LEVITIKAS 3 - Lai (Hakha) Common Language Bible 2006

Daihnak Thawinak Kong

¹ “Mi pakhatkhat nih a pekchanhmi cu daihnak thawinak pekchanhnak a si ahcun, cawrun chungin saṭil pakhatkhat, a pa siseh a nu siseh, a pekchanh ahcun, Bawipa hmaiah dotla a pek awk a si lai.

² Cun a pekchanhmi lu cungah a kut a chuan lai i tonnak thlam innka ah a thah lai i Aaron fapa hna, tlangbawi hna nih khan, a thi cun biakṭheng kha a velchum in an theh lai.

³ Cun daihnak thawinak pekchanhnak chungin, Bawipa sinah mei in thawinak caah, a chungril khuhtu thau le, a kiar vialte le,

⁴ a kal pahnih le an cung i a tai zawn ah a ummi thau le, kal hna he a lak chihmi a thin tuamtu cu a pek hna lai.

⁵ Cun Aaron fapa hna nih biakṭheng cungah mei cung i thing cung i khangh thawinak sa cungah cun an khangh lai; mei in thawinak, Bawipa caah rimthaw a si.

⁶ “A pekchanhmi cu, Bawipa sin i daihnak thawinak pekchanhnak caah, tuurun chungin saṭil pakhat a pa siseh a nu siseh a si ahcun, dotla a si lai.

⁷ A pekchanhmi cu tuufa a si ahcun Bawipa hmaiah a pek lai.

⁸ A laksawng lu cungah cun a kut a chuan lai i tonnak thlam hmaiah a thah lai; cun Aaron fapa hna nih a thi cu biakṭheng a velchum ah khan an theh lai.

⁹ Cun daihnak thawinak pekchanhnak chung cun, Bawipa sin i mei in thawinak caah, a thau kha le, a thaumi a mei cu a thluan in, a kengruh tiangin a hun khoihmi le, a chungril a khuhtu thau le a kiar vialte le,

¹⁰ a kal pahnih a tai zawn i a ummi thau he, cun a thin tuamtu a kal hna he a lak chihmi cu a pek lai.

¹¹ Cun tlangbawi nih biakṭheng cungah cun Bawipa sinah mei in pekmi rawl ah a khangh lai.

¹² “A pekchanhmi cu meheh a si ahcun, Bawipa hmaiah a pek lai.

¹³ A lu cungah a kut a chuan lai i tonnak thlam hmaiah a thah lai; cun Aaron fapa hna nih a thi cu biakṭheng a velchum ah khan an theh lai.

¹⁴ Cun mah chung cun, Bawipa sinah mei in thawinak caah amah laksawng ah, a chungril a khuhtu thau le, a kiar vialte le

¹⁵ a kal pahnih a tai zawn i a ummi thau he, cun a thin tuamtu a kal hna he a lak chihmi cu a thawi lai.

¹⁶ Cun tlangbawi nih biakṭheng cungah rimthaw ca i mei in thawimi rawl ah a khangh hna lai. Thau vialte cu Bawipa ta a si.

¹⁷ Thau siseh thi siseh nan ei lai lo, mah hihi nan chan chung vialte, nan umnak hmun kip ah, zungzal nawlbia a si lai.”