JEREMIAH 51 - Lai (Hakha) Common Language Bible 2006

¹ Hi bangin Bawipa nih a ti: Zohhmanh, Babilon khua le Khaldi ram i a ummi hna ralchanhtu dingah hrawktu thlichia ka thawhter lai,

² Cun Babilon ah facang vamtu ka thlah hna lai i Amah cu an vamh lai i a ram cu an hrawh lai; Harnak ni a tlun tikah a kenkip in an tuk lai.

³ Babilon ralkap hna cu an likuk a za sih le thir angki i aihnak caan kha pe hna hlah u; A tlangval hna kha pakhat hmanh ngan hna hlah u, A ralkap vialte kha that dih hna u.

⁴ Khaldi mi hna ram chungah khan thi hna seh, An khuapi chung lam ah khan ril liangluang ko hna seh.

⁵ Israel le Judah cu an Pathian, Ralkapbu Bawipa nih a ma hna lo, Sihmanhsehlaw Khaldi mi ram cu sualnak in a khat i Israel Mi Thiang nih a hlawt cang.

⁶ Babilon in zam tuah u, nan nunnak i khamh cio tuah u! Cu ti nan tuah lo ahcun, Hi caan hi Bawipa nih phu a hlam caan, lehrulhnak a pek caan a si caah Amah sualnak ruangah khan nan rawk ve sual lai.

⁷ Babilon cu Bawipa kut chung i sui hrai, vawlei vialte a ritter dih tu a si; Miphun hna nih a mitsur hang cu an din i cu nih cun a molhter dih hna.

⁸ Chikkhat ah Babilon cu a tlu i a kuai ko; Amah cu ṭah tuah u! A hma caah khan si va la tuah u, a hei dam phum ko hnga dah kaw.

⁹ Khika i a ummi ramdangmi hna nih, “Babilon cu bawmh awk kan i zuam, sihmanhsehlaw a tlai tuk cang. Cucaah ra u law kaltak u si law kan inn cio ah tlung u sih. Pathian nih a ṭhawnnak dihlak in Babilon cu dan a tat cang i a hrawh cikcek cang,” tiah an ti.

¹⁰ Bawipa nih, “Ka mi hna, au u law, ‘Kannih cu kan sual lo kha Bawipa nih nih fiang tein a langhter cang; Ra u law, Bawipa kan Pathian nih a tuahmi cu, Zion ah thanh u sih,’ ti u,” tiah a ti.

¹¹ Bawipa nih Babilon kha hrawh a timh caah Medes siangpahrang lungthin kha a cawlcanghter hna, A biakinn an hrawh ruangah hi bangin an cungah phu a hlam lai. Ral a tutu ralbawi hna nih, “Nan cantiang kha ta hna u! Nan phaw kha i bei hna u!

¹² Babilon kha tu cang u, tiah hmelchunhnak alan thlai cang u. Ralvengtu kha chap hna u, sentari kha chia hna u, lamhruang attu dingmi kha chia hna u!” an ti. Bawipa nih tuah a timhmi kha a tuah cang i Babilon mi hna cungah ka tuah lai tiah a timi kha a tuah cang.

¹³ Maw khuapi rum, ti tampi pawng i khua a sami, Na donghnak cu a phan cang, na nunnak hri cu a cat cang.

¹⁴ Bawipa hrimhrim nih, ‘Rel cawk lo a simi khaubawk zat in minung in ka rak in khahter, Sihmanhsehlaw na cungah teinak vahla thlorh a si cang lai,” tiah chiatser in a ti.

¹⁵ Pathian nih vawlei hi a ṭhawnnak in a ser, Vawlei hi a umnak hmun ah hin a fimnak in a umter; Van khi a thiamnak in a samh hna.

¹⁶ Nawl a pek hna bangin vancung i ti khi an awn, Vanhramdeng in minmei kha a thawhter. Ruah chungah cun nimtlau a lekter hna i A thilkhonnak chungin thli kha a chuahter hna.

¹⁷ Mi vialte hi mihrut, hngalhnak ngei lo an si dih, Sui sertu vialte hna hi an siasal sermi hna nih hin zumhawktlak lo an siter dih hna. Zeicahtiah an milem sermi hna cu hlennak men an si i an chungah thaw a um lo.

¹⁸ Annih cu zeihmanh man an ngei lo, nihchuak men a si, An biaceih ni a phak tik i a rawk men ding an si.

¹⁹ Jakob sertu Pathian cu hi hna bantukin a si lo, Zeicahtiah amah cu zeizong vialte sertu a si i Israel hi amah ca hrimhrim i aa kawhmi miphun a si, Amah a min cu Ralkapbu Bawipa a si.

²⁰ Bawipa nih Babilon cu, Nang cu ka sobul le ka ral hriam na si; Nangmah in miphun hna cu ka khuai cikcek hna, Nangmah in ram cu ka hrawh hna;

²¹ Nangmah in rangtum le a cung i aa citmi cu ka thah hna,

²² Nangmah in rangleng le rangleng aa cittu cu ka den hna; Nangmah in pa hna le nu hna cu ka den hna, Nangmah in tar le no cu ka den hna, Nangmah in tlangval le ngaknu cu ka den hna;

²³ Nangmah in tuukhal le a tuurun cu ka den hna, Nangmah in lei lettu le a rangtum hna cu ka den hna; Nangmah in ram ukbawi le ralbawi hna cu ka den hna, tiah a ti.

²⁴ Cu bantukin Babilon le Khaldi mi hna cu Na mit hmuh i Zion cung i ṭhat lonak an tuahmi ruangah Teirul ka cham hna lai, tiah Bawipa nih a ti.

²⁵ Maw Babilon, nang cu vawlei pumpi a hrawktu tlang bantuk na si, Nangmah cu kan ralchanh cang; Nangmah cu ka kut kan samhhnawh lai i Cangdonh lo na sermi ah cun kan hrilh lai i a kangmi tlang ah kan ser lai.

²⁶ Na lung cu pakhat hmanh innkil lung caah hman a si lai lo i pakhat hmanh innhram caah hman a si lai lo; Nangmah cu zungzal in ṭiaotakmi hmun na si lai, tiah Bawipa nih a ti.

²⁷ Ram chungah, ral tuk ah i thawh cang u, tinak hmelchunhnak alan kha thlai u, Miphun hna lakah muko kha tum tuah u, Miphun hna cu amah doh awkah tim hna u, Ararat, Minni le Ashkenaz ram hna cu amah doh awkah ko hna u; Amah dotu ah ralbawi ngan bik pakhat chia tuah, Khaubawk bupi zat in rang kha hunpi hna.

²⁸ Amah doh awkah miphun kha tim hna u, Medes siangpahrang le a ram uktu bawi hna le a upa hna le amah nih a ukmi vialte hna kha, amah doh awkah tim hna u.

²⁹ Babilon cu ṭiaotakmi hmun le mi um lonak hmun siter awkah Bawipa nih Babilon kong i aa tinhmi kha a tlin cang caah Vawlei cu a ther i aa hnin.

³⁰ Babilon ralkap hna nih raltuk an ngol cang, An ralhruang chungah khan a thuh in an i thup; An ralṭhatnak a dong cang i nu bantuk an si cang. A inn cu mei in an khangh hna i a kutka hrenhnak hna cu an kiak cang.

³¹ Babilon siangpahrang cu, Na khualipi kha a kam kip in luhhnawh a si cang ti chimh awkah Zualko pakhat hnu pakhat nih an tlikhnawh.

³² Tiva tannak hna kha ral nih an tlaih cang hna i Ralhau cu mei in an khangh hna i Ralkap cu zeiti um awk hngal loin an um, an ti.

³³ Ralkapbu Bawipa, Israel Pathian nih, Babilon cu facang cilnak phuhri bantuk a si, A rauh hlanah a cungah facang ṭuan caan a phan lai, tiah a ti.

³⁴ Zion i a ummi hna nih, Babilon siangpahrang Nebukhadnezzar nih a kan ei i car dihlak in a kan dawp, Um lawng bantukin a kan toh. Rulpi bangin a kan dolh, Kan sa thawthaw in a paw cu a khahter i a kan luak.

³⁵ Kan cung i zaang-ennak tuahmi le phuhlamnak tuahmi hi Babilon cungah tla seh, an ti lai. Jerusalem i a ummi hna nih, Kan thisen cu Khaldi ram i a ummi hna cungah tla seh, an ti lai.

³⁶ Cucaah hi bangin Bawipa nih a ti: Zohhmanh, na bia cu kan chimpiak lai i na phu kha kan hlampiak lai; A rili cu ka kaoter lai i a tiput hna cu ka carter hna lai;

³⁷ Cun Babilon cu a rawkmi thil pon, Cenghngia tlonnak hmun, tuksapur le cekcekhnawhmi hmun, A chung i mi a um lomi hmun ah a cang lai.

³⁸ Babilon mi hna cu chiandeih bangin an awn lai, Chiandeih fano bangin an ngur len lai.

³⁹ An zu dinnak cu zawtnak in ka donghter lai i An rit tuk ah an i ngerh len lai i an i lawng len lai. A dong lomi hngilhnak chungah khan an tla lai i An i hlau ti lai lo, tiah Bawipa nih a ti.

⁴⁰ Thahnak hmun i kalpimi tuufa hna le tuukawng le meheh tum bantukin ka kalpi hna lai.

⁴¹ Babilon vawlei cung dihlak nih an hlorhmi cu tlaih a si cang; Babilon cu miphun hna lakah tuksapur ah a cang cang!

⁴² Rili nih Babilon cu a phum cang, A awn hluahmahmi tilet hna nih cun an khuh cang.

⁴³ A khuapi hna cu hmun rocar ah an cang cang, Hmun car le thetse ram an si cang, Ahohmanh um lonak ram, minung fa ahohmanh nih an pal lomi ram a si cang.

⁴⁴ Babilon ah Bel cu dan ka tat lai i A dolhmi kha ka chakter ṭhan lai; Miphun hna cu amah sinah khan an ra tungmang ti lai lo, Babilon kulhnak vampang cu a cim cang;

⁴⁵ Amah chungin chuak tuah u, maw ka mi hna, Bawipa thinhunnak ṭihnung chung cun mi kip nih mahle nunnak kha i khamh cio hna seh!

⁴⁶ Ram chung i thawngpang nan theihmi kong ah nan lung dong hlah u law nan thin zong phang hlah u, Zeicahtiah kum khat ah thawngpang pakhat a um, cun a kum nolh ah thawngpang dang a um ṭhan, Ram chungah hnahnawhnak a um i uktu pakhat nih uktu dang pakhat kha a doh, tiin a um tawn.

⁴⁷ Cucaah zohhmanh, Babilon milem hna cu dan ka tat hna lai ni cu a ra lio, tiah Bawipa nih a ti; A ram cu a ning piin ningzahnak a phan lai, A mi an thahmi hna cu a chungah cun an ril liangluang ko lai.

⁴⁸ Van le vawlei le a chung i a ummi thil vialte hna nih, Babilon cu a tluk caah lunglawmhnak in hla an sa lai; Zeicahtiah chaklei in a rami ral hna nih, amah cu an tei lai, tiah Bawipa nih a ti.

⁴⁹ Vawleicung khuazakip ah Babilon nih mi kha a rak thah hna caah le Atu ah Israel mi tampi a thah hna caah Babilon cu a tlu hrimhrim lai.

⁵⁰ A vainam chungin a luatmi hna, kal u, dir hlah u; Lamhlapi ah um hmanh u law, Bawipa kha ka hngal camcin u, Jerusalem kha nan lungchung in ruat camcin u.

⁵¹ Nannih nih, Kannih cu ningzahnak kan phan, Ramdangmi nih biakinn chung hmunthiang kha an lak hna caah hmaichiatnak nih a kan khuh, nan ti.

⁵² Cucaah zohhmanh, a milem hna cung i biaceihnak ka tuah lai caan le A ram chung dihlak ah hliammi an hrum-ai len lai caan cu a ra lio, tiah Bawipa nih a ti.

⁵³ Babilon cu van tawng in sang in, A kulhnak vampang hna cu ahohmanh kai khawh loin ser si hna hmanh seh law, A cungah hrawktu ka thlah hna lai, tiah Bawipa nih a ti.

⁵⁴ Babilon khua chung i ṭah thawng cu ngai hmanh. Khaldi mi hna ram i rawknak nganpi thawng cu.

⁵⁵ Zeicahtiah Bawipa nih Babilon cu a ṭhio lio a si i Khuachung thawngpang cu a daihter lio a si. Ralkap nih cun a awnmi tilet bantukin an luhhnawh i au thawng he an tuk.

⁵⁶ Hrawktu cu Babilon hrimhrim ah khan an phan cang, A ralkap cu an tlaih hna i an likuk cu an khiahpiak hna. Bawipa, teirul cham hmangmi Pathian nih a lehrulh hrimhrim hna lai.

⁵⁷ A bawi hna le a mifim hna le a ram ukbawi hna le ralbawi hna le ralkap hna cu Ka ritter hna lai; A dong lomi hngilhnak chungah an tla lai i an i hlau ṭhan ti lai lo, tiah Siangpahrang, a min Ralkapbu Bawipa a simi nih a ti.

⁵⁸ Hi bangin Ralkapbu Bawipa nih Babilon kulhnak vampang a chah ngaingaimi cu vawlei ah chimh a si lai, A sangmi a kutka hna cu mei in khangh an si lai. Mi nih an ṭuanmi vialte cu pakpalawng ca men ah a si cang, Mi nih pakpalawng ca men ah an tha an i dit, tiah a ti.

⁵⁹ Mahseiah fapa Neriah i fapa Seraiah cu Zedekiah Siangpahrang a zohkhenhtu bawi a si. Judah siangpahrang Zedekiah a bawi kum li kum ah cun Seraiah cu Babilon ah a kal i Jeremiah nih bia a cah.

⁶⁰ Jeremiah nih Babilon cung i a tlung ding ṭhat lonak vialte cu cauk chungah a ṭial dih hnuah

⁶¹ Seraiah cu a thawh i, “Babilon nan phak tikah hika i aa ṭialmi bia vialte hi mi zapi theihhngan ah na va rel hrimhrim lai.

⁶² Cun thla na cam lai i, ‘Bawipa, hi hmun hi ka hrawh lai i a chungah zeihmanh an um lai lo, minung zong an um lai lo, saram zong an um lai lo i zungzal in a ṭiaomi hmun a si lai,’ tiah na ti, na ti lai.

⁶³ Cun hi cauk cu na rel dih in lung na ṭem chih lai i Zufrates tiva chungah na paih lai i

⁶⁴ ‘Hihi Babilon cung i a tlung ding cu a si — a pil lai i a tho ṭhan ti lai lo, zeicahtiah Bawipa nih a cungah ṭhat lonak a tlunter lai,’ na ti lai,” tiah a ti. Hi tiang hi Jeremiah bia cu a si.