LAMKALTU 18 - Lai (Hakha) Common Language Bible 2006

Korinth Khua Ah

¹ Cu hnuah cun Paul kha Athens khua khan a chuak i Korinth khua ah a kal.

² Khika ah khan Pontas ram i a chuakmi Akuila kha a va ton, amah cu a nupi Prisilla he khan cu laite ah cun Rom khua in an rak zaam, zeicahtiah Siangpahrang Klaudias nih khan Judah mi vialte kha Rom khua in chuak dih u tiah a ṭhawl hna. Paul nih cun a va leng hna i

³ an sinah cun a um i an sinah cun rian a ṭuan; amah zong cu anmah bantuk khan saphaw thlam ser in a paw aa cawmmi a si ve.

⁴ Sabbath fate pumhnak inn ah khan Judah mi he Grik mi he, an lung pemter awkah bia a chimh lengmang hna.

⁵ Silas le Timote kha Masidonia ram in an rak phanh tikah Paul nih a caan kha a dihlak in phungchimnak ah khan a hman i Jesuh cu Messiah kha a si ti kha Judah mi kha a chimh lengmang hna.

⁶ Annih nih amah cu an doh i a thang an chiat tikah a puan i leidip kha a thinhnawh hna i, “Nan loh ahcun nanmah mawhchiat awk nan si ko cang lai. Kei cu mawhchiat awk ka si ti lai lo. Atu thawk hin cun Jentail mi sinah ka kal cang lai,” tiah a ti hna.

⁷ Cucaah annih cu a chuahtak hna i Jentail mi a min Titius Justas a simi inn ah khan a um; amah cu Pathian a biami a si i a inn cu pumhnak inn pawngah khan a si.

⁸ Pumhnak inn i haotu a simi Krispas le a chungkhar dihlak nih khan an zumh; cun Korinth khua chung i mi tampi hna nih khan bia cu an theih i an zumh i tipilnak an in.

⁹ Zan khat cu Paul nih cun langhnak a hmuh i cu ah cun Bawipa nih a thawh i, “Na thinphang hlah; chim lengmang ko, ngol lai cih,

¹⁰ zeicahtiah keimah nih kan umpi ko. Hi khua chung i a ummi hna lakah hin mi tampi ka minung an si caah ahohmanh nih harnak an in pe kho lai lo,” tiah a ti.

¹¹ Cucaah Paul cu cuka ah cun kum khat le a cheu a um i Pathian bia kha a cawnpiak hna.

¹² Sihmanhsehlaw Gallio cu Rom cozah nih Grik ram uktu bawi ah an ser tikah Judah mi kha an i pum i Paul kha an tlaih i biaceihnak zung ah an chuahpi.

¹³ An i thawh i, “Hi pa nih hin phung ning in si loin Pathian biak awkah khan mi a lem lengmang hna,” an ti.

¹⁴ Paul nih bia chim a hun i zalh hnek lioah khin Gallio nih cun Judah mi cu a thawh hna i, “Judah mi hna, hi thil hi ṭhat lonak le sualnak tuahnak kongah a si ahcun, nan cungah hin lungsaunak ka ngeih awk cu aa dawhmi zong a si ko hnga.

¹⁵ Sihmanhsehlaw hi thil cu bia le min le nanmah phung nan i almi kong a si caah nanmahte nih vaa ceih ko u. Cu bantuk thil kong men biaceihtu si cu ka duh lo!” tiah a ti i

¹⁶ zung chung khan a ṭhawl hna.

¹⁷ An dihlak cun pumhnak inn haotu a simi Sosthenes kha an tlaih i zung hmaiah cun an velh. Sihmanhsehlaw Gallio nih khan zeihmanh ah a relpiak hna lo.

Antiok Khua Ah An Kir

¹⁸ Paul cu Korinth khua ah khan ni tam nawn a um hnuah a kaltak hna i Prisilla le Akuila he khan Siria leiah lawng in an kal. Lawng i an kal hlanah cun Kenkhria khua ah biakamnak a tuah i a lu kha aa met.

¹⁹ Efesa khua kha an phan i khika ah Paul nih khan Prisilla le Akuila kha a kaltak hna. Pumhnak inn chungah khan a lut i Judah mi kha bia a chimh hna.

²⁰ Annih nih sau piin kan umpi ko an ti nain a si thiam lai lo, tiah a al hna.

²¹ Efesa khua in a chuahpah ah cun a thawh hna i, “Pathian hnatla a si ahcun, nan sinah ka ra kir ṭhan lai,” tiah a ti hna.

²² Sisaria a phak tikah Jerusalem ah khan a hung kal i khrihfabu kha a hung chawnhbiak hna i cu dih cun Antiok khua ah khan a lan.

²³ Cuka ah caan tlawmpal a um hnuah aa thawh ṭhan i Galatia le Frizia ram kha a tlawng hna i zumtu vialte kha thazang a pek hna.

Apollo, Athens le Korinth Khua Ah

²⁴ Alekzandria khuami Judah mi pakhat a min Apollo a simi kha Efesa khua ah a ra. Amah cu biachim a thiam ngaingaimi a si i Cathiang kha ṭha tein a hngalmi a si.

²⁵ Bawipa Lam kong kha hngal cikcek tein cawnpiakmi a si i Jesuh kong kha lungtho ngaiin a chim i hmaan tein mi kha a cawnpiak hna. Sihmanhsehlaw Johan tipilnak lawnglawng kha a hngalh.

²⁶ Pumhnak inn ah khan ralṭha ngaiin a cawnpiak hna. Cun amah cu Prisilla le Akuila nih khan an theih tikah an inn ah an kalpi i Pathian Lam kong kha hmaan deuh chin in an cawnpiak.

²⁷ Apollo nih cun Grik ram kal kha aa tim, cucaah Efesa khua chung i a ummi a zummi hna nih khan Grik ram i a ummi an unau hna cu ca an kuat hna i amah cu rak conglawmh u tiah an forh hna. Khika ah a phak tikah Pathian velngeihnak thawngin zumtu a simi hna caah khan bawmtu ngaingai a si.

²⁸ Zeicahtiah bia al lei i a ṭhawn caah khan Judah mi cu zapi hmai i bia i al tikah a tei lengmang hna i Cathiang chung khan Jesuh cu Messiah kha a si, ti kha a langhter.