LEVITIKAS 24 - Lai (Hakha) Common Language Bible 2006

Meiinn Zohkhenhnak

¹ Bawipa nih Moses cu a chawnh i,

² “Israel mi hna cu, oliv chiti a fimmite, van awk i ṭhuatmi cu, meiinn kha alh camcinternak caah, nangmah sin i rak put awkah nawl pe hna.

³ Tonnak thlam chung biakamnak puanzar lengah khan Aaron nih a ningcang tein zanlei in zinglei tiang Bawipa hmaiah a chiah camcin lai; mah hihi nan techin fapar tiangin nawlbia a si lai.

⁴ Sui thiang in sermi meiinn tung cungah khan meiinn hna cu a ningcang tein a chiah camcin hna lai.

Hunmi Changreu

⁵ “Cun changvut dip na lak lai i changreu hlum hlei hnih in na ser lai; hlum khat ah ephah cheu hra cheu hnih lengmang a si lai.

⁶ Sui thiang cabuai cungah cun tlang hnih in na chiah hna lai, tlang khat ah paruk lengmang in.

⁷ Cun a tlang veve ah cun a thiangmi frankinsen na chiah lai, Bawipa sin i mei in pekchanhmi hngalh camcinnak ca changreu he cun an kai ṭi lai.

⁸ Sabbath ni fate Aaron nih a ningcang tein Bawipa hmaiah cun, Israel mi hna airawl in zungzal biakamnak caah a chiah camcin lai.

⁹ Cun mah cucu Aaron le a fapa hna caah a si lai i hmunthiang chungah khan an ei lai, zeitintiah Bawipa sinah mei in pekchanhmi lakah khan a caah a thiang bik, a hmuh camcin awk vo cu a si,” tiah a ti.

Vawlhpamh Dantatnak

¹⁰ Israel minu pakhat i a fapa, a pa Izipt mi a simi cu Israel mi hna lakah aa chawk i Israel minu fapa cu le Israel mipa pakhat cu riahhmun ah cun an i si i

¹¹ Israel minu fapa nih cun Pathian Min cu a vawlhpamh i chiat a serh. Amah cu Moses sinah an ratpi. A nu min cu Shelomith, Dan phun chung mi Dibri fanu a si.

¹² Bawipa duhnak annih sin i thanh a si hlantiang thong chungah an chiah.

¹³ Cun Bawipa nih Moses cu a chawnh i,

¹⁴ “Chiat a sertu cu riahhmun lengah chuahpi law, amah biachim a theitu vialte nih a lu cungah an kut chia hna seh, cun aa pummi vialte nih lung in chep hna seh.

¹⁵ Cun Israel mi hna cu, a Pathian chiat a serhtu paoh nih cun amah a sualnak kha a in lai.

¹⁶ Bawipa min a vawlpammi cu thah a si lai; aa pummi vialte nih lung in an cheh lai: mipem a si zongah, laikhat mi a si zongah, Min cu a vawlhpamh ahcun thah a si ko lai, tiah chim hna,” a ti.

¹⁷ “Cun, mi a thatmi cu thah a si lai.

¹⁸ Saṭil a thatmi nih a cham lai, nunnak caah nunnak.

¹⁹ Mi pakhatkhat nih a innpa kha a mui a chiatter ahcun a tuah bantukin a cungah tuah a si ve lai,

²⁰ ruh khiah caah ruh khiah ve, mit caah mit ve, ha caah ha ve; mi kha a mui a chiatter bantukin chiatter a si ve lai.

²¹ Saṭil a thatmi nih a cham lai; mi a thatmi cu thah a si lai.

²² Mipem ca le laikhat caah phungbia pakhat nan ngei lai tiah chim hna; zeitintiah keimah cu Bawipa nan Pathian ka si,” tiah a ti.

²³ Cu bangin Moses nih Israel mi cu a chimh hna i chiat sertu cu riahhmun lengah an chuahpi i lung in an cheh. Bawipa nih Moses nawl a pek bangin Israel mi nih an tuah.