LEVITIKAS 20 - Lai (Hakha) Common Language Bible 2006

Ziaza Ṭhalo Dantatnak

¹ Bawipa nih Moses a chawnh i, Israel mi hna sinah hi bangin va chim, tiah a ti:

² “Israel mi lak in siseh, an sinah a pemmi khual hna lak in siseh, ahohmanh nih a fa zeihmanh kha Molek a pek ahcun amah cu thah a si lai; ram mi nih lung in an cheh lai.

³ Cu pa cu ka hmai ka chiathnawh lai i a mi hna lakin ka hlonh lai, a fa pakhat cu ka hmunthiang thurhnawmhter awk le ka min thiang thurhnawmh awkah Molek kha a pek caah, ka hlonh hna lai.

⁴ Cun hi ram mi hna nih cu pa i a fa pakhat Molek a pek cu an i hngalhter duh lo i an thah lo ahcun,

⁵ cu pa le a innchungkhar hna cu ka hmai ka chiathnawh hna lai i an mi hna lak in ka hlonh hna lai, amah le Molek sin i va hlawhhlan awkah amah a zulmi vialte cu, ka hlonh hna lai.

⁶ “Mi pakhatkhat nih khuavang le camhthiam kha a fuhpanh hna i hlawh a hlanhnawh hna ahcun, cu mi cu ka hmai ka chiathnawh lai i a mi hna lak in ka hlonh lai.

⁷ Cu caah i thianter u law, thianghlim tuah u; zeicahtiah kei cu Bawipa nan Pathian ka si.

⁸ Ka nawlbia kha ul hna u law, tuah hna u; nannih an thiantertu hna Bawipa cu keimah ka si.

⁹ Zeitintiah a nu siseh, a pa siseh, chiat a serhmi paoh cu thah awk a si lai; a nu siseh, a pa siseh, chiat a serh cang hna, an thisen cu amah cungah a si.

¹⁰ “Mipa pakhatkhat nih a innpa nupi he an sual ahcun, nu he pa he an pahnih in thah an si lai.

¹¹ A pa nupi a ihpimi cu a pa pumlawnnak a hlim a si; an pahnih in thah an si lai, an thisen cu anmah cungah a si.

¹² Mipa pakhatkhat nih a fapa nupi a ihpi ahcun an pahnih in thah an si lai; mah rualchan he sualnak an tuah, an thisen anmah cungah a si.

¹³ Mipa nih mipa cu nu bantukin a ihpi ahcun, an pahnih in fihnung an tuah; thah an si lai, an thisen cu anmah cungah a si.

¹⁴ Mipa pakhatkhat nih nupi a ṭhit i a nu zong nupi ah aa serh ahcun, mah cucu ṭhat lo cikcek a si; mei in khangh an si lai, amah he anmah he; nannih lakah cu ṭhat lonak cu um hlah seh.

¹⁵ Mipa nih saram a ihpi ahcun thah a si lai; cun saram cu nan thah lai.

¹⁶ Nu nih zei saram paoh a fuh i a ihpi ahcun, cu nu le saram cu nan thah hna lai; annih cu thah an si lai, an thisen cu anmah cungah a si.

¹⁷ “Mipa pakhatkhat nih amah far, amah pa fanu maw amah nu fanu maw a lak i pa nih nu a pumlawnnak kha a hmuh i nu nih pa a pumlawnnak kha a hmuh ahcun, mah cucu ningzah awk thil a si, an mi hna mithmuh ah hlonh an si lai; pa nih a farnu pumlawnnak kha a hlim a si caah a dantatnak cu amah nih a in lai.

¹⁸ Pa pakhatkhat nih nu pakhatkhat cu a zawtnak a ngeih lioah a ihpi i a pumlawnnak a hlim ahcun, a cerhti cu a hlim a si i nu nih a thi chuahnak a hun a si; an mi hna sinin an pahnih in hlonh an si lai.

¹⁹ Na nu unau siseh, na pa far siseh, an pumlawnnak na hlim lai lo; zeitintiah mah cucu mah he aa naihmi rualchan hlim a si; dantatnak cu anmah nih an in lai.

²⁰ Pa pakhatkhat nih a pa unau nupi a ihpi ahcun a pa unau pumlawnnak a hlim a si, an sualnak cu an in lai; fa ngei loin an thi lai.

²¹ Mipa pakhatkhat nih amah unau nupi kha a lak ahcun, mah cucu thianlo a si; amah unau pumlawnnak kha a hlim, fa ngei loin an um lai.

²² “Cucaah ka nawlbia vialte le ka phunglam vialte nan ulh hna lai i nan tuah hna lai, cucaah kan hruai hna lainak ram nih an luak hna lai lo.

²³ Nan hmaiah ka dawimi miphun i an phung kha nan zul hna lai lo; zeitintiah mah cu thil hna cu an tuah caah ka huat hna.

²⁴ Sihmanhsehlaw nannih sinah cun, ‘An ram cu nan co lai i nan co awkah kan pek hna lai, cawhnuk le khuaihliti in a luangmi ram cu,’ tiah ka ti. Keimah hi Bawipa nan Pathian, mi hna sinin an thleidangtu hna cu ka si.

²⁵ Cu caah nannih nih saram thiang le thianglo le va thiang le thianglo thleidannak nan ser lai; nannih nih nanmah lila cu saram in siseh, va in siseh, vawlei i a vakmi thil zeipaoh nannih nih a thianglo ah rel awk i ka thleidanmi hna in, fihnung ah nan i ser lai lo.

²⁶ Nannih cu keimah caah mithiang nan si lai; zeitintiah keimah, Bawipa cu, ka thiang i nannih cu keimah ta nan si nakhnga, midang sinin kan thleidan hna.

²⁷ Pa siseh, nu siseh, khuavang ngei maw camhthiam maw a si ahcun thah a si lai; lung in cheh an si lai; an thisen cu anmah cungah a si lai.”