LAMKALTU 20 - Lai (Hakha) Common Language Bible 2006

Masidonia le Grik Ram Ah

¹ Hnahnawhnak kha a daih tikah Paul nih khan a zummi kha a kawh hna i thazang peknak bia a chimh hna hnuah, dam tein rung um u, tiah a ti hna i Masidonia ram leiah khan a kal.

² Cuka ram chung khua kha a ṭolpah duahmah hna i thazang peknak bia kha a chimh hna. Cun Grik ram kha a phan i

³ cuka ah cun thla thum a um. Siria i kal dingah a tlam a tlin nawnpah tikah khan Judah mi nih rawi an ka zalh ti kha a hngalh i cucaah Masidonia lei tu khan kal aa tim ṭhan.

⁴ Berea khuami Pirhas fapa Sopater le Thesalonika khuami Aristarkas le Sekandas le Derbe khuami Gaius le Asia ram mi Timote, Tikhikas le Trofimas kha a sinah cun an kal.

⁵ An rak kal chung i Troas khua khan an rak kan hngah.

⁶ Thilnu Phulh Lo Changreu Puai dih in Filipi khua in lawng in kan chuak i ni nga hnuah Troas khua ah kan phak hna; khika ah zarh khat kan cam.

Troas A Tlawn Hmanung Bik Tan

⁷ Zarh chung hmasa bik ni ah hawikomhnak rawl dum ṭi awkah kan i pum. Paul cu a thaizing a kal ding a si cang caah, mi kha bia a chimh lengmang hna i zanṭim tiang a chimh hna.

⁸ Kan i pumhnak khaan, cungdot khaan ah cun meiinn tampi an van.

⁹ Tlangval pakhat a min Zutikhas an timi kha thlalangawng ah khan a ṭhu i Paul nih ngol loin a chim lengmang caah cun a ngu chin lengmang ve i a donghnak ah cun hngilh taktak tein aa hngilh i inncung dot thumnak cun vawlei ah a tla. An vung char i a thi ko.

¹⁰ Sihmanhsehlaw Paul cu a vung ṭum i a bawhhnawh i a ṭang ah aa behchih. “Nan thinphang hlah u, a nung ko rih!” tiah a ti.

¹¹ Cun inncung ah khan a hung kai ṭhan i changreu kha a cheu i an ei. Annih cu saupi, khuadei tiang, a chimh hna hnuah aa thawh.

¹² Tlangvalpa cu inn ah an kalpi i an hna a ngam.

Troas In Miletas Ah Kan Kal

¹³ Lawng ah khan kan rak kal chung i Assos lei kha kan panh; cuka ah cun Paul cu kan lawng ah khan a hun i cit ve ding a si. Anih cu tlanglam in a kal caah cuticun nan tuah lai tiah a kan ti tak.

¹⁴ Assos i kan sin i a ra phak tikah lawng ah cun aa cit ve i Mitilene ah kan kal.

¹⁵ Cuka cun kan chuak i a thaizing ah Khios tikulh zawn kha kan phan. Cun a thaizing nolh ah cun Samos kha kan phan i a kiptuh ah Miletas kha kan phan.

¹⁶ Asia ram chungah kan rauh nakhnga lo lawng in Paul nih Efesa khua kha lanhtak aa zal. Jerusalem khua kha khulrang in phak a duh i a si khawh ahcun Pentekos ni tanh manh kha a duh.

Efesa Khrihfa Upa Kha Ro A Vuih Hna

¹⁷ Paul nih Miletas khua khan mi a thlah hna i Efesa khua khrihfa upa kha rak ka tong hna seh tiah bia a cah hna.

¹⁸ Annih cu an ra phanh tikah a thawh hna i, “Nan sin i ka um chung vialte, Asia ram chung i ka ra phakka tein zeitindah nan sinah ka umtuning a si kha nan hngalh.

¹⁹ Toidorte le mitthli he Bawipa sal ka si bangin, Judah mi nih an ka rawiphiar ruangah harnak ing lengmang in ka rian kha ka ṭuan.

²⁰ Nannih kha zapi lakah siseh, nan inn cio ah siseh, phung kan chimh hna i kan cawnpiak hna tikah nan ca i a ṭha dingmi kha zeihmanh ka nganhtakmi a um lo ti kha nan hngalh.

²¹ Judah mi nan si ah, Jentail mi nan si ah, Pathian hmaiah nan sualnak kha i ngaihchih i kan Bawipa Jesuh zumh ding kha, nan dihlak in kan forh hna.

²² Atu cu Thiang Thlarau hruainak zulh in Jerusalem khua ah ka kal lai, khika ah ka cungah zeidah a tlung lai ti ka hngal lo.

²³ Ka hngalhmi cu Thiang Thlarau nih a ka chimh bantukin, khua kip ah thongtlaknak le harnak nih an ka orh ko ti hi a si.

²⁴ Sihmanhsehlaw Bawi Jesuh nih a ka fialmi rian, Pathian velngeihnak Thawngṭha chim hi ka lim khawh paoh ahcun ka nunnak hi cu zeihmanh ah ka rel lo.

²⁵ “Nan dihlak in kan vahhnawh hna i Pathian Pennak kong kha kan chimh hna. Cun atu cu ahohmanh nih nan ka hmu ṭhan ti lai lo ti kha ka hngalh.

²⁶ Cucaah nihin ah fel tein kan chimh duhmi hna cu, nannih lakah hin pakhatkhat nan tlau ahcun, keimah cu mawhchiat awk ka si hnga lo, ti hi a si.

²⁷ Zeicahtiah Pathian nih aa tinhmi kha a dihumnak in kan chimh dih cikcek hna i ka nganhmi zeihmanh a um lo.

²⁸ Nanmah lila kha i veng u law nan zohkhenh awkah Thiang Thlarau nih an pekmi hna tuurun kha ṭha tein va zohkhenh hna u. Pathian nih amah Fapa thihnak thawngin amah ta ah aa sermi khrihfabu tuukhal kha si ko u.

²⁹ Ka kal hnuah ṭih a nungmi cenghngia kha an ra lai i tuurun kha an ngan hna lai lo ti kha ka hngalh.

³⁰ Cun nanmah bu chung lila zong hin mi a cheu nih a zummi hna kha anmah lei i hruai awkah lih an chim lai caan kha a phan lai.

³¹ Cucaah ralring tein um ko u, mitthli he chun zan in kum thum chung nan dihlak in kan cawnpiak hna kha philh hlah u.

³² “Atu cu Pathian velngeihnak chung le zohkhenhnak chungah nannih kha kan sanh hna. Amah nih cun an ṭhanter khawh hna i a mi vialte caah a chiahmi thluachuahnak kha an pek khawh hna.

³³ Ahohmanh an ngun zong ka hngar hna lo, an sui zong ka hngar hna lo, an hnipuan zong ka mit an thi bal lo.

³⁴ Hi ka kutte hin rian ka ṭuan i keimah le ka hawile nih kan herhmi vialte kha keimahte nih ka chuahpi ti cu nanmah hrimhrim nih nan hngalh ko.

³⁵ Zeizong vialte ah hi bantukin fak piin rianṭuannak thawngin a dermi kha kan bawmh hna awk a si ti cu kan hmuhsak cang hna i Bawipa Jesuh zong nih khan zeitindah a rak ti ti ahcun, ‘Pek leiah hin hmuh lei nakin lunglawmhnak a um deuh,’ a rak ti; cucu kan philh lo awk a si,” tiah a ti.

³⁶ Paul nih bia a chim dih in an dihlak in an khuk an i bil i thla a cam.

³⁷ An ṭahpah in an kuh an hnamh i, dam tein vaa kal ko cang kun, an ti.

³⁸ Nan ka hmu ṭhan ti lai lo, tiah a ti hna caah khan an ngaih a chiat khunnak cu a si. Cun lawng tiang khan an hei thlah.