam piin an pek,” tiah a ti.

²⁹ Vancungmi bia kha a theih tikah Mary cu a lau ngaingai i a bia kha a sullam zeidah a si hnga tiah a khuaruah a har.

³⁰ Vancungmi nih cun a thawh i, “Mary, na thinphang hlah. Zeicahtiah Pathian nih nangmah cu vel an ngeih.

³¹ Nau na pawi lai i fapa na hrin lai i a min ah Jesuh na sak lai.

³² Amah cu milian mingan a si lai i Cungnung Bik Pathian fapa tiah ti a si lai. Amah a hringsortu Siangpahrang David bawiṭhutdan kha Pathian nih amah cu a pek i

³³ Jakob tefa hna siangpahrang zungzal in a si lai, a pennak cu zeitikhmanh ah a dong lai lo,” tiah a ti.

³⁴ Mary nih vancungmi cu a thawh i, “Ngaknu thiang ka si ṭung, zeitindah hihi cu a si khawh lai?” tiah a ti.

³⁵ Vancungmi nih cun a leh i, “Thiang Thlarau kha na cungah a phan lai i Pathian ṭhawnnak cu na cungah aa fu lai. Hi ruangah hin a thiangmi fa cu Pathian Fapa tiah ti a si lai.

³⁶ Hi hleiah na rualchan Elizabeth kha a tar leiah fa a pawi i a cing ti i rak ti tawnmi kha atu hi a thla ruknak a si cang,

³⁷ zeicahtiah Pathian nih a tuah khawh lomi thil zeihmanh a um lo,” tiah a ti.

³⁸ Mary nih a thawh i, “Kei cu Bawipa salnu ka si ko, na chim bang cun ka cungah si ko seh,” tiah a ti i vancungmi nih cun a kaltak.

Mary Cu Elizabeth A Tlawng

³⁹ Cu hnu tlawmpal ah Mary cu aa tim i Judah tlangram i a ummi khua pakhat ah khan khulrang in a hung kal.

⁴⁰ Zekhariah inn ah khan a vung lut i Elizabeth cu a vun biak.

⁴¹ Elizabeth nih Mary i a vun chawnhnak bia kha a theih tikah a paw chung i a fate cu a rak cawl. Elizabeth cu Thiang Thlarau in a khat i,

⁴² aw thangpi in, “Nangmah cu nu vialte lakah thluachuak bik nu na si. Na hrin laimi na fa zong hi fa thluachuak a si.

⁴³ Zeicahdah ka Bawipa nu nih hin kei tehna hi na hung ka tlawn?

⁴⁴ Na ka biakchawnhnak ka theih cangka khan pei ka chung i ka fate cu lunglawmhnak in aa hlawh len cu.

⁴⁵ Bawipa bia na sinah a rami kha a tling taktak lai ti zumh cu na caah lunglawmh awk a va si hringhran dah,” tiah a ti.

Mary Sakmi Thangṭhatnak Hla

⁴⁶ Mary nih aa thawh i: “Thanh tuah, ka lungthin, Bawipa lianhngannak cu.

⁴⁷ I lawm tuah, ka nunnak, Bawipa na khamhtu cungah;

⁴⁸ A salnu hi hi tluk minauta ka si nain a ka philh lo. Nihin thawk in hmailei ah cun mi vialte nih thluachuaknu an ka ti lai;

⁴⁹ Bawipa, a ṭhawngmi Pathian nih ka cungah khuaruahhar tuk in rian a ṭuan. A min cu a thiang;

⁵⁰ Amah a ṭihmi vialte kha chan khat hnu chan khat in a zaangfah hna.

⁵¹ A ṭhawngmi a ban kha a samh i miruamkai hna kha an khuakhanmi he a ṭhek dih hna.

⁵² Siangpahrang ṭhawngṭhawng kha an bawiṭhutdan cungin a ṭhumh hna i Minauta kha a cawi hna.

⁵³ Rawl a ṭammi kha thil ṭhaṭha in a khimter hna i Mirum kha kut lawngin a kalter hna.

⁵⁴ Kan pupa hna sinah a rak sermi biakamnak kha a zulh hna; A sal Israel kha bawmh awkah a ra i

⁵⁵ Abraham le a tefa vialte hna sinah zungzal in zaangfahnak langhter ding kha a philh lo,” tiah a ti.

⁵⁶ Mary cu thla thum tluk Elizabeth sinah khan a um i cun inn ah a tlung ṭhan.

Tipil Petu Johan Hrinnak Kong

⁵⁷ Elizabeth cu a nithla a hung tling i fapate a hrin.

⁵⁸ Bawipa cu zeitluk in dah a cungah a ṭhat ti kha a innpa hna le a rualchan hna nih an theih tikah amah tluk te cun an dihlak in an i lawm.

⁵⁹ Ngakchiate cu zarh khat a hung ti ah khin a cuarpar tan awkah an kalpi; annih nih a pa min Zekhariah in kan auh lai, tiah an ti.

⁶⁰ Sihmanhsehlaw a nu nih khan, “Asilo, a min cu Johan a si lai,” tiah a ti.

⁶¹ Annih nih amah cu an thawh i, “Nan sahlawh nan rualchan lakah cu min a ngeimi pakhat hmanh an um ṭung lo,” tiah an ti.

⁶² Cun a pa kha kut zaoh in an chawnh i ngakchiapa kha a min zeidah sak na duh, tiah an hal.

⁶³ Zekhariah nih cun caṭialnak catlap a hal hna i, “A min cu Johan a si,” tiah a ṭial.

⁶⁴ Cu cangka cun Zekhariah cu a holh kho ṭhan i Pathian kha a hun thangṭhat.

⁶⁵ A innpa hna cu an khuaruah a har i hi thil kong cu Judea ram tlang cung vialte ah khan a thang dih.

⁶⁶ A theimi paoh kha an lung a suk hna i. “Hi fa hi zei ko dah a can te lai?” tiah an ti cio. Zeicahtiah Bawipa ṭhawnnak cu a cung i a um kha a fiang ko.

Zekhariah Chimmi Bia

⁶⁷ A pa Zekhariah cu Thiang Thlarau in a khat i, Pathian bia kha a chim:

⁶⁸ “Bawipa, Israel Pathian cu thangṭhat u sih. A mi hna bawmh awkah a ra cang i a luatter cang hna.

⁶⁹ Kan caah a ṭhawngmi Khamhtu kha a chuahter cang. Amah cu a sal David tefa kha a si.

⁷⁰ Hlanliopi ah a profet thiang hna sinin,

⁷¹ ‘Kan ral hna kut chungin le kanmah a kan huatu vialte hna sin khan, khamh awkah bia a kan kam.

⁷² Kan pupa hna cu, nan cungah zaangfahnak ka ngei lai, a ti hna i a thiangmi a biakamnak kha ka philh lo,’ tiah a ti hna.

^73-74 Kan ral hna kut chungin luatter awkah le Amah cu ṭihnak um loin a rian kan ṭuan nakhnga, Kan pu Abraham sinah chiatser in bia aa kam i

⁷⁵ cucu kan nunchung vialte, amah hmaiah thianghlim le ding tein kan um nakhnga caah a si.

⁷⁶ Nang, ka fa, nangmah hi Cungnung Bik Pathian profet tiah ti na si lai; Amah lam kha rak sersiam chung awkah Bawipa hmaiah cun na rak kal chung lai.

⁷⁷ A mi hna kha, nan sual ngaihthiam nan si thawngin khamhnak nan hmu lai, tiah na chimh hna lai.

⁷⁸ Zeicahtiah, kan Pathian cu zaangfah thiammi le minunnem a si: Khamhnak khuaceu ṭha cu kan cungah a tlunter lai i

⁷⁹ Thihnak thladem mui lak i a ummi hna kha vancung in a vun ceuh hna lai; Kannih cu daihnak lam ah a kan hruai lai,” tiah a ti.

⁸⁰ Ngakchia cu a hung ṭhang i thlarau in a ṭhawngmi a si; Israel mi zapi sinah a hun i langh hlantiang, thetse ram ah cun a um.