JOHAN 11 - Lai (Hakha) Common Language Bible 2006

Lazaruh Thihnak

¹ Bethani khua i a ummi Lazaruh cu a zaw. Bethani cu Mary le a u Martha an umnak khua kha a si.

² (Cu Mary cu Bawipa ke ah zihmui a toih i a sam in a hnawttu kha a si; a zawmi Lazaruh cu amah ṭa cu a si).

³ Cu unau pahnih hna nih cun Jesuh cu bia an hei cah i, “Bawipa, na dawtmi na hawi kha a zaw,” an ti.

⁴ Cu bia cu Jesuh nih a theih tikah, “Hi zawtnak hi a donghnak cu thihnak a si lai lo, sihmanhsehlaw Pathian sunparnak langhternak caah a si lai i hi thawng hin Pathian Fapa zong nih sunparnak a hmuh lai,” a ti.

⁵ Jesuh nih Martha le a naunu le Lazaruh kha a dawt hna.

⁶ Lazaruh a zaw ti thawng kha a thei nain a umnak hmun ah khan ni hnih a cam rih.

⁷ Cun a zultu kha a thawh hna i, “Judea peng ah kal ṭhan u sih,” tiah a ti hna.

⁸ A zultu hna nih cun, “Saya, kan hnulei te ah khan Judah mi nih lung in cheh an in duh, cuka ah cun maw kal naa timh ṭhan ko lai?” an ti.

⁹ Jesuh nih, “Ni khat chungah suimilam hleihnih a um a si lo maw? Cucaah chun ceu ah mi cu aa chawh ahcun a ril lo, zeicahtiah hi vawlei ceunak kha a hmuh.

¹⁰ Sihmanhsehlaw zan i aa chawh ahcun a ril, zeicahtiah mipa chungah khan ceunak a um lo,” tiah a ti hnuah a vun i thawh ṭhan i,

¹¹ ‘Kan hawi Lazaruh kha aa hngilh cang, sihmanhsehlaw ka va kal lai i ka va thawh lai,” a ti.

¹² A zultu pawl nih cun, “Aa hngilh ahcun a dam lai,” an ti.

¹³ Jesuh nih a chim duhmi tu cu Lazaruh kha a thi cang ti a si, annih nih cun hngilh sawhsawh ah an ruah.

¹⁴ Cucaah Jesuh nih cun fiang tein, “Lazaruh kha a thi;

¹⁵ sihmanhsehlaw a sin i ka rak um lo cu nanmah caah a ṭha, zeicahtiah nan zumh khawh deuh lai, amah sinah cun va kal u sih,” tiah a ti.

¹⁶ Faphir timi Thomas nih khan, “Amah sin i va thih ve awkah kannih zong kal ve u sih,” tiah a hawile kha a ti hna.

Jesuh Cu Thawhṭhannak le Nunnak A Si

¹⁷ Jesuh cu a va phak tikah Lazaruh cu an vuinak ni li a rak si cang.

¹⁸ Bethani cu Jerusalem in khan hnih tling lo deuh a si i

¹⁹ Judah mi mi tampi kha an ṭa a thih ca i anmah ṭhutpi awkah khan an ra.

²⁰ Jesuh a ra lio ti kha Martha nih a theih tikah lampi in va don awkah a kal; Mary tu cu inn ah khan a rak um.

²¹ Martha nih khan Jesuh cu, “Bawipa hika ah hin rak um law cu, ka ṭa hi a thi hnga lo.

²² Sihmanhsehlaw atu zongah hin na halmi paoh cu Pathian nih an pek lai ti kha ka hngalh,’ tiah a ti.

²³ “Na ṭa cu a tho ṭhan lai,” tiah Jesuh nih a ti.

²⁴ Martha nih cun, “Asi, a tho ṭhan lai ti cu ka hngalh ko, sihmanhsehlaw ni hmanung bik thawhṭhannak ah pei a si ko lai cu,” tiah a leh.

²⁵ Jesuh nih Martha cu, “Keimah hi thawhṭhannak le nunnak cu ka si. Keimah a ka zummi paoh cu a thih hmanh thi seh law a nung lai;

²⁶ Cun ahohmanh a nung i keimah kha a ka zummi cu an thi bal lai lo. Hihi na zum maw?” a ti.

²⁷ Martha nih, “Asi, ka zumh, Bawipa nangmah cu Pathian Fapa Messiah, vawlei cung i a rung ding cu na si ti kha ka zumh,” tiah a leh.

Jesuh A Ṭap

²⁸ Martha nih hi bia a chim dih khan a va kir i a nau Mary kha a thli tein a va auh. “Saya kha a ra cang i nangmah kha an hlam,” tiah a chimh.

²⁹ Cucu Mary nih a theih tikah a tho i amah ton awkah khan khulrang in a kal.

³⁰ (Jesuh cu khuachung kha a phan rih lo, Martha i a va donnak hmun ah khan a um ko).

³¹ Mary a ṭhutpitu Judah mi hna nih khan Mary cu a thawh i khulrang in a chuah ah khan an zulh; thlan i va ṭah awkah a kal rua, tiah an ruah.

³² Jesuh umnak kha Mary cu a va phan i Jesuh kha a hmuh tikah a kehram ah khan a bawk i, “Bawipa, hika ah hin rak um law cu, ka ṭa hi a thi hnga lo,” tiah a ti.

³³ Jesuh nih Mary a ṭah le a sin i a rami Judah mi hna an ṭah kha a hmuh hna i a hnarno a ṭam i a lung a hno.

³⁴ “Khuazei ah dah nan vui?” tiah a hal hna. “Ra law ra zoh tuah, Bawipa,” tiah an leh.

³⁵ Jesuh cu a ṭap.

³⁶ Cucaah Judah mi nih cun, “Zeitluk in dah a dawt kha zohhmanh u,” an ti.

³⁷ Sihmanhsehlaw a cheu nih, “Mitcaw hmanh a mit a deiter a si lo maw? Lazaruh hi thi loin a umter kho kun lo maw?” an ti.

Lazaruh A Thawhter

³⁸ Jesuh cu a hrum ruangmang ṭhan i thlan ah cun a va kal. Cu thlan cu lungkua a si caah a khar ah lungpher an khar.

³⁹ Jesuh nih, “Lungpher hi ṭhial tuah u,” tiah a ti hna. Mithi pa far Martha nih cun, “Bawipa, a nam tuk cang lai, kan vuinak ni li a si cang,” tiah a ti.

⁴⁰ Jesuh nih Martha cu, “Na zumh ahcun Pathian sunparnak na hmuh lai, tiah ka rak in ti lo maw?” tiah a ti.

⁴¹ Lungpher cu an thawn i Jesuh cu van a cau i, “Ka Pa, ka bia na ka theihpiak caah na cungah ka lung aa lawm.

⁴² Ka bia na ka theihpiak zungzal ti cu ka hngalh ko, sihmanhsehlaw hi ka chimnak cu hika i a ummi hna caah hin a si, annih nih keimah cu nangmah thlahmi ka si kha an ka zumh khawh nakhnga caah a si,” tiah a ti.

⁴³ Cu bia a chim dih in aw thangpi in a vun kawh i, “Lazaruh, ra chuak tuah,” tiah a ti.

⁴⁴ Mithi pa cu a kut le a ke ruak puanzual bu le a hmai khuh puan he khan a hung chuak. Jesuh nih, “Phoih u law kal seh,” tiah a ti hna.

Jesuh Rawinak Khua An Khang

⁴⁵ Mary ṭhutpi awkah a rami Judah mi tampi nih khan Jesuh tuahmi cu an hmuh i amah kha an zumh.

⁴⁶ Sihmanhsehlaw a cheu cu Farasi mi hna sinah khan an va kal ṭhan i Jesuh tuahmi kha an va chimh hna.

⁴⁷ Cucaah Farasi mi hna le tlangbawi upa pawl kha Khawngsil pawl he khan an i pum i, “Zeitindah kan tuah lai? Hi pa nih hin hmelchunhnak tampi a tuah ṭung.

⁴⁸ Hitihin kan thlahdorh ko ahcun mi vialte nih an zumh lai. Cun Rom pawl kha an ra lai i kan biakinn he kan miphun he an kan hloh dih lai,” an ti.

⁴⁹ Cun an lak i mi pakhat, a min Kaiafas a si i cu kum cu amah Tlangbawi Ngan a si kum a simi nih khan, “Zeihmanh nan hngal lo.

⁵⁰ Kan miphun hi a ningpi i hrawh nakin kan miphun ca i pakhat thih cu a ṭha deuh ti kha nan hngal lo maw?” tiah a ti hna.

⁵¹ A ngaingai ti ahcun, hi bia hi amah lungchuak in a chimmi a si lo; cu kum cu amah kha Tlangbawi Ngan a si bantukin, Jesuh cu Judah mi hna caah a thi lai ti kha a rak chimchung bia a si;

⁵² anmah Judah mi ca lawngah si loin Pathian fale aa ṭhekmi vialte hmunkhat i pumh dih awk zongah khan a thih cu a si lai tinak a rak chimchung kha a si.

⁵³ Cu ni thawk cun Judah upa hna nih khan Jesuh thahnak khua kha an khang lengmang.

⁵⁴ Cucaah Jesuh cu Judea peng ah khan langhngan in a tlawng ti lo, kha peng khan a chuak i thetse ram hril i a ummi khua Efraim an timi ah khan a kal i cuka ah cun a zultu hna he khan an um.

⁵⁵ Judah mi Lanhtak Puai kha a nai i khuate khan mi tampi cu, puai hlan i thianhnak rak tuah awkah, Jerusalem khua ah khan an kal.

⁵⁶ Jesuh kha an kawl i biakinn i an i pumh ah khan pakhat le pakhat kha, “Zeitindah na ruah? Puai ah hin a ra hnga maw?” tiah an i hal.

⁵⁷ Tlangbawi upa hna le Farasi mi hna nih khan, Jesuh umnak a hngalmi paoh nih nan kan chimh lai i kan tlaih lai, tiah an ti hna.