JOSHUA 13 - Lai (Hakha) Common Language Bible 2006

Tei Rih Lomi Ram

¹ Atu cu Joshua cu a upa i a tar ngaingai cang. Bawipa nih a chawnh i, “Nang cu na upa i na tar ngaingai cang, asinain co awk ram tampi a um rih.

² Mah hihi a tang rihmi ram cu a si; Filistin mi hna ram a dihlak le Geshur mi ram a dihlak.

³ (Izipt nichuahlei i a ummi Shihor in chaklei ah Ekron ramri tiang, mah cucu Kanaan mi ram ah rel a si; cun Filistin bawi panga an um, Gaza i le Ashdod i le Ashkelon i le Gath i le Ekron i hna cu an si),

⁴ cun thlanglei ah Avvim mi hna ram zong, Kanaan mi hna ram vialte le Sidon mi ta a simi Mearah, Amor mi hna ramri Afek tiang le,

⁵ Gebal mi hna ram le nichuahlei ah Lebanon vialte, Hermon Tlang tang i a ummi Baal-gad in Hamath khua luhnak tiang,

⁶ tlang ram i a ummi vialte Lebanon in Misrefoth-maim tiang, Sidon mi vialte hna cu. Keimah hrimhrim nih Israel mi hna hmai in ka dawi hna lai; nawl kan pek bantuk khan ram cu Israel mi hna sinah ro caah a cheuh tu cu rak cheu ko hna.

⁷ Cucaah atu cu hi ram hi phun kua le Manasseh phun cheu hna kha ro caah cheu tuah hna,” tiah a ti.

⁸ A dang Manasseh phun cheu hna he cun, Reuben mi le Gad mi nih Moses nih a pek hna bang khan an ro kha an co, Jordan ral nichuahlei ah khan, Bawipa sal Moses nih a pek hna bang khan:

⁹ Arnon tiva nelrawn ri ah a ummi Aroer khua thawk in, cu nelrawn laifang ah a ummi khua le Medeba tlangrawn ram vialte Dibon tiangin;

¹⁰ cun Heshbon ah a ummi Amor mi siangpahrang Sihon khua vialte, Ammon mi hna ramri tiang;

¹¹ cun Gilead ram le Geshur mi hna le Maakath mi hna ram le, Hermon tlang vialte le, Bashan dihlak Salekah tiangin;

¹² Ashtaroth le Edrei in a pengtu Bashan siangpahrang Og pennak vialte (Refaim mi hna lakin a taangmi hna lakah amah lawng cu a tang); mah hna hi Moses nih a tei hna i a dawi hna.

¹³ Sihmanhsehlaw Geshur mi si hna seh, Maakath mi si hna seh, Israel mi nih an dawi hna lo; Geshur le Maakath cu nihin ni tiang hin Israel mi lakah an um ko.

Moses Nih Vo A Pekmi Hna

¹⁴ Levi phun lawng kha Moses nih ro a pek lomi cu a si; Bawipa Israel Pathian sinah mei in pekchanhmi thil cu, a chimh cang bang khan annih ro cu a si.

¹⁵ Cun Moses nih Reuben miphun cu an innchungkhar ning cio ah ro a pek hna.

¹⁶ Cucaah an ram cu Arnon nelrawn ri ah a ummi Aroer khua in le, nelrawn laifang ah a ummi khuapi le, Medeba hrawng tlangrawn ram vialte cu a si;

¹⁷ Heshbon le tlangrawn ram chungah a ummi khua vialte he; Dibon le Bamoth-baal le Beth-baal-meon le

¹⁸ Jahaz le Kedemoth le Mefaath le

¹⁹ Kiriathaim le Sibmah le nelrawn tlang cungah a ummi Zereth-shahar le

²⁰ Beth-peor le Pisgah tlangpang zau le Beth-jeshimoth zong,

²¹ cucu tlangrawn ram khua vialte le Heshbon i bawi a simi Amor siangpahrang Sihon pennak vialte cu a si. Moses nih amah cu Midian mi hruaitu hna Evi le Rekem le Zur le Hur le Reba, Sihon bawi ram chungah a ummi hna he cun a tei.

²² Beor fapa Balaam, camthiammi zong kha Israel mi nih an thahmi hna lakah khan vainam in an thah chih ve.

²³ Reuben mi hna ramri cu Jordan tiva cu a si. Mah hihi Reuben mi hna nih an innchungkhar ning cio ah an comi ram cu a si, an khuapi hna le an khuate hna he tiah.

²⁴ Cun Moses nih Gad miphun zong an innchungkhar ning cio ah ro a pek hna.

²⁵ An ram cu mah hna hi a si: Jazer le, Gilead ram khua vialte le, Ammon mi hna ram hnarcheu, Rabbah nichuahlei ah a ummi Aroer tiang,

²⁶ cun Heshbon in Ramath-mizpeh le Betonim tiang, cun Mahanaim in Debir ram tiang,

²⁷ cun nelrawn chungah Heshbon siangpahrang Sihon pennak a taangmi, Beth-haram, Beth-nimrah, Sukkoth le Zafon; a ramri cu Jordan tiva Khinneroth Rili a thlanglei kam tiang a si; cu ram cu Jordan tiva ral nichuahlei ram cu a si.

²⁸ Mah hihi Gad mi hna nih an innchungkhar ning cio ah, an comi ram cu a si, khuapi hna le a khuate hna he.

²⁹ Cun Moses nih Manasseh phuncheu cu ro a pek; an innchungkhar ning cio in Manasseh phuncheu cu pek a si.

³⁰ An ram cu Mahanaim in Bashan ram vialte a dihlak, Bashan siangpahrang Og pennak vialte cu a ning piin, Bashan chung i a ummi Jair khua vialte, khua sawm ruk hna cu,

³¹ cun Gilead ram a cheu le Bashan ram chung i Og nih a penmi ram khuapi Ashtaroth le Edrei. Mah hna hi Manasseh fapa Makhir tefa hna cu pek an si, an innchungkhar ning cio ah Makhir mi hnarcheu cu pek an si.

³² Jordan tiva ral Jeriko in nichuahlei Moab nelrawn chung i Moses nih a phawtmi hna ram cu mah hna hi an si.

³³ Sihmanhsehlaw Levi phun cu Moses nih ro a pe hna lo; an sinah a rak chim bang khan Bawipa Israel Pathian cu an ro cu a si.