LAMKALTU 16 - Lai (Hakha) Common Language Bible 2006

Timote, Paul le Silas Sinah A Kal Ve

¹ Paul cu Derbe khua le Listra khua ah khan a lan chin. Khika ah Khrihfa pakhat a min Timote a simi kha a rak um; a nu zong cu zumtu a si ve i Judah mi a si, sihmanhsehlaw a pa cu Grik mi a si.

² Listra le Ikonium i a ummi unau pawl vialte nih Timote cu an thangṭhatmi a si.

³ Paul nih cun Timote kha i ṭhit a duh caah a cuarpar kha a tan. Cu bantukin a tuah cu khika hrawng i a ummi Judah mi vialte nih Timote a pa cu Grik mi a si ti kha an hngalh caah a si.

⁴ Khua khat hnu khua khat an tlawng i an tlawnpah cun zumtu hna cu Jerusalem khua i a ummi lamkaltu hna le upa hna nih an khiahmi phung kha an chimh hna i cu phung cu nan zulh lai tiah an ti hna.

⁵ Cucaah khrihfabu cu zumhnak ah an ṭhawng chinchin i ni fate in an karh chin lengmang.

Troas Ah: Langhnak A Hmuh

⁶ Asia ram chungah Thiang Thlarau nih Thawngṭha kha chim awkah a onh hna lo caah Frizia le Galatia ram chungah khan khual cu an tlawng.

⁷ Misia ramri an va phak ah khan Bithinia ram chungah luh an i zal i sihmanhsehlaw Jesuh Thlarau nih khan a onh hna lo,

⁸ cucaah Misia ram kha an tan i Troas khua ah khan an vung kal.

⁹ Cu zan ah cun Paul nih langhnak pakhat a hmuh i cu ah cun mipa pakhat, Masidonia mi a simi kha a dir i, “Masidonia leiah hin ra law ra kan bawm,” tiah a ti lengmangmi kha a hmuh.

¹⁰ Paul nih hi langhnak a hmuh cangkate in Masidonia lei kal awkah khan kan i tim, zeicahtiah cuka i a ummi hna sin i Thawngṭha chim awkah khan Pathian nih a kan auh tiah kan ruah.

Filipi Khua Ah: Lidia Lungthlennak

¹¹ Troas in tilawng in kan chuak i ding tein Samothrasia ah khan kan kal i a thaizing ah Neapolis kan phan.

¹² Cuka cun ram chungah khan kan lut i Filipi khua kan phan, Filipi khua cu Masidonia ram chung i a um vemi peng peng khat a khualipi a si; cun Rom mi hna ram thar zong a si fawn. Cu khua ah cun ni thum li kan cam.

¹³ Sabbath ni ah khua chung cun kan chuak i tiva kamah kan kal, cuka ah cun Judah mi hna thlacamnak hmun a um lai tiah kan ruah. Kan ṭhu i aa pummi nu kha bia kan ruah hna.

¹⁴ Cu hna lak i kan bia a theimi pakhat cu Lidia a si, amah cu Thiatira khuami a si i maimaw puan a zuarmi a si. Amah cu Pathian a biami nu a si i Paul nih a chimmi bia ngaih awk caah khan Pathian nih a lungthin kha a hunpiak.

¹⁵ Amah le a innchung i a ummi hna nih khan tipilnak an in. Cun a kan thawh i, “Keimah cu Bawipa zumtu taktak ah nan ka ruah a si ahcun, ra u law ka inn ah ra ka tlung u,” tiah a kan sawm.

Filipi Thong Ah

¹⁶ Ni khat cu thlacamnak hmun i kan va kal ṭhan tikah khan lim khuavang a ngeimi sal ngaknu pakhat nih a kan ton i cu a lim khuavang nih cun hmailei thil um ding kha a chimter khawh. Cu bantukin hmailei thil kong a chimnak cun a bawile kha tangka tampi a hmuhter hna.

¹⁷ Amah nih cun Paul le kannih kha a kan zulh i, “Hi hna hi Cung Nung Bik Pathian sal an si i anmah nih hin zeitindah khamh nan si khawh lainak kha an in thanh hna,” tiah a au.

¹⁸ Cuticun ni tampi a au lengmang hnuah Paul cu a ing a puanh i a hnulei ah aa mer i khuavang cu, “Jesuh Khrih min in amah chung khan chuak kan ti,” tiah a ti. Cu cangka cun khuachia cu a chung khan a chuak.

¹⁹ A bawile nih kan tangka hmuhnak caan ṭha a dih cang ti kha an hmuh tikah Paul le Silas kha an tlaih hna i zapi pumhnak ah bawi hmaiah an chuahpi hna.

²⁰ Rom mi a simi biaceih bawi hna hmaiah khan an chuahpi hna i, “Hi mi hna hi Judah mi an si i kan khua chungah hnahnawhnak an tuah.

²¹ Kan upadi he aa ralchanhmi phung kha mi an cawnpiak hna; kannih cu Rom mi kan si i cu phung hna cu a co zong kan cohlang kho hna lai lo i a zulh zong kan zul kho hna lai lo,” an ti.

²² Cu bantukin velh an zalh hnanak ah khan mizapi kha an i ṭom ve i bawi hna nih khan Paul le Silas cu an puan kha an phoih hna i tu hna u tiah ralkap kha an fial hna.

²³ Fak piin an tuk hna hnuah thong ah an thlak hna i thonginn bawi cu fek tein na hrenh hna lai tiah nawl an pek.

²⁴ Cu bantukin thonginn bawi nih nawl a hmuh caah thonginn chung chungchin ah khan a chiah hna i an ke ah khan a ritmi hreng a khenh hna.

²⁵ Zanṭim hrawngah khin Paul le Silas cu thla an cam i Pathian sinah thangṭhatnak hla an sa i thongtla dang nih khan an ngaih hna.

²⁶ Chikkhatte ah khin li a hun i hnin i thonginn cu a hram tiangin a hninh dih. Hmakhatte ah innka vialte kha an i hung dih i thongtla pawl thir cikcin vialte kha an i phoih dih.

²⁷ Thonginn bawi kha a hun i hlau i thong innka an i hun kha a hmuh tikah thongtla vialte kha an chuak dih cang tiah a ruah caah a nam kha aa zuh i amahle amah kha thah aa zal.

²⁸ Sihmanhsehlaw Paul cu fak piin a au i, “Nangmah le nangmah fahnak i pe hlah, kan dihlak in kan um ko,” tiah a ti.

²⁹ Thonginn bawi nih khan mei rak pu u tiah a ti hna i khulrang in a lut i Paul le Silas kehram ah cun ther lengmang in a bawk.

³⁰ Cun annih cu a thawh hna i, “Ka bawipale hna, khamhnak hmuhnak dingah zeidah ka tuah lai?” tiah a ti.

³¹ “Bawipa Jesuh kha zum law, nangmah he na innchungkhar he khamh nan si lai,” tiah an ti.

³² Cun Bawipa bia cu amah le a innchung i a ummi vialte kha an chimh hna.

³³ Cun cu zan ṭhiamṭhiam ah cun thonginn bawi nih khan a kalpi hna i an hma kha a ṭawlpiak hna; chikkhatte ah amah le a innchungkhar dihlak in tipilnak an ing colh.

³⁴ Paul le Silas cu a inn ah a hun kalpi hna i rawl a pek hna. Amah nih Pathian kha a zumh caah amah le a innchungkhar cu lunglawmhnak in an khat.

³⁵ A thaizing ah Rom nawlngeitu bawi hna nih khan palik bawi an hei thlah hna i, “Kha hna kha rak thlah hna seh,” an ti.

³⁶ Cucaah thonginn bawi nih khan Paul cu a chimh i, “Bawi pawl nih nawl an rak ka pek i nangmah le Silas kha rak thlah hna, an ka ti. Cucaah chuak u law dai tein nan khual tlawnnak dingah khan va kal u,” tiah a ti hna.

³⁷ Sihmanhsehlaw Paul nih palik bawi pawl kha a thawh hna i, “Kannih cu kan sualnak zeihmanh an kan hmu lo, asinain zapi hmaiah fung in an kan tuk — Rom mi kan si ve ṭung! Cun thong chungah an kan thlak. Cun atu cu a thli tein kalter an kan duh. A si kho lai lo. Rom bawi pawl cu anmah hrimhrim ra hna seh law ra kan chuah hna seh,” tiah a ti.

³⁸ Cu bia cu palik bawi pawl nih khan Rom bawi pawl cu an va chimh hna; cun annih nih Paul le Silas kha Rom mi an si ti an theih tikah an thin a phang.

³⁹ Cucaah an va kal i ngaihthiam an va hal hna; thong chung cun an chuah hna i kan khua hin kaa dang ah kal u, tiah an nawl hna.

⁴⁰ Paul le Silas cu thonginn khan Lidia inn ah khan an kal. Khika ah unau pawl kha an ton hna i lungṭhawnnak bia an chimh hna hnuah an kal.