JOHAN 20 - Lai (Hakha) Common Language Bible 2006

Thlan A Lawng

¹ Zarhpi ni zingkate ah, khuadei hlanah khin, Mary Magdalin cu thlan ah khan a va kal i thlankhar lung a rak i thawn cang kha a hmuh.

² Mary cu a tli i Simon Peter le zultu dang pakhat, Jesuh nih a dawtmi kha, “Bawipa cu thlan chung khan an lak cang i khuazei i an chiah kan hngal lo,” tiah a chimh hna.

³ Cun Peter le zultu dang cu an i thawh i thlan ah cun an va kal.

⁴ An pahnih cun an le, zultu dang kha Peter nakcun a ṭhawng deuh i thlan kha a phan hmasa.

⁵ A vun bih i khiangrang puan kha cu a hmuh hna, sihmanhsehlaw a lut lo.

⁶ A hnu in Simon Peter cu a ra le cutmat i thlan ah khan a lut colh. Cuka i a ummi khiangrang puan le

⁷ Jesuh lu an mennak puan kha a hmuh hna. Cu puan cu khiangrang puan hna sinah khan a um lo, amah dang tein aa zual.

⁸ Cun thlan a phan hmasami zultu zong kha a lut ve i a hmuh i a zumh.

⁹ (Cathiang nih thihnak in a tho ṭhan lai tiah a timi kha an hngal ṭhiamṭhiam rih lo.)

¹⁰ Cun zultu hna cu inn ah an kir.

Jesuh Cu Mary Magdalin Sinah A Lang

¹¹ Mary cu thlan lengah cun a dir i a ṭap. A ṭah pah cun a vung kun i thlan chung kha a vun bih.

¹² Thil rang in aa thuammi vanmi pahnih a hmuh hna i Jesuh ruak a rak umnak ah khan pakhat a lu leiah, pakhat a ke leiah an ṭhu.

¹³ “Zeicahdah na ṭah len ko?” tiah an hal. Anih nih, “Ka Bawipa kha an kalpi i khuazei i an chiah ka hngal lo,” tiah a leh hna.

¹⁴ Cu bia a vun chim dih ah khan a hnulei ah a hun i mer i Jesuh a dir ko kha a hmuh; sihmanhsehlaw Jesuh a si ti awk a hngal lo.

¹⁵ Jesuh nih cun, “Zeicahdah na ṭah len ko? Ahodah na kawl?” tiah a hal. Mary nih cun dum cawngtu pa kha a si rua tiah a ruah i, “Bawipa, nangmah nih na lak a si ahcun na chiahnak kha ka chim tuah, ka va kal lai i ka va lak lai,” tiah a ti.

¹⁶ Jesuh nih cun, “Mary,” tiah a vun ti i amah leiah cun a vun i mer i Hebru holh in “Rabboni,” tiah a ti. (A sullam cu, saya tinak a si.)

¹⁷ Jesuh nih cun, “Ka tlai peng ko tuah hlah, zeicahtiah ka Pa sinah ka kir rih lo. Sihmanhsehlaw ka unau pawl sinah khan va kal law, ‘Ka Pa le nan Pa, ka Pathian le nan Pathian a simi sinah khan ka kal lai,’ a ti tiah va chim hna,” tiah a ti.

¹⁸ Cucaah Mary Magdalin cu a kal i Bawipa cu ka hmuh i hi bia hi a ka chimh tiah a zultu kha a va chimh hna.

Jesuh A Zultu Hna Sinah A Lang

¹⁹ Zarhpi ni zanlei sang tlai nawn ah khin a zultu hna cu an i pum i Judah upa kha an ṭih hna caah inn an i hrenhkhumh. Cun Jesuh kha a ra i an lakah cun a hung dir. “Nan cungah daihnak um ko seh,” tiah a ti hna.

²⁰ Cu bia a chim dih cun a kut le a hnak kha a hmuhsak hna. Bawipa an hmuh ṭhan caah a zultu hna cu lunglawmhnak in an khat.

²¹ Cun Jesuh nih cun, “Nan cungah daihnak um ko seh, Ka Pa nih a ka thlah bantukin kei zong nih kan thlah ve hna,” tiah a ti ṭhan hna.

²² Cu bia cu a chim dih in a thaw a chuahhnawh hna i, “Thiang Thlarau kha hmu ko u.

²³ Mi kha an sualnak nan ngaihthiam hna ahcun ngaihthiam an si ko, nan ngaihthiam hna lo ahcun ngaihthiam lo an si ko,” tiah a ti.

Jesuh le Thomas

²⁴ Zultu hleihnih lak i aa telmi Thomas (Faphir timi) kha Jesuh a rat ah khan an sinah a rak um lo.

²⁵ Cucaah zultu dang nih khan, “Bawipa kha kan hmuh,” tiah an chimh. Thomas nih cun a thawh hna i, “A kut i thir hmaneh kha ka hmuh hna i cu thir hmaneh le a hnak kha ka kut in ka tawngh hna lo ahcun ka zum lai lo,” tiah a ti hna.

²⁶ Cu hnu zarh khat ah khin a zultu hna cu inn chungah khan an um ṭhan i Thomas zong kha a um ve. Innka cu an hrenh dih hna, sihmanhsehlaw Jesuh cu a rung lut i an lakah khan a dir, “Nan cungah daihnak um ko seh,” tiah a ti.

²⁷ Cun Thomas cu a thawh i, “Hika ah hin ra law ka kut hi zoh tuah hna; cun ka hnak kha ka tawng tuah. Zum loin um ti hlah, zum cang ko,” tiah a ti.

²⁸ Thomas nih cun, “Ka Bawipa le ka Pathian,” tiah a ti.

²⁹ Jesuh nih cun, “Na ka hmuh caah na ka zumh. Sihmanhsehlaw keimah hmu loin a ka zummi hna caah cun lunglawmh awk a va si dah,” tiah a ti.

Hi Cauk Ṭialtu Tinhmi

³⁰ Hi cauk chung i ṭial lomi hmelchunhnak tampi, Jesuh nih a zultu hna hmai i a tuahmi an um ko rih.

³¹ Hi thil lianngan a tuahmi hna ka ṭialnak chan cu, nannih nih Jesuh cu Messiah, Pathian Fapa a si ti kha nan zumh i cu nan zumhnak thawngin amah min in nunnak nan hmuh nakhnga caah a si.