JOHAN 13 - Lai (Hakha) Common Language Bible 2006

Jesuh Nih A Zultu Ke A Ṭawl Hna

¹ Atu cu Lanhtak Puai lai ni kha a si cang. Jesuh nih hi vawlei hi kaltak i a Pa sin kal caan kha a phan cang tiah a hngalh. Hi vawlei cung i a ummi a mi kha a dawt zungzal hna i annih cu a dongh tiang hrimhrim in a dawt hna.

² Jesuh le a zultu hna cu zanriah an dum i Khuachia nih khan Simon Iskariot fapa Judas lung chungah khan Jesuh rawinak ding ruahnak cu a rak khumh cang.

³ Jesuh nih cun ka Pa nih zeizong vialte kha ka kut chungah a ka pek dih i ka Pa sinin a rami ka si i ka Pa sinah ka kir ṭhan lai ti kha a hngalh caah

⁴ rawl an ei lioah cun cabuai khan a tho i a puan aa chiah hnuah kut hnawhnak puan kha a lak i a tai ah aa menh i

⁵ khengpi chungah ti kha a thlet i a zultu kha an ke a ṭawl hna i kut hnawhnak puan in a hnawh hna.

⁶ Simon Peter sin kha a hei phak tikah, Peter nih cun, “Bawipa, ka ke maw na ka ṭawl lai?” tiah a rak ti.

⁷ Jesuh nih cun, “Ka tuahmi hi atu ahcun a sullam na hngal lo, sihmanhsehlaw hnu deuh ah na hngalh te lai,” tiah a leh.

⁸ Peter nih cun, “Ka ke cu na ka ṭawl bal hnga lo,” tiah a ti. Jesuh nih cun, “Na ke kan ṭawl lo ahcun, a ka zultu na si ti hnga lo pei,” tiah a leh.

⁹ Simon Peter nih cun, “Bawipa, a si ahcun, ka ke lawng ka ṭawl kun hlah, ka kut le ka lu zong ka ṭawl chih kun,” tiah a leh ve.

¹⁰ Jesuh nih cun, “Aa kholh cangmi cu a pumpi tein a thian cang caah a ke dah ti lo cu i ṭawl ṭhan a herh ti lo. Nan dihlak in nan thiang dih — pakhat bel,” tiah a ti.

¹¹ (Jesuh nih ahodah a ka leitu a si lai ti kha a rak hngalh diam cang caah, “Nan dihlak in nan thiang ko, pakhat dah ti lo cu,” tiah a rak tinak kha a si).

¹² An ke a ṭawl dih hna cun Jesuh nih a puan kha aa aih ṭhan i cabuai i a ṭhutnak ah khan a ṭhu ṭhan. “Atu i kan tuahpiakmi hna kha a sullam nan hngal maw?” tiah a hal hna.

¹³ “Nannih nih kei cu, Saya le Bawipa nan ka ti i cucu ka si taktak caah nan ka ti cu ahmaan ko.

¹⁴ Kei nan Saya le nan Bawipa a simi nih nan ke kan ṭawl hna ahcun nannih zong pakhat le pakhat nan ke nan i ṭawlpiak awk a si.

¹⁵ Nan caah i zohchun awk kan tuahpiak cang hna: nan ca i ka tuah bantuk khan nannih zong nih nan tuah ve awk a si.

¹⁶ Biatak kan chimh hna: sal cu a bawipa nakin a ngan deuh bal lo; fialmi zong a fialtu nakin a ngan deuh bal lo.

¹⁷ Atu cu hi biatak hi nan hngalh cang; nan tuah taktak ahcun zeitluk in dik nan i lawmh lai!

¹⁸ “Hi ka chimmi hi nan dihlak in kan ti duh hnanak a si lo; ka thimmi cu ka hngalh ko hna. Sihmanhsehlaw ‘Ka rawl a eimi kha ka ral ah a cang’ tiah cathiang nih a timi kha a tlin awk a herh.

¹⁹ Thil cu a hung si taktak tikah keimah hi amah cu ka si ko, ti kha nan zumh khawh nakhnga, hi thil hi a si hlanah ka rak in chimh chung hna.

²⁰ Biatak kan chimh hna: Rian ka fialmi tluninn a rak onhtu paoh nih keimah an ka onh a si, keimah tluninn a ka onhtu paoh nih a ka thlahtu tluninn a onh a si,” tiah a ti.

Judas Rawi Lai Kong A Chim

²¹ Cu bia a chim dih in Jesuh nih cun lung sivang ngaingai in, “Biatak kan chimh hna: nanmah lak i pakhat nih nan ka rawi lai,” tiah a ti hna.

²² A zultu hna cu pakhat le pakhat an i zoh i, ahodah a kan chimhnawhchan hnga tiah ar koin an um.

²³ Zultu lak i pakhat, Jesuh nih a dawtmi kha, Jesuh chang ah cun a ṭhu i

²⁴ Simon Peter nih khan a kut a zaoh i, “A chimmi hi ahodah a tihnawh duhchanmi kan si hnga, hei hal tuah,” tiah a ti.

²⁵ Cucaah Jesuh cu a zultu nih khan a hei naih deuh i, “Ahodah a si? Bawipa,” tiah a hal.

²⁶ Jesuh nih cun, “Mehhang ah changreu kha ka hnim lai i ka pekmipa cu a si lai,” tiah a leh. Changreu dar khat kha a lak i a hnim hnuah Simon Iskariot fapa Judas kha a pek.

²⁷ Judas nih aa lak cangka, Satan kha a chungah a lut. Jesuh nih cun amah cu a thawh i, “Na tuah ding cu khulrang in tuah ko kun,” tiah a ti.

²⁸ Jesuh nih cu bantukin a chimmi cu cabuai i a ṭhumi ahohmanh nih a sullam an hngal lo.

²⁹ Judas cu tangka zal tlaitu kha a si caah, a zultu a cheukhat nih cun, Jesuh nih khan Judas cu, puai ca i a herh ding changreu va cawk a fial rua, asiloah sifakmi kha zeilo va ṭhen hna a ti rua, tiah an ruah.

³⁰ Judas nih khan changreu cu aa lak i khulrang in a chuak. Cu caan cu zan a si.

Nawlbia Thar

³¹ Judas a chuah hnuah khan Jesuh nih, “Atu cu Mi Fapa hi sunparnak kha pek ka si cang; atu cu keimah thawngin Pathian nih khan sunparnak cu a hmuh cang.

³² Pathian nih keimah thawngin sunparnak cu a hmuh ahcun, Pathian zong nih Mi Fapa hi thangṭhatnak a ka pek ve lai i cucu rau lo tein a tuah lai.

³³ Ka fale hna, nan sinah sau ka um ti lai lo. Nan ka kawl lai, sihmanhsehlaw ‘Ka kalnak ah cun nan ra kho lai lo,’ tiah Judah mi ka chimh hna bang khan nannih zong kan chimh hna.

³⁴ Nawlbia thar kan pek hna: pakhat le pakhat i daw u. Keimah nih kan dawt hna bantuk hin pakhat le pakhat nan i dawt awk a si.

³⁵ Pakhat le pakhat nan zawn nan i ruah ahcun mi vialte nih, hi hna hi amah a zultu kha an si, tiah an in hngalh hna lai,” tiah a ti hna.

Peter Hlawt Lai A Chimchung

³⁶ Simon Peter nih, “Bawipa, khuazei ah dah na kal lai?” tiah a hal. Jesuh nih, “Ka kalnak dingah cun na ka zul kho lai lo, sihmanhsehlaw hnu deuh ah na ka zulh te lai,” tiah a leh.

³⁷ Peter nih, “Bawipa, zeicahdah atu ah cun kan zulh khawh lai lo? Na caah thih ka ngamh ko dahkaw?” tiah a ti.

³⁸ Jesuh nih cun, “Ka caah thih cu na ngamh ngai hnga maw? Biatak kan chimh: ar a khuan hlanah voi thum, amah cu ka hngal lo, na ka ti lai,” tiah a leh.