JOHAN 2 - Lai (Hakha) Common Language Bible 2006

Kana Khua Nupi Ṭhitnak Puai

¹ Ni hnih hnuah khin Galilee ram Kana khua ah nupi ṭhitnak a um. Jesuh nu kha cuka ah cun a um i

² Jesuh le a zultu hna zong kha nupi ṭhitnak puai ah khan an sawm hna.

³ Mitsur zu kha a dih tikah Jesuh cu a nu nih khan, “Mitsur zu an ngei ti lo,” tiah a chimh.

⁴ Jesuh nih cun, “Ka nu, zeidah tuah awk ti kha, na ka chimh awk a si lo, ka caan pei a phan rih lo cu,” tiah a ti.

⁵ Jesuh nu nih cun sinum pawl cu, “An chimhmi hna paoh kha tuah te u,” tiah a ti hna.

⁶ Judah mi nih kut ṭawlnak kong ah phung an ngei i cu bantukin kut i ṭawlnak caah cun lung ralca paruk an chiah; ralca pakhat nih cun ti galan pakul le sawm thum karlak cio an tlum.

⁷ Jesuh nih sinum pawl cu a thawh hna i, “Hi ralca ah hin ti rawn hna u,” tiah a ti. Liam thluahmah in an rawn hna i

⁸ annih cu, “Ti kha tlawmpal in hei than u law rawldanghnak tlangtlatu kha hei pe u,” tiah a ti hna. An hei pek i,

⁹ mitsur zu ah aa cangmi ti cu a rak teh. Hi mitsur zu hi khuazei in dah a chuah ti kha a hngal lo. (Ti a thantu sinum nih khan cun an hngalh ko). Cucaah nupi ṭhitu pa kha a auh i,

¹⁰ “Midang nih cun an sawmmi hna kha mitsur zu a ṭha bik cu a hmasa ah an dinh tawn hna, cun an i zat hnuah cun a sawhsawh kha an pek hna. Sihmanhsehlaw nang nih cun a ṭha bik kha atu tiangin naa chiah rih,” tiah a ti.

¹¹ Galilee ram Kana khua i Jesuh nih a tuahmi hi hmelchunhnak a tuahmi lakah a hmasa bik a si; cu a tuahmi hmelchunhnak ah cun a sunparnak kha a langhter i a zultu nih khan amah cu an zumh.

¹² Cu dih cun Jesuh le a nu le a naule le a zultu hna cu Kapernaum khua ah khan an kal i khika ah khan ni tlawmpal an cam.

Jesuh Cu Biakinn Ah A Kal

¹³ Judah mi Lanhtak Puai kha a nai dengmang cang i cucaah Jesuh cu Jerusalem khua ah khan a hung kal.

¹⁴ Biakinn chungah khan caw le tuu le laileng a zuarmi hna le tangka thlengtu pawl an cabuai i an rak ṭhut ko kha a hmuh hna.

¹⁵ Hri kha tuknak caah aa hrual riangmang hna i an saṭil vialte cu biakinn chung cun a ṭhawl dih hna, tuu he caw he a ṭhawl dih hna; tangka thlengtu pawl an cabuai kha a leh dih hna i an phaisa sop kha a ṭhekpiak dih hna.

¹⁶ Laileng zuar pawl kha a thawh hna i, “Hika hmun hin nan laileng kha chuahpi hna u. Ka Pa inn cu chawdawrnak hmun ah ser hlah u,” a ti hna

¹⁷ Cathiang nih, “Maw Pathian, na inn ka tlaihchannak hi ka chungah mei bangin a lin,” tiah a timi kha a zultu hna cu an lung ah a hung pem.

¹⁸ Judah upa pawl nih khan amah cu an fuh ṭhan i, “Hi thil tuahnak nawl na ngeih hi na kan hmuhsak khawh nakhnga khuaruahnak zeidah na tuah khawh?” tiah an hal.

¹⁹ Jesuh nih cun, “Hi Pathian biakinn hi ṭhet u law ni thum chungah ka sak ṭhan ko lai,” tiah a leh hna.

²⁰ “Ni thum chungah na sak ṭhan ko hnga ti? Hi biakinn sak ah hin kum sawm li le kum ruk pei an rak rauh,” an ti.

²¹ Sihmanhsehlaw Jesuh nih biakinn a timi cu amah a pum kha a si.

²² Cucaah thihnak in thawhter a si tikah a zultu hna nih khan, mah hihi a rak chimmi a si, ti kha an lung ah a hung pem; cun Cathiang nih a rak chimmi le Jesuh nih a chimmi kha an zumh.

Jesuh Nih Mi Kha A Hngalh Dih Hna

²³ Jesuh cu Lanhtak Puai chung i Jerusalem khua i a um ah khan mi tampi nih hmelchunhnak a tuahmi kha an hmuh caah amah cu an zulh.

²⁴ Sihmanhsehlaw an kut chungah cun aa sanh duh lo, zeicahtiah mi kha ṭha tein a hngalh dih cikcek ko hna.

²⁵ Minung kong ah hin aho chimh hmanh a herh lo, zeicahtiah an lung chungah zeidah a um ti kha a hngalh dih ko.