LEVITIKAS 26 - Lai (Hakha) Common Language Bible 2006

Pathian Nawlngaih Thluachuahnak

¹ “Nannih nih an hmai i kun awkah, siasal nan i ser lai lo i ṭialmi milem siseh, tung siseh, nan bunh lai lo, cun nan ram chungah suaimi lung nan phun lai lo; zeicahtiah keimah cu Bawipa nan Pathian ka si.

² Ka sabbath cu nan ulh hna lai i ka hmunthiang cu nan upat lai: keimah cu Bawipa ka si.

³ “Ka phunglam kha nan zulh hna i ka nawlbia kha nan ulh hna i nan tuah hna ahcun,

⁴ nan ruahpi cu an caan te ah kan pek hna lai i ram nih hin tirawl an chuahpiak hna lai i nan lo chung thing hna nih thei an tlai lai.

⁵ Nan facil nih cun mitsur lawh caan cu a hei phak lai i mitsur lawh caan nih cun thlaici thlak caan a phak lai; nan rawl cu khim tein nan ei lai i nan ram chungah him tein khua nan sa lai.

⁶ Cun ram chungah daihnak ka chiah lai i nan it lai i ahohmanh nih nan thin an in phanter hna lai lo; cun ram chungin sahrang ṭhalo kha ka ṭhial hna lai i vainam kha nan ram chungah aa chawk lai lo.

⁷ Nan ral kha nan dawi hna lai i nan hmaiah vainam in an tlu lai.

⁸ Nannih lak i panga nih za khat nan dawi hna lai i nannih lak i za khat nih thong hra nan dawi hna lai; nan ral hna cu nan hmaiah vainam in an tlu lai.

⁹ Cun nannih cu hmaizahnak kan pek hna lai i kan punzamter hna lai i kan karhsoter hna lai i, nannih he ka biakamnak kha ka fehter lai.

¹⁰ Cun saupi chiahmi rawl hlun khonmi kha nan ei lai i a thar chiahnak caah a lawnnak a um nakhnga a hlun cu nan chuah hna lai.

¹¹ Cun ka umnak cu nanmah lakah ka ser lai i ka nunnak nih an hua hna lai lo.

¹² Nan sinah kaa chawk lai i kei cu nan Pathian ka si lai i nannih cu ka mi nan si lai.

¹³ Keimah cu Bawipa nan Pathian, Izipt ram in an sal nan si nakhnga lo an chuahpitu hna ka si; keimah nih nan seihnam hngawng kual cu ka khiah cang i dingte i dir in kan kalter hna.

Nawlngaih Lonak Theitlai

¹⁴ “Sihmanhsehlaw ka bia nan ngaih lo i hi nawlbia vialte hi nan tuah hna lo i

¹⁵ ka phungbia kha zei i nan rel hna lo i nan nunnak nih ka phunglam kha a huat i cucaah ka nawlbia tuah duh loin ka biakamnak lehlam kha nan hrawh ahcun,

¹⁶ kei zong nih mah hihi nan cungah ka tuah ve lai: Nan cungah khulrang ṭihnung, tlumralnak le, mit a hrawktu le nunnak a zorter thluahmahtu ngornak ka tlunter lai. Cun nan thlaici thlakmi cu pakpalawng a si ko lai, zeitintiah nan ral hna nih an ei lai;

¹⁷ ka hmai kan chiathnawh hna lai i nan ral nih an in tei hna lai; an huami nih an in uk hna lai i ahohmanh nih an in dawi hna lo zongah nan zam lai.

¹⁸ Cun mah hi ti, ti zong i ka bia nan ngaih ṭhiamṭhiam lo ahcun nan sualnak ruangah a let sarih in kan chimhhrin rih hna lai i,

¹⁹ nan ṭhawnnak nan i porhlawtnak kha ka hrawh lai i nan van hna cu thir bantuk ah ka ser hna lai i nan vawlei cu dar bantuk ah ka ser lai;

²⁰ cun nan thazang cu pakpalawng ah nan hman lai, zeitintiah nan ram nih tirawl a chuah lai lo i nan ram chung thingkung hna nih thei an tlai lai lo.

²¹ “Cun keimah ralchanh in nan kal i ka bia nan ngaih lo ahcun, nan cung ah hremnak, nan sualnak nakin a let sarih tam in ka tlunter lai.

²² Nannih lak i sahrang cu ka thlah hna lai i nan fale kha an in sehpiak hna lai, nan saṭil kha an in hrawhpiak hna lai i an in tlawmter hna lai, cu caah nan lam hna cu an ṭhing dih lai.

²³ “Cun hi chimhhrinnak thawng zongin keimah leiah nan i mer hlei lo i keimah ralchanh in nan kal ko ahcun,

²⁴ keimah zong nannih ralchanh in ka kal ve lai i keimah hrimhrim nih nan sualnak ruangah a let sarih in kan tuk hna lai.

²⁵ Cun nannih cungah vainam ka tlunter lai i biakamnak caah khan phuhlamnak a tuah lai; nan khua chungah nan i pumh ahcun nan lakah rai ka tlunter lai i nan ral hna kut ah khan nanmah cu pek nan si lai.

²⁶ Cun nan i rinhcanhmi rawl kha ka chah tikah nu pahra nih changreu rawhnak pakhat ah nan changreu cu nan rawh lai i nan changreu cu a khing thlai tein pek ṭhan nan si lai; cun nan ei lai i nan i khimh lai lo.

²⁷ “Cun mah hi ti, ti hmanh zong i ka bia nan ngaih hlei lo i keimah ralchanh in nan kal ko ahcun,

²⁸ keimah zong thinhun in nanmah ralchanh in ka kal ve lai i keimah hrimhrim nih nan sualnak caah khan a let sarih in kan chimhhrin hna lai.

²⁹ Nan fapale sa kha nan ei lai i nan fanule sa kha nan ei lai.

³⁰ Nan khuahrum bo cu ka hrawh hna lai i nan zihmui biakṭheng cu ka hau dih hna lai i nan ruak cu nan siasal hna ruak cungah ka hlonh hna lai i ka nunnak nih an huat hna lai.

³¹ Nan khua cu ka ṭiaoter hna lai i nan hmunthiang cu ka ṭhinter hna lai i nan rimthaw cu ka hnim hna lai lo.

³² Ram cu ka hrawh cikcek lai i cu caah nan ral hna cu a chung i an um tikah an khuaruah a har lai.

³³ Miphun hna lakah kan ṭhek hna lai i nan hnu in vainam kan zuhhnawh hna lai i nan ram cu a ṭhing lai i nan khua cu an ṭiao lai.

³⁴ “Cun ram nih cun nan ral hna ram i nan um chung, a ṭhin chung vialte cu a sabbath hna kha a rak i lawmhpi lai; ram cu aa din lai i a sabbath hna cu aa lawmhpi lai.

³⁵ A ṭhin chung vialte cu aa din ko lai; a chungah nan um lio i nan sabbath kum hna ah ram nih a hmuh lomi dinhnak cu a hmuh lai.

³⁶ Nannih lak i a tangmi hna tu cu, an ral hna ram chungah an lung chungah lungdernak ka umter lai; hnahchawl aa hninmi thawng nih a zamter hna lai i vainam lak i zam bantukin an zam lai i ahohmanh i dawi lo ah an thi lai.

³⁷ Ahohmanh i dawi ṭung lo ah vainam he dawi bantukin pakhat le pakhat an i rilhhnawh lai i nan ral hna hmai i dir awkah ṭhawnnak nan ngei lai lo.

³⁸ Cun miphun hna lakah nan loral lai i nan ral hna ram nih khan an ei dih hna lai.

³⁹ Cun nannih lakin a tangmi hna cu nan ral hna ram chungah, an ṭhat lo ruangah an loral chin lengmang lai; cun an pupa hna ṭhat lo ruang zongah, anmah bantukin an loral lai.

⁴⁰ “Sihmanhsehlaw keimah cung i rawinak an tuahnak le keimah ralchanh in an kalnak chung i an tuahmi ṭhat lonak le an pupa hna ṭhat lonak,

⁴¹ cu ruang i anmah ralchanh in ka kal i an ral hna ram chung i ka luhpinak hna cu an i phuan i cuarpar tan lo an lung cu a nem i an ṭhat lonak kha an i remh ahcun;

⁴² cu tikah cun Jakob sin i ka biakam kha ka hngalh ṭhan lai, Isak sin i ka biakam le Abraham sin i ka biakam kha ka hngalh ṭhan lai i ram kha ka hngalh ṭhan lai.

⁴³ Sihmanhsehlaw ram cu an kaltak lai i anmah um loin a ṭhin lioah a sabbath hna cu aa lawmhpi lai; cun ka phunglam kha zei ah an rel lo i an nunnak nih ka nawlbia kha an huat caah an ṭhat lonak dantatnak cu an co lai.

⁴⁴ Asinain cu vialte ruang hmanh ah cun, an ral hna ram chung i an um tikah, ka hlaw hna lai lo, annih kha hrawh cikcek i annih he ka biakam kha hrawh tiangin ka hua fawn hna lai lo; zeitintiah keimah cu Bawipa an Pathian ka si.

⁴⁵ Sihmanhsehlaw anmah zawnruah ah, an Pathian ka si nakhnga, miphun hna hmuh i Izipt ram in ka chuahpimi an pupa hna he ka biakam kha ka hngalh ṭhan lai: keimah cu Bawipa ka si,” tiah a ti.

⁴⁶ Mah hihi Bawipa nih amah le Israel mi hna karlak ah Sinai Tlang cungah Moses thawngin nawlbia hna le phunglam hna le phungbia hna a sermi cu an si.