JOHAN 21 - Lai (Hakha) Common Language Bible 2006

Zultu Pasarih Sinah Jesuh A Lang

¹ Cu hnuah Jesuh cu a zultu hna sinah khan Tiberias Rili ah voi khat a lang ṭhan. A langhning cu hitihin a si:

² Simon Peter le Faphir timi Thomas le Galilee peng Kana khuami Nathanael le Zebedi fapa hna kha le Jesuh zultu a dang pahnih hna kha hmunkhat ah an um i

³ Peter nih a hawile cu a thawh hna i, “Kei cu ngatlaih ah ka kal lai,” a ti hna. Annih nih, “Na sinah kan kal ve lai,” an ti i lawng chungah khan an lut. Sihmanhsehlaw zan khuadei zeihmanh an tlai lo.

⁴ Ni a hung chuah ah khin Jesuh cu tikam ah khan a dir i asinain a zultu hna nih khan Jesuh a si ti awk an hngal lo.

⁵ Jesuh nih cun a thawh hna i, “Tlangval hna, zeihmanh nan tlai lo maw?” tiah a ti hna. Annih nih, “Zeihmanh kan tlai lo,” tiah an leh.

⁶ Annih cu a thawh hna i, “Nan sur kha nan lawng orhlei kamah khan vun chep u law tlawmpal cu nan tlaih hmanh maw,” tiah a ti. Cucaah an sur cu an vun cheh i nga cu tam tuk hringhran an tlaih caah a hnuh hmanh an hnuk kho lo.

⁷ Jesuh dawtmi zultu nih khan Peter cu, “Bawipa dahkaw a si,” tiah a chimh. Bawipa a si ti kha Peter nih cun a theih tikah a puan kha aa menh i ti chungah a zuang (a puan kha a rak i phoih caah a si).

⁸ Zultu dang pawl kha lawng cun tikam ah khan an kal i nga a khatmi sur kha tikam leiah cun an hnuh. Tikam in lamhlapi ah an um lo, Pe za thum hrawng lawng a si.

⁹ Tikam i an va chuah ah khan meiṭil i nga an rak emmi le changreu tlawmte kha an hmuh.

¹⁰ Cun Jesuh nih khan annih cu, “Atu i nan tlaihmi nga cu tlawmpal in rak pu hna u,” tiah a ti.

¹¹ Simon Peter kha lawngah cun a va kai i nga ngan pipi a khat in a ummi sur cu tikam ah khan a hun hnuh, an dihlak ah za le sawm nga le pathum a si, cu tluk cun an tam nain sur cu a tlek lo.

¹² Jesuh nih cun, “Ra u law ra ei u,” tiah a ti hna. A zultu ahohmanh nih khan, “Ahodah na si?” tiah an hal ngam lo, zeicahtiah Bawipa a si kha an hngalh.

¹³ Cun Jesuh cu a va kal i changreu kha a lak i annih kha a pek hna; nga zong kha a pek hna.

¹⁴ Thihnak in thawhter a si hnuah, atu hi Jesuh nih a zultu hna sinah a langh a voi thumnak a si.

Jesuh le Peter

¹⁵ Rawl an ei dih hnuah Jesuh nih Simon Peter cu a thawh i, “Johan fapa Simon, hi hna nih an ka dawtnak hin nang nih na ka daw deuh maw?” tiah a ti. “Asi, Bawipa, kan dawt kha na hngalh,” tiah a leh. Jesuh nih, “Ka tuufa tete kha cawm hna,” tiah a ti.

¹⁶ Jesuh nih cun a thawh ṭhan i, “Johan fapa Simon, na ka daw maw?” tiah a ti ṭhan. “Asi, Bawipa, kan dawt cu na hngalh,” tiah a leh. Jesuh nih, “Ka tuu kha cawm hna,” tiah a ti.

¹⁷ Cun Jesuh nih cun, “Johan fapa Simon, na ka daw maw?” tiah a ti ṭhan hoi. Jesuh nih, voi thum tiang, na ka daw maw, tiah a hal caah khan Peter cu a ngaih a chia i, “Bawipa, nangmah nih zeizong vialte na hngalh dih, kan dawt cu na hngalh ko hen cu,” a ti. Jesuh nih cun, “Ka tuu kha zohkhenh hna.

¹⁸ Biatak kan chimh: na no lioah cun nangmah nih na taisawm kha naa sawmh i na duhnak paoh ah na kal tawn; sihmanhsehlaw na tar tikah cun na kut na zao hna lai i midang nih na kut cu an ṭem hna lai i na duh lonak hmun ah khan an in kalpi lai,” tiah a ti.

¹⁹ (Hi bantukin Jesuh nih a chim tikah khan Peter cu zei bantuk thihnak in dah a thih lai i zeitindah Pathian kha sunparnak a pek lai ti kha a hmuhsak duh caah a si). Cun Jesuh nih, “Ka zul,” tiah a ti.

Jesuh le A Dang Zultu Pakhat

²⁰ Peter cu a hun i mer i Jesuh dawtmi zultu nih a zulh hna kha a hmuh — cu pa cu rawl an ei lio i Jesuh hngauh in a um i, “Bawipa, ahodah nangmah rawitu cu a si lai,” tiah a haltu kha a si.

²¹ Cu pa cu Peter nih khan a hmuh tikah, “Hi pa hi tah zeitindah a si lai?” tiah Jesuh kha a hal.

²² Jesuh nih cun, “Ka rat ṭhan tiang a nun kha ka duh a si ah, cucu nang caah zeidah a poinak a um? A zulh tu ka zul ko,” tiah a leh.

²³ Cu bia cu Jesuh zultu pawl sinah khan a thang i kha zultu kha a thi lai lo a ti duhnak a si, tiin a sullam an i lak. Sihmanhsehlaw Jesuh nih khan, a thi lai lo, tiah a chim lo; a chimmi cu, “Ka rat tiang a nun ka duh a si ah, cucu nang caah zeidah a poinak a um,” ti tu hi a si.

²⁴ Hi pa cu zultu a si i hi thil hna a chimtu le a ṭialtu zong a si; a chimmi cu ahmaan ti kha kan hngalh.

Tlangkawmnak

²⁵ Jesuh nih a tuahmi a dang tampi a um ko rih. An dihlak in pakhat hnu pakhat in ṭial si hna seh law, an ṭialnak cauk cu vawlei nih hin a tlum hna hnga lo, tiah ka ruah.