JOHAN 3 - Lai (Hakha) Common Language Bible 2006

Jesuh le Nikodemu

¹ Judah mi hruaitu a simi pa pakhat a rak um i a min cu Nikodemu a si, amah cu Farasi phu chungmi a si.

² Zan khat cu Jesuh sinah khan a va kal i, “Rabbi, nangmah cu Pathian thlahmi cawnpiaktu saya na si ti kha kan hngalh. Pathian nih a umpi hna lo ahcun, hmelchunhnak na tuahmi hi ahohmanh nih an tuah kho lai lo,” tiah a ti.

³ Jesuh nih cun, “Biatak tein kan chimh: Ahohmanh hrin ṭhan a si lo ahcun Pathian Pennak kha a hmu kho lai lo,” tiah a leh.

⁴ Nikodemu nih cun, “Zeitindah patling a si cangmi cu hrin ṭhan cu a si khawh lai? A nu paw chungah cun lut ṭhan in hrin ṭhan cu a si kho bal lai lo,” tiah a leh.

⁵ Jesuh nih cun, “Biatak tein kan chimh: ahohmanh ti le thlarau in hrin a si lo ahcun Pathian Pennak chungah cun a lut kho lai lo.

⁶ Pumsa lei in ti ahcun mi cu a nu le a pa chungin a chuakmi a si, sihmanhsehlaw thlarau hrin si awkah cun Thlarau in a chuakmi a si awk a si.

⁷ ‘Hrin ṭhan nan si hrimhrim awk a si,’ ka ti tikah na khuaruahhar hlah.

⁸ Thlitu cu a duhnak paoh ah a hrang ko; a thawng cu na theih, sihmanhsehlaw khuazei in dah a rat le khuazei ah dah a kal kha na hngal lo. Thlarau in hrin a simi cu, cu bantuk cun an si ve,” tiah a ti.

⁹ Nikodemu nih cun, “Zeitindah cucu a si khawh lai?” tiah a ti.

¹⁰ Jesuh nih cun a thawh i, “Nang cu Israel mi cawnpiaktu saya ngan na si i hi hmanh na hngal lo maw?

¹¹ Biatak tein kan chimh: kannih cu kan hngalhmi kha kan chim i kan hmuhmi kha tehte kan khan, sihmanhsehlaw kan chimmi cu ahohmanh nih cohlan nan duh lo.

¹² Hi vawlei cung thil kong ka chim hmanh ah nan ka zumh lo ahcun zeitindah vancung thil kong ka chim tikah nan ka zumh khawh kun lai?

¹³ Vancung in a rung ṭummi Mi Fapa dah ti lo cu ahohmanh vancung i a kaimi an um bal lo.”

¹⁴ Moses nih dar rul kha thetse ram lakah a tar bantuk khan Mi Fapa zong hi tar a si ve lai.

¹⁵ Cucaah cun amah a zummi paoh nih zungzal nunnak an ngei lai.

¹⁶ Cuticun Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai.

¹⁷ Zeicah ti ahcun Pathian nih a Fapa cu vawlei cungah hin vawlei biaceihtu si awkah a run thlah ṭung lo, vawlei khamhtu si awkah pei a run thlah cu.

¹⁸ “Fapa kha a zummi paoh cu sual biaceihnak a ing lo, sihmanhsehlaw a zum lomi cu sualphawt a si ko cang; zeicahtiah Pathian Fapa ngeihchun kha a zum lo.

¹⁹ Biaceihning cu hitihin a si: ceunak cu vawlei cung hi a rung phan ko cang, sihmanhsehlaw mi nih thil ṭhalo kha an tuah caah ceunak nakcun muihnak tu kha an duh deuh.

²⁰ Thil ṭhalo a tuahmi paoh nih cun ceunak kha a huat i ceunak i rat kha a duh lo, zeicahtiah thil ṭhalo a tuahmi langh kha a duh lo.

²¹ Sihmanhsehlaw thil hmaan a tuahmi cu ceunak ah khan a ra i a tuahmi kha Pathian duhnak zulh in a si ti cu ceunak nih cun a langhter,” tiah a ti.

Jesuh le Johan

²² Cu hnuah cun Jesuh le a zultu hna cu Judea ram ah khan an kal. Cuka ah cun tlawmpal a um i tipilnak kha a pek hna.

²³ Johan zong kha Aenon ah khan tipilnak a pe ve hna, zeicahtiah cuka ah cun ti tampi a um. Aenon cu Salim in a hla lo. Mi cu amah sinah khan an va kal i tipilnak kha a rak pek hna.

²⁴ (Johan cu thong ah khan an thla rih lo).

²⁵ Johan zultu a cheukhat hna kha Judah mi he i thianhnak phung kong an i al.

²⁶ Cucaah Johan sinah khan an va kal i, “Saya, Jordan tiva ral i na sin i a rak ummi pa kha na hngalh a si lo mei? A kong nangmah nih na rak chimmi pa kha. Kha pa kha atu hi tipilnak a pe ve hna i mi kip nih an fuh,” tiah an chimh.

²⁷ Johan nih cun a thawh hna i, “Pathian nih a pek hna dah ti lo ahcun ahohmanh nih zeihmanh an ngei kho lo.

²⁸ ‘Kei cu Messiah cu ka si lo, a hmai i rak thlah chungmi lawng ka si,’ tiah ka timi kha nanmah pei a hngaltu cu nan si kha.

²⁹ Ṭhitmi ngaknu cu a ṭhitu tlangval ta pei a si cu. Nupi ṭhitu tlangval kawi cu a pawng khan a dir i nupi ṭhitu aw a theih tikah khan a lung aa lawm. Kei ka lunglawmhnak tlinter a sining zong cuticun a si ko.

³⁰ Anih cu a ṭhangcho lai, kei cu ka ṭumchuk lai,” a ti.

Vancung In A Rami

³¹ Cunglei in a rungmi cu a dang vialte nakin a ngan deuh, vawlei in a rami cu vawlei ta kha a si i vawlei cung thil kong kha a chim. Cunglei in a rami cu zeizong vialte cungah a um.

³² Amah nih cun a hmuhmi le a theihmi kha a chim, sihmanhsehlaw ahohmanh nih a chimmi kha an cohlang lo.

³³ A bia a cohlangmi paoh nih cun kha an cohlannak thawng khan, Pathian chimmi cu a taktak a si ti kha an langhter.

³⁴ Pathian nih a thlahmipa kha a Thlarau cu tling tein a pek caah, Pathian bia cu a chim.

³⁵ Pa nih a Fapa kha a dawt i zeizong vialte kha amah kut tangah a chiah dih.

³⁶ Fapa a zummi paoh cu zungzal nunnak an ngei, Fapa nawl a ngai lomi paoh cu nunnak an ngei bal lai lo i Pathian thinhunnak cu an cungah a um zungzal ko lai.