JOHAN 4 - Lai (Hakha) Common Language Bible 2006

Jesuh le Samaria Nu

¹ Farasi pawl nih khan Jesuh nih Johan nakin zultu tam deuh a lak hna i tipilnak a pek hna ti kha an theih.

² (A ngaingai ti ahcun Jesuh nih khan tipilnak cu pakhat hmanh a pe hna lo, a zultu hna lawng nih khan an pek hna).

³ Cu bia cu Jesuh nih a theih tikah Judea ram khan aa thawh i Galilee ram ah a kir;

⁴ lampi ah Samaria ram kha a tan.

⁵ Samaria ram ah cun khua pakhat khi a hei phan i cu khua cu a min ah Saikhar a si. Saikhar cu Jakob nih a fapa Josef a pekmi lo khan a hla lo.

⁶ Cuka ah cun Jakob tikhor kha a um i Jesuh cu a khualtlawnnak ah cun a bat caah tikhor pawngah cun a ṭhu. Cu caan cu chun hrawng khi a si.

⁷ Samaria minu pakhat hi ti than awkah a ra i Jesuh nih cun, “Ti din khat in ka pe tuah,” tiah a rak ti.

⁸ A zultu hna cu rawl cawk awkah khua chungah khan an kal.

⁹ Minu nih cun, “Nang cu Judah mi na si i kei cu Samaria mi ka si, zeitindah ti din awk na ka hal khawh?” tiah a leh. (Judah mi nih cun Samaria mi i an hmanmi khokheng kha hman an duh lo).

¹⁰ Jesuh nih cun, “Pathian nih pek an duhmi laksawng kha zeidah a si ti le, cun ti din awk an haltu hi ahodah a si ti kha hei hngal law cu, amah tu hi na hal hnga i nunnak ti kha an pek ko hnga,” tiah a ti.

¹¹ Minu nih cun, “Bawipa, ti thannak thawl na ngeih ṭung lo. Tikhor tiah a thuk fawn. Khuazei ah dah nunnak ti cu na hmuh lai?

¹² Hi tikhor hi kan pu Jakob nih a kan pekmi a si; amah nih siseh, a fapale nih si hna seh, a saṭil run nih si hna seh, an rak dinmi tikhor cu hi tikhor hi a si. Jakob nak ngan deuh ah cun maw naa ruah?” tiah a leh.

¹³ Jesuh nih cun, “Hi ti a dingmi paoh cu an ti a hal ṭhan lai;

¹⁴ sihmanhsehlaw keimah nih ka pekmi ti a dingmi paoh cu zeitikhmanh ah an ti a hal ṭhan ti lai lo. Ka pekmi ti cu a chungah zungzal nunnak petu cerhtiput ah a cang lai,” tiah a ti.

¹⁵ Minu nih cun, “Bawipa, cu ti cu ka pe law ti hal in um ti hlah ning, hika zongah hin ti than ah ra ti hlah ning,” tiah a ti.

¹⁶ Jesuh nih, “Va kal law na va va ko, cun hika ah hin ra ṭhan,” tiah a ti.

¹⁷ Minu nih cun, “Va ka ngei lo,” tiah a ti. Jesuh nih cun, “Va ka ngei lo, na ti cu na hmaan.

¹⁸ Va panga na rak ngei cang i atu na va hi na va taktak a si lo. Biatak na ka chimh,” tiah a ti.

¹⁹ Minu nih cun, “Bawipa, profet na si hi ta.

²⁰ Kannih Samaria mi a kan hringsortu hna nih, hi tlang ah hin Pathian cu an rak biak, sihmanhsehlaw nannih Judah mi nih Pathian cu Jerusalem khua ah biak awk a si nan kan ti,” a ti.

²¹ Jesuh nih cun a thawh i, “Minu, ka chimmi hi zum; mi nih Pa cu hi tlang ah siseh, Jerusalem ah siseh an biak lo caan a phan lai.

²² Nannih Samaria mi nih cun nan biakmi kha nan hngal taktak lo, kannih Judah mi tu nih cun, kan biakmi cu kan hngalh, zeicahtiah khamhnak cu Judah mi sinin a rami a si.

²³ Sihmanhsehlaw Pathian a bia taktakmi nih cun thlarau le biatak in an biak caan kha a ra lio i hika hi a phan cang. Hi bantukin a biami hna hi Pa nih a duhmi cu an si.

²⁴ Pathian cu thlarau a si i a biatu hna nih cun thlarau le biatak in an biak awk a si,” tiah a ti.

²⁵ Minu nih cun aa thawh i, “Khrih timi Messiah cu a ra lai ti kha kan hngalh. Amah a rat tikah zeizong vialte a kan chimh dih te ko lai,” tiah a ti.

²⁶ Jesuh nih cun a vun leh i, “Amah cu keimah hi pei ka si cu, nangmah he bia aa ruah lengmangmi hi,” tiah a ti.

²⁷ Cu liote ah cun Jesuh zultu pawl kha an hung kir; minu he bia an rak i ruah kha an hmuh hna tikah an khuaruah a har ngaingai. Sihmanhsehlaw ahohmanh nih minu cu, “Zeidah na herh?” tiah an ti lo i Jesuh zong cu, “Zeicahdah minu he khan bia nan i ruah,” tiah an hal lo.

²⁸ Cun minu nih cun a ti-um kha a kaltak i khua chungah khan a va kal i khuachung mi cu,

²⁹ “Thil ka rak tuahmi paoh a ka chim kho dihtu mipa hi ra zoh hmanh u. Amah hi Messiah cu a si kho hnga maw?” tiah a ti hna.

³⁰ Cucaah khuachung cun an va chuak i Jesuh sinah khan an va kal.

³¹ Cu lioah cun Jesuh kha a zultu hna nih khan, “Saya, rawl ei tuah,” tiah an rak fial.

³² Sihmanhsehlaw Jesuh nih annih cu, “A konglam zeihmanh nan hngalh lomi ei awk rawl ka ngei,” tiah a leh hna.

³³ Cucaah a zultu pawl nih cun, “Mi nih rawl an rak pek i maw a si hnga,” tiah pakhat le pakhat an i ceih.

³⁴ Jesuh nih cun a thawh hna i, “Ka rawl cu a ka thlahtu duhnak zulh le a ka fialmi rian liim kha a si.

³⁵ Nannih nih, ‘Hi hnu thla li ah rawl ṭuan a cu lai,’ nan ti a si lo mei? Sihmanhsehlaw lo khi ṭha tein hei zoh hna hmanh u; rawl cu an hmin dih cang i ṭuan an cu diam cang.

³⁶ Rianṭuantu nih a ṭuan man kha a hmuh lio cang i zungzal nunnak caah khan rawl kha a pum lio hna, cucaah a tuhtu le a zuntu kha an pahnih in hmunkhat ah an i lawm ṭi lai.

³⁷ ‘Pakhat nih a tuh i pakhat nih a zun,’ timi bia cu ahmaan ngaingaimi bia a si.

³⁸ Nan ṭuannak a si lomi lo ah khan rawl ṭuan awkah kan thlah hna; cuka ah cun midang nih khan rian cu an rak ṭuan i an rian ṭuanmi thawng cun nannih nih miaknak nan hmuh,” tiah a ti.

³⁹ Minu nih khan, “Ka rak tuahmi vialte a ka chimh dih,” tiah a ti caah khan Samaria mi tampi nih Jesuh cu an zumh.

⁴⁰ Cucaah Samaria mi hna cu Jesuh sin i an rat tikah khan, amah cu kan campi ko, tiah an nawl i cuka ah cun ni hnih a cam.

⁴¹ Amah kaa hrimhrim in an theihmi bia thawng khan mi tampi nih an zumh i

⁴² minu cu an thawh i, “Atu cu nangmah na chimmi ruangah khan si loin, kan mahte nih kan theihmi le amah cu vawlei Khamhtu a si hrimhrim ti kha kan hngalh caah kan zumh,” an ti.

Jesuh Nih Bawi Pakhat Fapa A Damter

⁴³ Cuka ah ni hnih a cam hnuah Jesuh cu Galilee ram ah khan a kal;

⁴⁴ zeicahtiah amah Jesuh hrimhrim nih, “Profet cu amah ram ah cun hmaizahnak a hmu lo,” tiah a rak ti.

⁴⁵ Sihmanhsehlaw Galilee a va phak tikah cun mi nih khan an rak conglawmh ngaingai, zeicahtiah, Lanhtak Puai lioah Jerusalem khua ah khan an rak kal ve i puai chung i a tuahmi vialte kha an rak hmuh dih caah a si.

⁴⁶ Cucaah Jesuh cu Galilee ram Kana khua, ti mitsur zu i a rak canternak ah khan a va kal. Cuka ah cun cozah bawi pakhat a rak um i Kapernaum khua i a ummi a fapa cu a zaw.

⁴⁷ Jesuh cu Judea ram in Galilee ram ah a ra ti kha a theih tikah a sinah cun a va kal i, “Kapernaum khua ah va kal u si law khika ah a thi dengmangmi ka fapa cu ka damhpiak tuah,” tiah a nawl.

⁴⁸ Jesuh nih cun a thawh i, “Thil lianngan le khuaruahhar thil a simi nan hmuh lo paoh ahcun nannih nih cun nan zum bal lai lo,” tiah a ti.

⁴⁹ Cu bawi nih cun aa thawh i, “Bawipa, ka fa a thih hlanah ra ko,” tiah a leh.

⁵⁰ Jesuh nih cun, “Va kal ko, na fa cu a nung lai,” tiah a ti. Mipa nih khan Jesuh nih a chimmi kha a zumh i a kal.

⁵¹ Lampi in a sinum nih khan an rak don i, “Na fapa cu a nung ko lai,” tiah an rak chimh.

⁵² A fapa a dam deuh cu zeitik ah khan dah a si, tiah a hal hna tikah, “A taklinh a daih cu ni zan chun suimilam pakhat ah khan a si,” tiah an ti.

⁵³ Cu caan te cu Jesuh nih, na fa a nung lai, tiah a chim caan a si kha mipa nih cun a hngalh. Cucaah amah le a innchungkhar dihlak nih an zumh.

⁵⁴ Jesuh nih Judea ram in Galilee ram i a rat hnuah hihi hmelchunhnak a tuahmi a pahnihnak a si.