LEVITIKAS 8 - Lai (Hakha) Common Language Bible 2006

Aaron le A Fapa Hna Thianternak

¹ Bawipa nih Moses sinah,

² “Aaron cu a fapa hna he kalpi hna law, puan hna le thuhnak chiti le thilnu telh lo changreu bawm khat le sual thawinak cawtum le tuukawng pahnih hna kha kalpi ve hna;

³ cun tonnak thlam innka ah mi zapi cu pum hna,” tiah a ti.

⁴ Cun Moses nih Bawipa nih nawl a pek bangin a tuah i mi zapi cu tonnak thlam innka ah cun an i pum.

⁵ Cun Moses nih mi zapi sinah cun, “Mah hihi tuah awk tiah Bawipa nawl pekmi cu a si,” tiah a ti.

⁶ Cun Moses nih Aaron le a fapa hna cu a ratpi hna i ti in a kholh hna.

⁷ Cun angki leng cu a hruk i, taisawm a sawmh i, tlangbawi angki fual a hruk i, tlangbawi angki a aih i, dawh tein tahmi tlangbawi angki hri in a sawmh, mah hri cun a ṭem chih.

⁸ Cun ṭangbenh kha a cungah a benh i ṭangbenh chungah cun Urim le Thummim kha a chiah hna.

⁹ Cun lupawng a ponh i a lupawng cungah, hmailei ah, sui kheng, a thiangmi bawi luchin cu, a benh; Moses nih Bawipa nih nawl a pek bang khan a tuah.

¹⁰ Cun Moses nih thuhnak chiti kha a lak i puan biakinn le a chungah a ummi thil vialte kha a thuh hna i a thianter hna.

¹¹ Cun chiti cu tlawmpal in biakṭheng ah cun voi sarih a theh i, biakṭheng le a umkheng vialte le a hmaihum le a hunnak cu thianter awk caah a thuh hna.

¹² Cun thuhnak chiti cu tlawmpal in Aaron lu ah a toih i a thuh i a thianter.

¹³ Cun Moses nih Aaron fapa hna cu a ratpi hna i angki leng a hruk hna i taisawm a sawmh hna i lupawng a ponh hna, Bawipa nih Moses nawl a pek bang khan.

¹⁴ Cun sual thawinak cawtum cu a rak put i Aaron le a fapa hna nih sual thawinak cawtum lu cungah cun an kut an chuan.

¹⁵ Moses nih a thah i a thi cu a lak i biakṭheng ki hna ah cun a velchum in a kutdong in a thuh, cun biakṭheng ca i remnak ser awkah biakṭheng cu a thianter i a hramah thi cu a thlet i a thianter.

¹⁶ Cun a chungril a tuamtu thau vialte le a thin tuamtu le a kal pahnih cu an thau he a lak hna i Moses nih biakṭheng cungah a khangh hna.

¹⁷ Sihmanhsehlaw cawtum cu a phaw le a sa le a ek he riahbuk lengah mei in a khangh, Bawipa nih Moses kha nawl a pek bang khan.

¹⁸ Cun khangh thawinak tuukawng kha a hun pek; Aaron le a fapa hna nih tuukawng lu cungah cun an kut an chuan.

¹⁹ Cun Moses nih a thah i a thi cu biakṭheng velchum ah a theh.

²⁰ Cun tuukawng cu a can i Moses nih a lu le a sa le a thau cu a khangh hna.

²¹ Cun a chungril le a ke hna cu ti in a ṭawl hna i Moses nih tuukawng cu a pum in biakṭheng cungah khangh thawinak caah, rimthaw Bawipa sin i mei in thawinak caah, a khangh, Bawipa nih Moses nawl a pek bang khan.

²² Cun a dang tuukawng pakhat, thleidannak tuukawng cu, a pek; cun Aaron le a fapa hna nih tuukawng lu cungah an kut an chuan.

²³ Cun Moses nih a thah i a thi cu tlawmpal in a lak i Aaron orhlei hnakhaw parte le a orhlei siapi le a orhlei kepi ah a thuh hna;

²⁴ cun Aaron fapa hna cu an ratpi hna i Moses nih thi cu tlawmpal in an orhlei hnakhaw par tete le an orhlei siapi le an orhlei kepi ah a thuh hna; cun Moses nih thi cu biakṭheng velchum ah a thlet.

²⁵ Cun a thau le a thaumi a mei le a chungril tuamtu thau vialte le a thin tuamtu le a thau he a kal pahnih le a orhlei phei cu a lak hna;

²⁶ cun thilnu telh lo changreu bawm Bawipa hmai i a ummi chung khan thilnu telh lo changreu pakhat le chiti he cawhmi changreu hlum khat le changreu pante dar khat kha a lak hna i sathau cungah le orhlei phei cungah khan a chiah hna;

²⁷ cun mah thil vialte hi Aaron le a fapa hna kut chungah a chiah hna i Bawipa hmaiah hninh thawinak caah a hninh hna.

²⁸ Cun Moses nih an kut chungin a lak hna i khangh thawinak he biakṭheng cungah a khangh hna, thleidannak thawinak, rimthaw Bawipa ca i mei in thawinak caah a khangh hna.

²⁹ Cun Moses nih a ii cu a lak i Bawipa hmai i hninh thawinak caah a hninh; Bawipa nih Moses nawl a pek bangin, mah cucu thleidannak tuukawng chungin Moses vo cu a si.

³⁰ Cun Moses nih thuhnak chiti tlawmpal le biakṭheng cung i a ummi thi tlawmpal cu a lak i Aaron le a puan hna cu a theh hna i, a fapa hna le a fapa hna puan hna zong cu a theh hna; cu bangin Aaron le a puan hna le a fapa hna le a fapa hna puan hna cu a thianh ṭi hna.

³¹ Cun Moses nih Aaron le a fapa hna cu, “Tonnak thlam innka ah sa kha chuang u law, cuka ah sa le thleidannak thawinak bawm chung i a ummi changreu cu ei u, ‘Aaron le a fapa hna nih an ei lai,’ tiah nawl ka pek bang khan, a ti.

³² Cun sa le changreu a tangmi cu mei in nan khangh lai.

³³ Cun tonnak thlam innka in ni sarih chung nan chuak lai lo, nanmah thleidannak ni hna a tlin hlantiang, zeitintiah nanmah thleidannak caah ni sarih a herh lai.

³⁴ Nihin i tuahmi bang hin, nannih ca i remnak ser awkah Bawipa nih nawl a kan pek cang.

³⁵ Tonnak thlam innka ah, chunzan in ni sarih chung, Bawipa nih an fialmi hna tuah awkah, nan thih sual nakhnga lo nan um lai; zeitintiah cu bang cun nawl pek ka si,” tiah a ti.

³⁶ Cun Bawipa nih Moses in nawl a pekmi tuah awk thil vialte cu Aaron le a fapa hna nih an tuah.