JOHAN 6 - Lai (Hakha) Common Language Bible 2006

Mi Thong Nga Rawl A Pek Hna

¹ Cu hnuah cun Jesuh cu Galilee Rili ral ah khan a kal, cu Rili cu Tiberias Rili ti zongah an ti fawn.

² Jesuh nih mizaw a damter hna tikah hmelchunhnak a tuahmi kha an hmuh caah mi run tampi nih amah cu an zulh.

³ Jesuh cu tlang pakhat cung ah a kai i cuka ah cun a zultu hna he khan an ṭhu.

⁴ Judah mi Lanhtak Puai kha a nai cang.

⁵ Khua a hei zoh i mi an rat lulhmalh kha a hei hmuh hna tikah Filip kha a thawh i, “Hi mi vialte hna pek awk rawl hi khuazei ah dah kan cawk lai?” tiah a ti.

⁶ (Cuti in a ti cu Filip hneksaknak caah khan a si; zeidah ka tuah lai ti kha amah nih cun a hngalh ko).

⁷ Filip nih cun, “Tlawmte cio ei ding hmanh ah changreu tangka za hnih leng man a herh lai,” tiah a leh.

⁸ A zultu a dang pakhat, Peter nau Andru nih khan,

⁹ “Hika ah hin barli changreu hlum nga le nga pahnih a ngeimi ngakchiapa pakhat a um, asinain cu tham cu mi hi vialte caah cun zei cang dah a kal hnga,” tiah a ti.

¹⁰ “Mi kha ṭhutter hna u,” tiah Jesuh nih cun a ti hna. (Cuka hmun ah cun ram hring aa hnuai dut ko). Cucaah mi vialte cu an ṭhu i thong nga tluk an si.

¹¹ Jesuh nih cun changreu cu aa lak i Pathian sinah lawmhnak bia a chim i cuka i a ṭhumi cu a phawt hna. Cu bantuk ṭhiamṭhiam in nga zong cu a tuah hna i an dihlak in khim tein an ei.

¹² An khim tikah a zultu kha, “An ei bang kha char dih hna u, pakhat hmanh hlolak hna hlah u sih,” tiah a ti hna.

¹³ Cucaah an char dih hna i mi nih an eimi barli changreu hlum nga khan a ṭiltlawt sei hleihnih khat an char.

¹⁴ Cuka i a ummi hna nih cun hmelchunhnak a tuahmi kha an hmuh tikah, “Hi pa hi vawlei cungah a ra lai timi Profet kha a si hrimhrim ko,” an ti.

¹⁵ Jesuh nih cun hramhram in siangpahrang i ser awkah hung hnuh an ka duh ti kha a hngalh caah tlang cungah khan amah lawngin a kal ṭhan.

Jesuh Ti Cungah A kal

¹⁶ Zanlei a hung si tikah a zultu hna cu rili ah khan an vung kal i

¹⁷ lawng kha an i cit i Kapernaum khua leiah khan rili cung cun an kal. Khua a hung mui i sihmanhsehlaw Jesuh cu an sinah khan a ra hlei lo.

¹⁸ Thlichia a hung hrang ciammam i tilet kha a tho.

¹⁹ Khan thum khan li tluk lawng cu an zah tikah khin Jesuh cu rili cungin a ke in a rat i an lawng a hun naih kha an hmuh. An thin a phang ngaingai, sihmanhsehlaw a hei auh hna i,

²⁰ “Nan thinphang hlah u, keimah pei ka si cu,” tiah a ti hna.

²¹ Cucu an theih tikah an lawng chungah cun an luhter i luklakte ah khin an i tinhnak hmun cu an phan colh.

Mi Nih Jesuh Kha An Kawl

²² A thaizing ah cun, rili khattelei ral i a ummi hna nih khan lawng pakhat lawng a tan kha an hmuh. Jesuh cu lawng chungah khan a lut lo ti le a zultu pawl kha amah tel loin an kal ti kha an hngalh fawn.

²³ Cun Tiberias khua in a rami lawng a dang kha, Bawipa nih Pathian sinah lawmhnak bia a chim hnuah mizapi nih changreu an einak hmun ah khan an hung i din.

²⁴ Mizapi nih cun khika ah Jesuh siseh a zultu si hna seh an um lo ti kha an hmuh tikah lawng khan Kapernaum khua ah cun an kal i amah cu an va kawl.

²⁵ Mi nih khan rili khattelei ral i Jesuh cu an va hmuh tikah, “Saya, zeitik ah dah hika hi na phak?” tiah an ti.

²⁶ Jesuh nih cun, “Biatak kan chimh hna: nan ka kawl hi ṭhawnnak in ka tuahmi thil nan hngalh caah khan a si lo; nan duh zat in changreu nan ei caah khan a si ko.

²⁷ Hi a rawk khomi rawl caah hin ṭuan hlah ngat u, a hmunmi rawl, zungzal nunnak rawl caah ta nan ṭuan. Hi rawl cu Mi Fapa nih hin kan pek hna lai, zeicahtiah Pa a simi Pathian nih keimah cungah hin a lungsinak kha a khenh cang,” tiah a ti.

²⁸ Cucaah annih nih cun an thawh i, “Pathian nih ṭuan hna seh ti a kan duhning in kan ṭuan ahcun, zei hi dah kan ṭuan awk cu a si lai?” tiah an hal.

²⁹ Jesuh nih cun a leh hna i, “Pathian nih tuah hna seh ti an duhmi hna rian cu hihi a si: a thlahmi zumh hi,” tiah a ti hna.

³⁰ Annih nih, “Kan in zumh khawh nakhnga, zei hmelchunhnak dah na tuah lai? Kannih nih kan hmuh i kan in zumh nakhnga ding caah zeidah na tuah lai?

³¹ Cathiang nih, ‘Ei awk changreu van in a pek hna,’ tiah a ti bantuk khan, kan pupa hna nih khan thetse ram ah manna kha an ei taktak,” tiah an ti.

³² Jesuh nih cun, “Biatak kan chimh hna: Moses nih a rak in pekmi hna kha cu vancung changreu kha a si lo, vancung changreu taktak an petu hna cu ka Pa hi a si.

³³ Zeicahtiah Pathian pekmi changreu cu vancung in a run thlahmi hi a si i amah nih cun vawlei hi nunnak kha a pek,” tiah a ti hna.

³⁴ “Bawipa, cu changreu cu kan pe zungzal tuah,” tiah an hal.

³⁵ Jesuh nih cun, “Nunnak changreu cu keimah hi ka si. Ka sin i a rami cu ahohmanh an rawl a ṭam lai lo i keimah a ka zummi cu ahohmanh an ti a hal lai lo.

³⁶ Sihmanhsehlaw ka chim bang khan, a hmuh cu nan ka hmu cang ko nain nan ka zum duh lo.

³⁷ Ka Pa i a ka pekmi paohpaoh cu ka sinah an ra lai i ka sin i a rami paohpaoh cu ahohmanh ka dawn hna lai lo.

³⁸ Zeicahtiah vancung in ka rung ṭum cu keimah duhnak tuah awkah khan si loin a ka thlahtu duhnak tuah awkah khan a si deuh.

³⁹ A ka thlahtu nih tuah seh ti a ka duhmi cu hihi a si: a ka pekmi vialte kha pakhat hmanh thlau loin, ni hmanung bik ni ah nunnak i an dihlak in thawhter dih kha a si.

⁴⁰ Zeicahtiah Fapa kha a ka hmu i a ka zummi paohpaoh cu ni hmanung bik ni ah nunnak i thawhter kha ka Pa nih a duhmi cu a si,” a ti.

⁴¹ “Vancung in a rung ṭummi changreu cu keimah hi ka si,” tiah a ti caah khan Judah mi cu an zai.

⁴² Cucaah an i thawh i, “Hi pa hi Josef fapa Jesuh kha a si lo hlah i? A nu kan hngalh, a pa kan hngalh, zeitindah vancung in ka rung, tiah a ti kun?” an ti.

⁴³ Jesuh nih cun a leh hna i, “Nan phunzai len cu ngol ko u.

⁴⁴ A ka thlahtu ka Pa nih ka sinah a hnuh hna dah ti lo ahcun ahohmanh ka sinah an ra kho lo, cun cu hna cu ni hmanung bik ni ah nunnak ah ka thawhter te hna lai.

⁴⁵ Profet nih pei, ‘Mi vialte kha Pathian nih a cawnpiak hna lai,’ tiah an ṭial kha. Ka Pa aw kha a thei i amah zia a cawngmi paoh cu ka sinah an ra.

⁴⁶ Ka chim duhmi cu, Pathian a hmumi an um bal, ka ti duhnak a si lo. Pathian sinin a rung ṭum mi lawnglawng kha Pa a hmu balmi cu a si.

⁴⁷ Biangai kan chimh hna: a zummi cu zungzal nunnak an ngei.

⁴⁸ Nunnak changreu cu keimah hi ka si.

⁴⁹ Nan pupa hna nih manna kha thetse ram ah khan an rak ei taktak, sihmanhsehlaw an thi.

⁵⁰ Asinain vancung in a rungmi changreu a eimi paoh cu an thi lai lo.

⁵¹ Vancung in a rung ṭummi nunnak changreu cu keimah hi ka si. Hi changreu a eimi paoh cu zungzal in an nung lai. Ka pekmi hna changreu cu ka sa hi a si, cucu zeicahdah ka pek hna ti ahcun, vawlei hi a nun nakhnga caah a si,” tiah a ti.

⁵² Cu nih cun Judah mi hna lakah khan bia alnak ṭhalo tein a chuahter ciammam i “Zeitindah hi pa nih hin a sa cu ei awkah a kan pek khawh lai?” an ti.

⁵³ Jesuh nih khan annih cu, “Biatak kan chimh hna: Mi Fapa ka sa hi nan ei lo i ka thi hi nan din lo ahcun nan chungah nunnak nan ngei kho lai lo.

⁵⁴ Ka sa a ei i ka thi a dingmi paoh nih zungzal nunnak an ngei i hmanung bik ni ah nunnak ah ka thawhter hna lai.

⁵⁵ Zeicah ti ah cun, rawl taktak cu ka sa hi a si i din awk taktak cu ka thi hi a si.

⁵⁶ Ka sa a ei i ka thi a dingmi paoh cu ka chungah an nung i kei zong an chungah ka nung ve.

⁵⁷ A nungmi Pa nih keimah hi a ka thlah i ka nun hi Amah ruangah a si bantukin, keimah a ka eimi zong cu keimah ruangah a nung ve lai.

⁵⁸ Cucaah vancung in a rungmi changreu cu hihi a si; nan pupa hna nih an rak eimi changreu bantuk kha a si lo, annih cu an thi, sihmanhsehlaw hi changreu a eimi cu zungzal in an nung lai,” tiah a ti hna.

⁵⁹ Cu bia cu Kapernaum khua pumhnak inn i a cawnpiak hna ah khan Jesuh nih a chim.

Zungzal Nunnak Bia

⁶⁰ Cu bia cu a zultu mi tampi nih khan an theih i, “A cawnpiaknak hi a har tuk. Ahodah cu bantuk cu a ngai kho hnga?” an ti.

⁶¹ A zultu pawl kha cu kong ah cun an zai lengmang ti kha Jesuh nih a lungchung in a hngalh i cucaah a thawh hna i, “Hi bantukin kan cawnpiakmi hna nih hin nan thin an hunter hna maw?

⁶² Mi Fapa hi hmasa i ka rak umnak hmun i ka kai kha ka hmu u law tah zeitindah nan um kun hnga?

⁶³ Nunnak petu cu Pathian Thlarau a si; minung ṭhawnnak hi cu zeihmanh a ṭhahnem lo. Nannih kan chimhmi hna bia hi Thlarau le nunnak cu an si.

⁶⁴ Asinain a cheu nih cun nan zum lo,” tiah a ti. (Jesuh nih khan a hramthawkte in ahodah a zumtu an si lai i ahodah a ka leitu a si lai ti kha a hngalh ko.)

⁶⁵ Cun aa thawh ṭhan i, “Hi ruangah hin pei, ka Pa nih an caah lam a serpiak hna lo ahcun ahohmanh ka sinah an ra kho lo, tiah ka rak in chimh hna kha a si cu,” tiah a ti.

⁶⁶ Cu ruangah cun a zultu tampi cu an i let ṭhan i an zul ti lo.

⁶⁷ Cucaah Jesuh nih zultu hleihnih kha a thawh hna i, “Nannih tah — nan kal ve lai maw?” tiah a ti hna.

⁶⁸ Simon Peter nih a hun leh i, “Bawipa, aho sinah dah kan kal hnga? Zungzal nunnak bia a ngeitu cu nangmah pei na si cu.

⁶⁹ Atu cu nangmah hi Pathian sinin a rami Mi Thiang na si kha kan zumh i kan hngalh cang,” tiah a ti.

⁷⁰ Jesuh nih cun a thawh hna i, “Nannih pahleihnih hi keimah nih kan thim hna lo mei? Asinain pakhat cu khuachia nan si ai!” a ti.

⁷¹ A chim duhmi cu Simon Iskariot fapa Judas kong kha a si. Zeicahtiah Judas cu zultu hleihnih lak i pakhat kha a si ve ko nain amah rawitu ding kha a rak si.