LAMKALTU 25 - Lai (Hakha) Common Language Bible 2006

Rom Siangpahrang Sinah Azu A Khan

¹ Cu peng chungah Festas cu a ra phak hnu ni thum ah Sisaria in Jerusalem khua ah a kal.

² Cuka ah cun tlangbawi upa pawl hna le Judah mi hruitu hna nih khan Paul sual an phawtnak cu an rak chimh.

³ Paul cu lam ṭim i rak thah awk kha khua an khan caah Festas cu zaangfahnak tein Paul cu Jerusalem ah ratter ko tiah an nawl.

⁴ Cun Festas nih cun a leh hna i, “Paul cu Sisaria ah thong chungah a um ko i keimah zong khika ah tuan ah ka kir lai.

⁵ Mipa nih hin palhnak a tuah a si ahcun, nan haotu hna kha ka sinah kal hna seh law taza cuai hna seh,” tiah a ti.

⁶ Festas cu an sinah ni riat, ni hra tluk a cam i cun Sisaria khua ah khan a kal. A thaizing ah biaceihnak zung ah khan a ṭhu i Paul cu rak chuahpi u tiah nawl a pek hna.

⁷ Paul cu a hung phanh tikah Jerusalem in a rami Judah mi hna kha a velchum cun an dir i hi pa nih hin sual fak tampi a tuah tiin sualphawt hram kha an thawk, sihmanhsehlaw an puhmi kha ahmaan tiah an ti khawhmi a um lo.

⁸ Cun Paul nih khan aa thawh i, “Judah mi Phung kongah siseh, biaknak inn kongah siseh, Rom siangpahrang kongah siseh, zeihmanh sualnak ka tuah lo,” tiah a ti.

⁹ Festas nih khan Judah mi nih hung ka daw hna seh ti a duh caah Paul cu a thawh i, “Hi sual an in puhmi ruangah hin Jerusalem khua ah kal i ka hmaiah biaceih na duh maw?” tiah a hal.

¹⁰ Paul nih aa thawh i, “Siangpahrang biaceihnak zung hrimhrim ah ka chuak lai, khika ah bia cu ka ceih hna seh. Nangmah nih fiang tein na hngalh bantukin Judah mi cungah zeihmanh ṭhat lonak ka tuah lo.

¹¹ Nawlbia kha buar i thihnak tlak thil ka tuah a si ahcun, cu chungin luatternak cu kan hal lo. Sihmanhsehlaw an ka puhmi ah hin biatak zeihmanh a um ṭung lo ahcun ahohmanh nih an kut chungah nan ka chan kho lai lo. Siangpahrang sinah azu ka khan,” tiah a ti.

¹² Cun Festas nih cun, fimchimtu aa chiahmi pawl kha ruahnak a hal hna hnuah, “Siangpahrang sinah azu na khan caah siangpahrang sinah na kal lai,” tiah a leh.

Agrippa le Bernis Hmaiah Bia A Chim

¹³ Cu hnu tlawmpal ah cun Agrippa Siangpahrang le Bernis cu Festas kha hung chawnh ta awkah Sisaria khua ah khan an ra.

¹⁴ Ni hnih ni thum an cam hnuah khin, Festas nih Paul umtuning kong kha Siangpahrang cu a chimh i, “Hika ah hin mipa pakhat, Feliks nih thong i a rak thlakmi a um ko;

¹⁵ cun Jerusalem i ka hung kal tikah Judah mi tlangbawi upa hna le an upa hna nih khan taza an rak cuai i sual na phawt lai, tiah an ka ti.

¹⁶ Sihmanhsehlaw Rom mi nih cun ahohmanh an si ah taza a cuaitu hna kha hmaitonh tein an ton hna i sual an puhmi kha i chim khawh venak dingah a caan pek lo cun sual an puhmi kha an sinah pek phung a si lo, tiah ka ti hna.

¹⁷ Hika i an rat tikah a caan zeihmanh rauhter loin a thaizing hrimhrim ah biaceihnak zung ah ka ṭhu i mipa cu rak chuahpi u tiah nawl ka pek hna.

¹⁸ Sihmanhsehlaw sual a phawtu hna cu an hung dir i an chim tikah an puh rua lai timi sualnak kha pakhat hmanh an puh lo.

¹⁹ Annih nih an puhmi cu anmah biaknak kong i an i alnak le mipa pakhat a thi cangmi a min Jesuh an timi, Paul nih a nung ṭhan pei tiah a timi kong a rak si.

²⁰ Hi kong ah hin zeitindah fiang deuh in hngalhnak ka hmuh khawh lai ti kha a ruah awk ka hngal lo i cucaah cun Paul cu Jerusalem khua i hung kal i sual an in puhmi hi khika ah ceihpiak na duh maw tiah ka hal.

²¹ Sihmanhsehlaw Paul nih khan azu a khaan; thong chungah ka chia ko law Siangpahrang nih ka bia cu chat te ko seh, a ti. Cucaah Siangpahrang sin i ka kuat khawh hlantiang, amah cu thong chung i um dingin nawlbia ka chuah,” tiah a ti.

²² Agrippa nih Festas cu a thawh i, “Hi pa hi keimah hrim nih theih ka duh ve,” tiah a ti. Cun Festas nih cun, “Thaizing ah na theih lai,” tiah a leh.

²³ A thaizing ah Agrippa le Bernis cu sunparnak le rumra ngei ngaiin an ra i ralbawi upapa hna le khuachung mi lak i upa deuhdeuh hna he khan pumhnak ah khan khaan chungah cun an ra lut. Festas nih khan nawl a hei pek hna i Paul kha an run luhpi ve.

²⁴ Cun Festas nih cun aa thawh i, “Agrippa Siangpahrang le hika i a ummi vialte hna: Nannih nih hi pa hi nan hmuh. Amah hi Judah mi vialte nih, Jerusalem i a ummi he hika i a ummi he, ka sin i taza an cuaimi cu a si. Amah hi nun awkah aa tlak ti lo tiah an au.

²⁵ Sihmanhsehlaw thah awk tlak sinak caah zeihmanh thil ṭhalo a tuahmi ka hmu kho fawn ṭung lo. Cucaah cun amah zong nih Siangpahrang sin i azu a khan caah kei zong nih Siangpahrang sin i kuat dingah cun ka ruah cang.

²⁶ Sihmanhsehlaw a kong ah hin Siangpahrang sin i ṭial awk set ka ngei lo. Cucaah anih cu nan hmaiah kan hun chuahpi — Agrippa Siangpahrang, nangmah hmai thengtheng ah ka hun chuahpi — zeicahtiah a bia cu kan dothlat hnuah ṭial awk ka ngei deuh lai tiah ka ruah.

²⁷ Keimah ca zongah thongtla pakhat, sualnak an puhmi fiang tein ṭial khawh ṭung loin hei kuat cu aa dawhcah deuh fawn lo,” tiah a ti.