LAMKALTU 13 - Lai (Hakha) Common Language Bible 2006

Barnabas le Saul An Thlah Hna

¹ Antiok khua khrihfabu chungah khan profet hna le cawnpiaktu saya hna tlawmpal an um, cu hna cu Barnabas, Simeon (Simeon cu Pa Nak ti zongah an ti), Sairin mi Lusias, Mangki bawi Herod khukṭhi Manaen le Saul kha an si.

² Annih nih Bawipa kha an biak i rawl an ulh lioah khan, Thiang Thlarau nih a thawh hna i, “Barnabas le Saul hi, ka thiahmi hna rian kha an ṭuan nakhnga, a dang tein ka chiahpiak hna u,” tiah a ti.

³ Rawl an ulh i thla an cam dih in an cungah an kut an chuan i an thlah hna.

Saipras Tikulh Ah

⁴ Barnabas le Saul cu Thiang Thlarau nih a fial hna bang khan Seleusia khua ah khan an vung kal i cuka cun Saipras tikulh ah tilawng in an kal.

⁵ Salamis khua an phak tikah khika ah Judah mi hna pumhnak inn ah khan Pathian bia kha an chim. An rian a bawmtu hna caah Johan Marka kha an i kalpi.

⁶ Cu tikulh cu Pafos khua tiangin an hei ṭol i khika ah khan camhthiam a min Bar-Jesuh a simi kha an va ton, amah cu Judah mi a si i profet ka si tiah aa timi a si.

⁷ Amah cu cu tikulh a uktu bawi Sergius Paulus an timi, mifim ngaingaimipa i a hawikom a si. Uktu bawi nih cun Pathian bia kha theih a duh caah Barnabas le Saul kha a auh hna.

⁸ Sihmanhsehlaw annih cu camhthiam Elimas (cucu a Grik min a si) nih khan a rak al hna i uktu bawi kha Pathian cu zum hlah seh tiah kham aa zuam.

⁹ Khi tikah Paul ti zongah ti a simi Saul, Thiang Thlarau in a khatmi nih khan camhthiampa cu dengteo in a zoh i,

¹⁰ “Khuachia fa! Nangmah hi a ṭhami thil paohpaoh dohtu na si; nangmah hi hlennak ṭhalo a phunphun in na khat, Bawipa biatak hi lih i canter naa zuam zungzal.

¹¹ Bawipa kut cu atu ah na cungah a tlung lai, na mit a caw lai i caan tlawmpal chung cu chun ceu na hmu lai lo,” tiah a ti. Chikkhatte ah khin Elimas mit cu minmei nak nih a zelh i a kut in a hruaitu dingmi kawl ah i dap lengmang in aa chawk.

¹² Thil a hung ummi kha a hmuh tikah uktu bawi cu a zummi ah a cang i Bawipa kong an cawnpiakmi nih khan a lung a sukhai ngaingai.

Pisidia Ram Antiok Khua Ah

¹³ Paul le a hawile hna cu Pafos khua khan tilawng in an kal i Pamfilia ram Perga khua kha an phan; khika khan Johan Marka nih a kirtak hna i Jerusalem khua ah a tluntak hna.

¹⁴ Perga cun an hei kal i Pisidia ram Antiok khua kha an phan; cun Sabbath ni ah pumhnak inn ah khan an kal i an ṭhu.

¹⁵ Cuka mi hna nih Moses Nawlbia Cauk chungin le profet hna caṭialmi chungin an rel hnuah pumhnak inn uktu hna nih cun an i thawh i, “U le nau hna, mizapi caah forhnak bia chim awk nan ngeih ahcun chim tuah hna u,” tiah an ti hna,

¹⁶ Paul cu a dir i a kut in dai u tiah a hmuhsak hna i biachim hram aa thawk: “Ka phunhawi Israel mi hna le Pathian a biami Jentail mi hna, ka bia hi ngai tuah u.

¹⁷ Hi Israel miphun Pathian nih hin, kan pupa hna kha a rak thim hna i Izipt ram chung i ramdangmi bantukin khua an vung sak lioah khan miphun nganpi ah a ser hna. Pathian nih a liannganmi a ṭhawnnak in Izipt ram in a chuahter hna i

¹⁸ kum sawm li chung thetse ram ah khan a in hna.

¹⁹ Kanaan ram chungah miphun phun sarih kha a hrawh hna i a mi hna cu ram ngeitu ah khan a ser hna.

²⁰ cucu kum za li le kum sawm nga lio hrawngah khan a rak si. “Cun cu hnuah cun profet Samuel chan tiang khan biaceihtu kha a pek hna.

²¹ Cun annih nih siangpahrang kan pe tiah an hal tikah Pathian nih Saul, Benjamin phun chungmi Kish fapa kha, kum sawm li chung an siangpahrang si awkah a pek hna.

²² Amah cu a phuah hnuah Pathian nih cun David kha an siangpahrang ah a ser. Amah kongah Pathian nih a chimmi cu, ‘Jesse fapa David hi ka duhmi phun a si, amah hi tuah tiah ka fialmi a tuah duh dingmi a si,’ ti hi a rak si.

²³ Hi pa tefa chung hin, Pathian nih bia a rak kam cang hna bangin, Israel mi cu khamhtu Jesuh kha a pek hna.

²⁴ A rat lainak kha Johan nih a rak timhtuah chung i a timhtuahnak ah cun Israel mi vialte kha nan sualnak i ngaihchih u law tipilnak ing u, a ti hna.

²⁵ Cun Johan nih a rian cu a lim dengmang tikah mizapi cu a thawh hna i, ‘Aho a si ti ah dah nan ka ruah? Keimah cu nan hngahmi hi ka si lo. Sihmanhsehlaw zohhmanh u, amah cu ka hnu in a ra lio i kei cu a kedan phoihtu hmanh ah kaa tlak lo,’ tiah a ti hna.

²⁶ “Ka u le ka nau hna, Abraham tefa hna le hika i a ummi Jentail mi vialte, Pathian a biami hna: hi khamhnak bia hi kanmah hi pei pek kan si cu.

²⁷ Zeicahtiah Jerusalem i a ummi hna le an hruaitu hna nih khan amah cu Khamhtu a si kha an hngal lo i cuhleiah Sabbath fate an rel lengmangmi profet bia hna zong kha a sullam an hngal hna lo. Sihmanhsehlaw Jesuh an thahnak thawng khan profet bia kha an tlinter hna.

²⁸ Annih nih thah awkah aa tlak tinak caah bia an hmu kho lo nain Pilat kha kan thahpiak ko tiah an nawl.

²⁹ Amah kongah Cathiang nih a chimmi vialte an tuah dih hnuah vailam cung khan an ṭhumh i thlan ah an vui.

³⁰ Sihmanhsehlaw Pathian nih mithi hna sin khan a thawhter i

³¹ amah sin i Galilee in Jerusalem tiang khual a tlawng tawnmi hna sinah khan voi tampi a lang. Annih cu Israel mi sin i a tehte an si.

^32-33 Cun atu hi, hi Thawngṭha hi nannih sin phakpi awkah hika i kan ratnak cu a si. Kan pupa hna sinah, ka tuah lai, tiah Pathian nih bia a rak kammi kha, kannih an tefa hna sinah hin atu cu a tuah cang, cucu Jesuh a nunter ṭhan hi a si. Cucu Salm fung hnihnak chung i ‘Nangmah cu ka Fapa na si, nihin ah na Pa ka si cang,’ tiah aa ṭial bantuk khan a si.

³⁴ “Cun mithi hna sinin a thawhnak kong, thutnak i zeitikhmanh ah a kir ṭhan ti lai lonak kong ah Pathian nih a chimmi cu, ‘A thiangmi le zumh awk a tlakmi thluachuahnak, David ka rak kamhmi kha, nangmah kan pek lai,’ ti hi a si.

³⁵ “Cun hmun dang ah, ‘Nangmah an tlaihchanmi na sal cu thutnak na inter lai lo,’ tiah a chim bantuk khan a si taktak fawn.

³⁶ David nih khan amah a caan ah khan Pathian rian cu a rak ṭuan; cun a thi i a hringsortu hna sinah khan vui a si i thutnak kha a in.

³⁷ Sihmanhsehlaw mithi hna sinin Pathian nih a thawhtermi cu thutnak kha a ing lo.

^38-39 Ka u le ka nau hna, nan dihlak in nan hngalh awk cu, Jesuh thawng hin pei sual ngaihthiamnak bia nan sin i chim hi a si cu; Moses Nawlbia nih an luatter khawh lomi hna sualnak khan pei amah a zummi paohpaoh cu a luatter hna cu.

⁴⁰ Cucaah i ralring u law profet nih,

⁴¹ ‘Nannih mi nihsawh hmangmi hna, Zohhmanh u, nan khuaruahhar u law thi ko u. Zeicahtiah nanmah nan chan hrimhrim ah ka tuahmi rian hi Nannih nih nan zumh lai lomi thil, midang nih a sullam an in chimh hna hmanh ah nan zumh duh lai lomi a si,’ tiah an chimmi bia hi nan cungah tlunter hlah u,” tiah a ti hna.

⁴² Paul le Barnabas cu pumhnak inn in an ṭin pah ah khan, hmai Sabbath ni ah ra ṭhan u law hi thil kong hi tam deuh in kan chim ṭhan rih u, tiah an sawm hna.

⁴³ Zapi cu pumhnak khan an ṭian hnuah Judah mi a tampi le Judah phung a zulmi Jentail mi mi tampi hna nih khan an zulh hna. Lamkaltu hna nih khan annih cu an chimh hna i Pathian vel chung i um camcin awk kha an forh hna.

⁴⁴ A hmai Sabbath ni ah cun khua chung i a ummi kha an dihlak dengmang in Bawipa kong bia theih awkah cun an ra chuak.

⁴⁵ Judah mi nih mizapi kha an hmuh hna tikah nahchuahnak in an khat; Paul nih a chimmi kha an al i amah kha an nihsawh.

⁴⁶ Sihmanhsehlaw Paul le Barnabas nih khan ralṭha chinchin in an chimh hna i, “Nannih sin i Pathian bia chim hmasa hi a herh taktakmi a si. Sihmanhsehlaw nannih nih nan duh lo ca le zungzal nunnak hmu dingah aa tlak in nan i ruah lo caah, nannih cu kan in kaltak hna lai i Jentail mi sinah kan kal cang lai.

⁴⁷ Zeicahtiah Bawipa nih a kan pekmi nawlbia cu: ‘Nannih cu Jentail mi ca i ceunak si awk le Vawlei cung dihlak ca i khamhnak lam si awkah kan chiah hna,’ ti hi a si,” tiah a ti.

⁴⁸ Jentail mi hna nih cu bia cu an theih tikah an i lawm i Bawipa cu, cu bia ruangah cun an thangṭhat; cun zungzal nunnak hmu dingah thim a simi hna nih khan an zumh i

⁴⁹ khika hrawngah khan Bawipa bia cu a kenkip ah aa ṭhek.

⁵⁰ Sihmanhsehlaw Judah mi hna nih khan, cu khua chung i hruaitu deuhdeuh a simi hna le Pathian a biaminu, upat hmaizah awk deuh a simi kha an forh hna i Paul le Barnabas cu hrem hram an thawk hna; cun cuka ram cun an dawi hna.

⁵¹ Lamkaltu hna nih khan an kebeh cu an khawnhnawhtak hna i Ikonium ah an kal.

⁵² Antiok khua i a ummi zultu hna cu lunglawmhnak le Thiang Thlarau in an khat.