JOHAN 9 - Lai (Hakha) Common Language Bible 2006

Chuahka Mitcaw A Damter

¹ Cun Jesuh cu biakinn khan a kal i lampi ah mitcaw cia in a chuakmi pakhat kha a hmuh.

² A zultu hna nih khan, “Mitcaw in a chuahtertu hi aho sualnak dah a si? Amah sualnak maw a si a nu le a pa sualnak dah?” tiah an hal.

³ Jesuh nih cun, “A mitcawtnak hi amah sualnak ruangah siseh, a nu le a pa sualnak ruangah siseh a si lo. Pathian ṭhawnnak cu amah damnak thawng hin a langh nakhnga caah a mit a cawt hi a si.

⁴ Chun a si chung cu a ka thlahtu rian kha kan ṭuan zungzal awk a si; ahohmanh nih an ṭuan khawh lo caan, zan caan kha a ra lio.

⁵ Vawlei cung i ka um lioah hin cun, keimah hi vawlei ceunak cu ka si,” tiah a leh hna.

⁶ Cu bia a chim dih hnuah Jesuh nih cun vawlei ah khan a cil a chak i tlak tlawmpal a ser, cu tlak cu mipa mit ah khan a nalh i

⁷ “Va kal law Siloam Tidil ah na hmai vaa phiah,” tiah a ti. (Siloam sullam cu Thlah ti a si). Cucaah mipa cu a va kal i a hmai cu a va phiah i khua hmu in a rak kir.

⁸ A innpa hna le rawl a hal a rak hmu tawnmi hna nih khan, “Hi pa hi a ṭhu i rawl a hal tawnmi kha a si lo maw?” an ti.

⁹ A cheu nih, “A si ko,” an ti, a cheu nih, “A si lo, amah he khan an i lo i a si,” an ti. Cucaah mipa hrimhrim nih cun “Ka si ko,” tiah a ti.

¹⁰ Annih nih, “Zeitindah na mit kha na au khawh kun hna?” tiah an hal.

¹¹ Anih nih, “Mipa pakhat a min Jesuh an timi nih, tlak kha a ser i ka mit ah a ka nalh i, ‘Siloam ah va kal law na hmai vaa phiah,’ tiah a ka ti. Cucaah ka va kal i ka vun i phiah cangka khua ka hmu kho,” tiah a leh hna.

¹² “Amah cu khuazei ah dah a si,” tiah an hal. “Ka hngal lo,” tiah a leh hna.

Damnak Kong Kha Farasi Mi Nih An Dothlat

¹³ A mit a rak cawmipa cu Farasi mi hna sinah khan an hei kalpi.

¹⁴ Jesuh nih tlak a ser i mipa mit a damter hna cu Sabbath ni ah a si.

¹⁵ Cucaah Farasi mi hna nih khan mipa cu, “Zeitindah na mit hi khua an hmuh ṭhan,” tiah an hal. Annih cu a thawh hna i, “Tlak tlawmte kha ka mit ah a ka nalh i ka hmai ka va phiah i atu hi khua ka hmu kho,” tiah a chimh hna.

¹⁶ Farasi mi a cheu nih cun, “Hi thil a tuahtu hi Pathian sinin a rami a si kho lai lo, zeicahtiah Sabbath ni phung kha a buar,” an ti. Sihmanhsehlaw a cheu nih khan, “Zeitindah misual a simi nih cun cu bantuk hmelchunhnak cu a tuah khawh lai,” an ti ve. Cucaah cun an i cheu.

¹⁷ Cucaah Farasi mi hna nih khan mipa cu an hal ṭhan i, “Na mit an damter va si kaw, zeitindah amah cu na ruah?” an ti. “Amah cu profet a si, tiah ka ruah,” tiah a leh hna.

¹⁸ Sihmanhsehlaw Judah upa pawl nih khan, amah cu a mit a rak caw i atu cu khua a hmu kho ṭhan, ti kha an zum duh lo. Cucaah mipa i a nu le a pa kha an auh hna i

¹⁹ “Mah pa hi nan fapa a si maw? Mitcaw cia in a chuak nan ti, zeitindah atu hi khua a hmuh khawh kun?” tiah an hal hna.

²⁰ A nu le a pa nih cun, “Amah hi kan fa a si cu kan hngalh i mitcaw cia in a rak chuah cu kan hngalh.

²¹ Asinain atu hi zeitindah khua a hmuh khawh ṭhan ti cu kan hngal lo. Amah hi hal ko uh, upa pei a si ve cang hi, amahte nih an leh khawh ve ko hna lai,” tiah an leh hna.

²² Cu bantukin a nu le a pa nih an chim cu zeicahdah a si ti ahcun, Judah upa hna nih khan Jesuh cu Messiah a si tiah a titu paoh cu pumhnak inn khan kan chuah hna lai tiah hnatlaknak an rak tuah cang i cu hna cu an ṭih hna caah a si.

²³ Cucaah cun, “Upa pei a si ve cang hi, amah kha hal ko u,” tiah an ti hnanak cu a si.

²⁴ Mitcaw cia in a chuakmipa cu an auh ṭhan i, “Biatak ka chim lai tiah Pathian hmaika ah bia i kam. Hi pa hi misual a si ti kha kan hngalh,” an ti.

²⁵ Mipa nih cun, “Misual a si le si lo cu ka hngal lo. Ka hngalhmi cu hi bel hi a si ko: hlanah cun ka mit a rak caw, atu cu khua ka hmu kho,” tiah a leh hna.

²⁶ Annih nih, “Zeitindah an tuah? Zeitindah na mit cu a auter hna?” an ti.

²⁷ “Kan chimh cang ko hna hen cu, nan ngaih duh ṭung lo. Zeicahdah theih ṭhan cu nan duh? A zultu si dahra nan duh ve?” tiah mipa nih cun a leh hna.

²⁸ An nihsawh i, “Cu pa zultu cu nangmah pei na si cu, kannih cu Moses zultu pei kan si.

²⁹ Pathian nih Moses sinah bia a chim ti cu kan hngalh, sihmanhsehlaw kha pa kha cu, a ratnak khuazei in a si ti hmanh kan hngal lo,” an ti.

³⁰ Mipa nih cun, “Khuaruahhar a va si dah. A ratnak khuazei in a si cu nan hngal lo, sihmanhsehlaw ka mit cu a ka auterpiak hen cu!

³¹ Pathian nih misual cu an bia a ngai hna lo i amah a upatmi le a duhnak a tuahmi kha an bia a ngaihpiak hna ti cu kan hngalh.

³² Vawlei hramthawknak in, mitcaw cia in a chuakmi kha, aho tal nih an mit an auter hna ti cu kan theih bal lo cu ta.

³³ Hi pa hi Pathian sinin a rat dah ti lo ahcun cu bantuk thil cu zeihmanh a tuah kho hnga maw?” tiah a leh hna.

³⁴ “A nangmah sual in hrin i sual in cawmmi nih hin maw kanmah cu cawnpiak na hei kan timh,” tiah an ti i pumhnak inn khan an ṭhawl.

Thlarau Mitcaw

³⁵ Jesuh nih an ṭhawl kha a theih. Amah cu a va hmuh i, “Mi Fapa cu na zum maw?” tiah a ti.

³⁶ Mipa nih cun, “Bawipa, amah cu ka zumh khawh nakhnga aho hi dah a si ka chim tuah?” tiah a leh.

³⁷ Jesuh nih cun, “Amah cu na hmuh cangmi kha a si ko i atu i nangmah an chawn lengmangtu hi a si,” tiah a ti.

³⁸ “Bawipa ka zumh,” tiah mipa nih cun a ti i Jesuh hmaiah cun a khuk aa bil.

³⁹ Jesuh nih cun, “Hi vawlei cung i ka run hi, mitcawmi nih khua an hmuh i khuahmumi cu mitcaw ah an i can nakhnga, biathlehnak tuah awkah a si,” tiah a ti.

⁴⁰ Farasi mi tlawmpal, cuka i amah sin i a um vemi hna nih khan cu bia a chim cu an theih i, “Kannih zong hi, nan mit a caw ve na kan ti duhnak cu a si mei?” an ti.

⁴¹ Jesuh nih cun, “Nan mit cu rak caw seh law, sualphawt nan si hnga lo. Sihmanhsehlaw nanmah nih, ‘Khua kan hmu kho,’ nan ti ruangah hin sualphawt nan sinak cu a tang peng ko,” tiah a leh hna.