LAMKALTU 27 - Lai (Hakha) Common Language Bible 2006

Paul Cu Rom Khua Ah A Kal

¹ Itali ram ah tilawng in nan kal lai tiah bia an kan khiahpiak tikah, Paul le a dang thongtla tlawmpal hna kha Rom ralkap chung i “Siangpahrang Ralkapbu” timi haotu Julias sinah khan an pek hna.

² Asia ram tilawng dinhnak khua hna pal aa timmi tilawng pakhat, Adramittium khua tilawng kha, kan i cit i kan kal. Masidonia ram Thesalonika khuami Aristarkas kha kan sinah cun a kal ve.

³ A thaizing ah cun Sidon khua kha kan phan. Julias cu Paul cungah khan a ṭha ngaingai i va kal i a hawikom hna va hmuhtak kha a onh i a herhmi rak pekchanh zong kha a onh hna.

⁴ Cuka cun kan chuak i thli kha kanmah lei hoih in a hran caah Saipras tikulh thlidaihnak lei phen khan kan kal.

⁵ Rili cu Silisia le Pamfilia zawn khan kan tan i Lisia peng i Mira khua kha kan phan.

⁶ Cuka ah cun ralbawipa nih khan Alekzandria khua in Itali ram ah a kal dingmi lawng pakhat a hmuh i cu lawng ah cun a kan citter.

⁷ Ni tam nawn khulnuar ngaiin kan kal i har lengmang in Nidas khua pawng kha kan phan kho. Thli nih khan cuka lei kal cu a kan donh cang i cucaah Krit tikulh thli daihnak lei phen khan kan vung kal i Salmon vawlei fonghlei pawng khan kan lan.

⁸ Rilikam naih te khan kan kal thliahmah i har ngaiin Lawng Dinhnak Hnangam timi kha kan phan i cu lawng dinhnak cu Lasia khua in a hla lo.

⁹ Cuka ah cun saupi kan cam i Tlanhnak Ni zong kha a luan cang caah hmailei i kal ding cu ṭihnung a si cang. Cucaah Paul nih cun ruahnak a pek hna i,

¹⁰ “U le nau hna, hika in hmailei kan kalnak ding hi ṭihnung ngaimi a si lai tiah ka hngalh; nan thil phorhmi le lawng zong nih hin rawhralnak an hmu sual lai i nunnak hlohnak zong a um ko lai,” tiah a ti hna.

¹¹ Sihmanhsehlaw ralbawipa kha lawng cawngtu bawile a ngeitu hna nih an chimmi bia tu kha a lung ah a lut deuh i Paul chimmi bia kha cu a lut kho lo.

¹² Cuka lawngdinhnak cu khuasik chung umnak ah a ṭha lo i cucaah tam deuh nih kal i a si khawh ahcun Finiks phak kha an duh. Cu hmun cu Krit tikulh i lawng dinhnak nitlak-thlanglei le nitlak-chaklei a hoihmi kha a si i cuka ah cun khuasik chung kan um lai tiah an ruah.

Tilet A Tho

¹³ Thlanglei in thlizil kha a hung hrang siahmah i kan khuakhannak cu kan tlinter khawh lai, tiah an ruah; cucaah thir cangai kha an hnuh i Krit tikulh kam cun titlang hnur thluahmah in kan kal.

¹⁴ Sihmanhsehlaw a rauh hlanah khin thli ṭhawng ngai, “Nichuah-chaklei Thli” timi cu tikulh lei cun a rung hrang.

¹⁵ Lawng cu a run den ciammam i lawng cu thlichia lei cu hoihter khawh a si ti lo caah cu ti i hoihter kan i zuamnak cu kan ngol i thlitu nih cun a duhnak paoh ah a kalpi thluahmah ko.

¹⁶ Kauda tikulh fate a thlanglei i kan kal lioah khan thlitu cu tlawmpal a kan phenh. Khika ah khan har lengmang in lawng i a ummi vokkuang lawng kha hnangam deuh in kan sersiam khawh.

¹⁷ Lawng cungah khan an hun khin i lawng cu a velchum in hri in fek tein an ṭem. Libia rilikam lei i rili tang thetse tlang ah khan kan i su sual lai ti an phang i cucaah puanzar kha an ṭhumh i lawng cu thlitu kha an choihter.

¹⁸ Thlichia cu a hrang lengmang ko i cucaah a thaizing ah cun lawng chung thil phorhmi kha an hlonh hna i

¹⁹ a kiptuh ah cun an kut in lawng thilri kha an hlonh hna.

²⁰ Ni tampi, ni siseh, arfi si hna seh, hmu kho loin kan um i thlitu cu fak piin a hrang lengmang ko. A donghnak ah cun nun lai hmanh kha kan i ruah ngam ti lo.

²¹ Cuticun mi cu rawl loin saupi an um tikah Paul cu an hmaiah a dir i, “U le nau hna, ka bia rak ka ngaiin Krit tikulh khan chuak loin rak um u si law, hi harnak le sunghnak vialte hi kan tong hnga lo.

²² Sihmanhsehlaw atu cu nan lungdong hlah u, tiah kan nawl hna. Pakhat hmanh kan thi lai lo, lawng bel hi a rawk lai.

²³ Zeicahtiah ka biak i a ta ka simi Pathian vancungmi kha zahan ah ka sinah a ra i,

²⁴ ‘Paul, na thinphang hlah. Siangpahrang hmaika ah cun na dir ṭhiamṭhiam ko lai; cun Pathian nih amah ṭhatnak thawngin nangmah sinah a kalmi vialte an nunnak hi nangmah kha an pek,’ a ka ti.

²⁵ Cucaah u le nau hna, nan lungdong hlah u. Zeicahtiah a ka chimh bantukte cun a si ko lai tiah Pathian kha ka zumh.

²⁶ Tikulh pakhatkhat ah titlang ah a kan cheh te ko lai,” tiah a ti.

²⁷ A zan hleinganak a si cang i Mediterranean rili ah cun thlichia nih cun a kan choih cuahmah ko. Zanṭim hrawngah khin lawngcawng pawl nih cun tlang kan naih rua tiin an lung a hring nawn.

²⁸ Cucaah hri ah lung an thlaih i an vun thlak i ti cu pe za khat le pe kul a si; tlawmte hnu deuh ah khin an vun tah ṭhan i pe sawm kua a si.

²⁹ Kan lawng cu lung ah aa su sual lai ti an phan caah a hnulei in thir cangai pali kha ti chungah an thlak hna i khuadei lainak caah thla lawng kan cam ko.

³⁰ Lawngcawng pawl nih khan vokkuanglawng kha ti ah khan an vun thlak i hmailei kamah thir cangai kan thla lai ti bantuk khin an i umter i zam an i tim.

³¹ Sihmanhsehlaw ralbawipa le ralkap hna cu Paul nih khan, “Hi lawngcawng pawl hi lawng cung i an um peng lo ahcun nan nung lai lo,” tiah a ti hna.

³² Cucaah ralkap pawl nih khan lawng a tlaitu hri kha an pheh hna i lawng cu an thlah.

³³ Khua a hung dei dengmang i Paul nih an dihlak in rawl ei u tiah a nawl hna. “Ni hleili chung awlokchong in nan um i hi chung vialte rawl zeihmanh nan ei lo.

³⁴ Cucaah nan nunnak ding caah hin nan herh caah rawl ei u tiah kan nawl hna. Nan lu cung samfa fa khat hmanh a lo lai lo,” tiah a ti.

³⁵ Hi bia a chim dih in Paul nih cun rawl kha aa lak i an hmaika ah cun Pathian sinah thla a cam hnuah a ei.

³⁶ Midang zong kha an lung a hung ṭhawng i an dihlak in tlawmpal cio an ei.

³⁷ Lawng cung i a ummi cu kan dihlak in za hnih sawm sarih le paruk kan si.

³⁸ An dihlak in khim tein an ei dih hnuah lawng kha zaang deuh seh tiah changvut kha rili ah an thlak.

³⁹ Khua a hung dei tikah lawngcawng hna nih khan titlang cu khuazei a si kha an hngal kho lo, sihmanhsehlaw ti fonghlei pakhat kha an hei hmuh i a si khawh ahcun khika ah khan lawng cu kan dinhter lai an ti.

⁴⁰ Cucaah thircangai kha a hri an chah hna i rili chungah an thlak hna, cun lawng zahnak fung ṭemnak hri kha an phoih hna. Cun lawng kha thli nih hmailei ah kalpi seh tiah a hmailei ah khan puanzar kha an zar i tikam lei cu kan panh.

⁴¹ Sihmanhsehlaw lawng cu thetse tlang ah aa su khut i a tap ai. Lawng cu a hmailei kha thetse chungah cun aa bunh i cawlcang kho ti loin a taan lioah khan a hnulei tu cu tilet nih khan kuai cuahmah in a den ṭualmal ko.

⁴² Ralkap nih khan thongtla vialte hi kan thah dih hna lai, pakhat hmanh i leuh in luat hna hlah seh, an ti.

⁴³ Sihmanhsehlaw ralbawipa nih khan Paul kha khamh a duh caah a thlauh hna. Cucaah aa leuh khomi paoh tikam leiah i leuh u, tiah nawl a pek hna;

⁴⁴ cun a taangmi pawl nih cun thingpheng zeilo ṭukṭak le lawng kuaimi pelpawi kha an i tlaih cio i an zulh hna. Cuticun kan dihlak in him tein titlang ah kan chuak.