JOHAN 19 - Lai (Hakha) Common Language Bible 2006

¹ Cun Pilat nih Jesuh kha a lak i ralkap kha a tukter hna.

² Ralkap nih cun hlingnge in luchin pakhat an phiar i an chinh; puan sen kha an aih i

³ an hun hnawh i, “Judah Siangpahrang cu saupi nung ko seh,” an ti i a hmai ah an bengh.

⁴ Pilat cu a va chuak ṭhan i Judah mi hna cu, “Zohhmanh u, amah hi! Amah cu a sualnak zeihmanh ka hmu lo ti kha hngalhter kan duh hna caah ka rak chuahpi hih,” tiah a ti hna.

⁵ Cucaah Jesuh cu lengah a va chuak i hling luchin cu aa chinh i puansen kha aa aih. Pilat nih cun a thawh hna i, “Zohhmanh u, mipa hi!” a ti.

⁶ Tlangbawi upa hna le palik pawl nih khan Jesuh cu an hmuh tikah, “Vailam ah khenh chih ko! Vailam ah khenh chih ko!” tiah an au. Pilat nih cun annih cu, “Nanmah nih kalpi u law vailam ah cun va khenh chih u. Kei cu a sualnak ka hmu lo,” tiah a ti hna.

⁷ Judah mi nih cun, “Amah nih Pathian Fapa ka si tiah a ti caah kan phung bantukin thih awk a si,” an ti.

⁸ Cu bia an chim cu Pilat nih a theih tikah a thin a phang chinchin.

⁹ Inn chungah a vung lut ṭhan i Jesuh cu, “Khuazei in dah na rat?” tiah a hal. Sihmanhsehlaw Jesuh nih a let lo.

¹⁰ Pilat nih cun a thawh i, “Na ka chawn duh lai lo maw? Nangmah cu thlah khawhnak nawl le vailam i khenh chih khawhnak nawl ka ngei dah kaw?” tiah a ti.

¹¹ Jesuh nih cun, “Ka cung i nawl na ngeih hi Pathian nih an pek ca lawngah a si. Cucaah nangmah kut i a ka chantupa hi a sual deuh,” tiah a ti.

¹² Cu bia cu Pilat nih a theih tikah Jesuh cu zeitindah ka luatter khawh lai tinak lam kha a kawl. Sihmanhsehlaw Judah mi cu a au in an au i, “Na thlah a si ahcun nang cu Sizar hawi na si lo. Siangpahrang ka si tiah aa timi paoh cu Sizar ral an si,” an ti.

¹³ Cu bia cu Pilat nih a theih tikah Jesuh cu lengah a hei chuahpi i “Lung Ṭuang” timi hmun i biaceihnak ṭhutdan cungah khan a ṭhu (Hebru holh cun Gabbatha an ti)’

¹⁴ Lanhtak Puai lai ni chun kha a si dengmang cang. Pilat nih Judah mi cu a thawh hna i, “Nan siangpahrang hi zohhmanh u,” a ti hna.

¹⁵ An au i, “That ko! That ko! Vailam ah khenh chih ko!” an ti. Pilat nih cun, “Nan siangpahrang cu vailam ah ka khenh chih ko lai maw?” tiah a hal hna. Tlangbawi upa hna nih cun, “Sizar dah ti lo cu ahohmanh siangpahrang dang kan ngei lo,” tiah an leh.

¹⁶ Cun Pilat nih Jesuh cu vailam i khenh awkah annih kha a pek hna. Cuticun Jesuh cu an kalpi,

Jesuh Vailam Ah An Tah

¹⁷ A vailamtahnak kha amah nih aa put i “Luruh Hmun” an timi kha an phan. (Hebru holh cun Golgotha an ti).

¹⁸ Cuka ah cun vailam cungah khan an khenh chih; midang pahnih zong a kehlei ah pakhat a orhlei ah pakhat, an tah ve hna i Jesuh cu an karlak ah a um.

¹⁹ Pilat nih ca pakhat a ṭial i vailam tahnak cungah cun a tar. A ṭialmi cu “Nazareth khuami Jesuh Judah Siangpahrang” ti a si.

²⁰ Jesuh vailam i an tahnak hmun cu khuapi khan a hlat lo caah cu ca cu Judah mi tampi nih an rel. A ca cu Hebru holh le Latin holh le Grik holh in aa ṭial.

²¹ Judah mi tlangbawi upa hna nih khan Pilat cu, “ ‘Judah Siangpahrang’ tiin ṭial hlah, ‘Hi pa nih hin Judah Siangpahrang ka si a ti,’ tiin ṭial,” an ti.

²² Pilat nih cun, “Ka ṭialmi cu ka ṭialning in um ko seh,” tiah a leh hna.

²³ Ralkap nih Jesuh kha vailam i an khenhchih dih in, a hnipuan kha an i lak i ralkap pakhat nih pakhat cio ting dingin ṭhen li ah an ṭhen hna. Cun a angki cu hliah ngei loin tahmi a si i cu zong cu an i lak.

²⁴ Ralkap nih cun, “Hi hi cu thlek hlah u sih, camcawhfung tu in zuk u sih,” tiah an i ti i cuticun Cathiang nih, “Ka hnipuan cu an i ṭhen i Ka angki caah camcawhfung an zuh,” tiah a timi kha a hung tling. Cuticun ralkap nih cun an tuah.

²⁵ Jesuh vailam pawngte ah khan a nu le a nu naule Klopas nupi Mary le Mary Magdalin kha an dir.

²⁶ Cuka i a nu le a dawtmi a zultu an dir ko kha a vun hmuh hna i a nu cu, “Ka nu, khaka ah khan na fapa a um khah,” tiah a vun ti,

²⁷ a dawtmi a zultu zong cu, “Khaka ah khan na nu a um khah,” tiah a vun ti ve. Cu caan thawk cun cu zultu nih cun Jesuh nu cu a inn ah a umter.

Jesuh Thihnak

²⁸ Atu cu zeizong vialte kha a tling dih cang ti kha Jesuh nih cun a hngalh i Cathiang nih a rak chimmi tlinternak caah khan, “Ka ti a hal,” tiah a ti.

²⁹ Cuka ah cun mitsur zu thor an chiahnak umpu pakhat a um i zu thor chungah cun puanchia kha an vun hnim i feipar ah an ṭemh i Jesuh cu an hun tuh.

³⁰ Jesuh nih mitsur zu thor cu a vun dawp i, “Aa lim cang,” tiah a ti. Cun a lu a khun i a thi.

A Hnak Ah Fei In An Chunh

³¹ Cu ni cu Cawnningani a si. Judah mi nih cun an thahmi hna cu Sabbath ni i vailam tahnak i an i thlai ko kha an duh lo, cu Sabbath cu a thiang khunmi sabbath a si fawn. Cucaah Pilat sinah khan an va kal i hi hna hi an ke ruh kan den hna lai i vailam cungin kan ṭhumh hna lai, tiah a nawl an va hal.

³² Cucaah ralkap kha an va kal i amah sinah an thahmi hna lak i tonter deuhpa kha a ke ruh cu an vun den ve, cun pakhat pa zong an den ve.

³³ Sihmanhsehlaw Jesuh sin an phak tikah cun a rak thih cang kha an hmuh i cucaah a ke ruh kha an deng hna lo.

³⁴ Asinain ralkap pakhat nih a hnak kha fei in a hun chunh i thi le ti kha an chuak.

³⁵ (Hi thil a hmutu nih hi kong a chimnak cu nannih zong nih nan zumh khawh ve nakhnga caah a si. A chimmi cu biatak a si i biatak ka chim tiah a hngalh).

³⁶ Cathiang nih, “A ruh pakhat hmanh khiah a si lai lo,” tiah a rak timi tlinnak caah khan a si.

³⁷ Cun, “An chunhmi cu mi nih an zoh lai,” tiah a chimtu Cathiang bia zong a um fawn.

Jesuh An vui

³⁸ Cu hnuah cun Arimathea khuami Josef nih khan Jesuh ruak cu ka la kho hnga maw tiah Pilat kha a hal. (Josef cu Jesuh zultu a si ve, sihmanhsehlaw Judah upa pawl kha a ṭih hna caah a thlite lawngin a si). Pilat nih cun, na lak khawh, tiah a ti i cucaah cun a va kal i a va lak.

³⁹ Jesuh ton awkah zan i a rak kalmipa Nikodemu zong kha Josef sinah cun a kal i zihmui pawng za khat tluk, mura le aloes cawhmi kha aa ken.

⁴⁰ Cu hna pahnih nih cun Jesuh ruak cu an lak i zihmui he khan khiangrang puan in an zual; cucu Judah mi nih vui awk i ruak an timhtuahning a si.

⁴¹ Jesuh an thahnak hmun ah khan dum pakhat a um i cu dum chungah cun ahohmanh an vui rih hna lonak thlan thar pakhat a um.

⁴² Cu ni cu Judah mi hna Sabbath lai ni a si ca le thlan cu a naih zong a naih caah cuka ah cun Jesuh cu an chiah.