JEREMIAH 5 - Lai (Hakha) Common Language Bible 2006

Jerusalem le Judah Sualnak

¹ Jerusalem khua chung lam a kenkip ah khan vaa chawk u law va zoh u law vaa chingchiah tuah u, Khi khua cu ka ngaihthiam khawh nakhnga Biading a kawl i biatak a tuahmi mi pakhat tal, A khua chung i hmun kau pipi ah khan va kawl tuah hna u law nan hmu kho hna hnga maw?

² Annih nih, “Bawipa a nun bangin,” an ti ko nain, Lih in chiat an ser.

³ Maw Bawipa, na mit nih biatak kha a kawl a si lo maw? Nangmah nih annih kha na tuk hna, sihmanhsehlaw an zei a poi lo, An lung kha na chunh hna, sihmanhsehlaw an i remh hlei lo. Annih nih an hmai cu ṭeklung nak hak deuh ah an ser i Ngaihchih kha an duh lo.

⁴ Khi tikah kei nih kaa thawh i, “Mah hna hi cu misifak mi hrut men an si, Bawipa lam kha a hngal lo i An Pathian phungbia kha a hngal lomi an si;

⁵ Cucaah mingan hna sinah ka kal lai i annih kha ka va chimh hna lai. Annih nih cun Bawipa lam kha an hngalh lai i An Pathian phungbia kha an hngalh lai,” ka ti. Sihmanhsehlaw annih zong nih Bawipa nawlbia kha an al i a bia kha ngaih duh loin an um ve.

⁶ Cucaah tu chung chiandeih nih a thah hna lai i Thetse ram chung cenghngia nih a hrawh hna lai. Pawlai nih an khua ah a chawhhnawh hna lai i A chuak ngammi paoh kha a thleh a bauh dih hna lai; Zeicahtiah an phungbuarnak kha a tam i An tlaunak kha rel cawk lo a si.

⁷ Zeitindah kan ngaihthiam khawh hna lai? Nan fale nih an ka hlawt i pathian a si lomi pathian kha chiatsernak ah an hman hna. Khim tein ka cawm hna, sihmanhsehlaw vacung pa duh kha an i thim deuh i Hlawhhlangnu inn ah khan an va kal lengmang.

⁸ Annih cu thau tein cenhmi rangṭum hor an si, An innpa le nupi lawng kha an awnhhnawh cio ko hna.

⁹ Hi thil hna ruangah hin, dantat loin maw ka um hna hnga? tiah Bawipa nih a ti; Cun hi bantuk miphun cungah hin phuhlam loin maw ka um hnga?

¹⁰ A mitsur ruang tlar hna lakah cun hung kal law hung hrawk hna, Sihmanhsehlaw donghnak taktak cu hung tuah hlah; An nge cu hung sam dih hna, Bawipa ta an si lo caah.

¹¹ Israel innchungkhar le Judah innchungkhar cu, An pahnih in ka cungah zumh awk tlak lo hrimhrim in an um, tiah Bawipa nih a ti.

¹² Bawipa a um kha an zum lo i, ‘Amah cu a um lo, Kan cungah ṭhat lonak zeihmanh a tlung lai lo; Vainam siseh, mangṭam siseh, kan tong lai lo.

¹³ Profet hna chimmi cu thlitu men an si lai, an chungah bia a um lo,’ an ti.

¹⁴ Cucaah Bawipa Ralkapbu Pathian nih a ka chimhmi bia cu hihi a si: “Hi bia hi an chim caah, ka bia cu na kaa chungah mei ah ka canter lai i Hi mi hna hi thing ah ka canter hna lai i, mei nih cun a kangh dih hna lai.”

¹⁵ Maw Israel innchungkhar, zohhmanh, Na cungah lamhlatpi in miphun phun khat ka ratpi lio, tiah Bawipa nih a ti. Cu miphun cu miphun ṭhawng ngai, hlan piin a rak ummi, An holh nan theih lomi miphun, an chimmi zong nan hngalh khawh lomi miphun a si.

¹⁶ An thalbawm cu a chin chinh lomi thlan bantuk a si, An dihlak in miṭhawng an si.

¹⁷ Nan kumvui mi le nan rawl kha an ei dih lai, Nan fanu le nan fapa hna kha an ei dih hna lai, Nan tuurun le nan cawrun kha an ei dih hna lai, Nan mitsur hang hna le nan theipi kung hna kha an hrawh dih hna lai, Nannih nih nan i bochanmi nan khua hna cu, kulhnak vampang ngei hmanh hna seh law, Vainam in an chimh dih hna lai.

¹⁸ Sihmanhsehlaw khi caan zong hmanh ah cun, nan donghnak ngaingai cu ka tuah lai lo, tiah Bawipa nih a ti.

¹⁹ Cun nannih nih, “Zeicahdah Bawipa kan Pathian nih hi thil vialte hna hi kan cungah a tuah?” tiah nan ti tikah, “Nannih nih nan ka hlawt i ramdang pathian kha nan ram chungah nan biak hna bang hin, nanmah ram a si lomi ram ah phun dangmi kha nan rianh hna lai,” tiah kan leh hna lai.

²⁰ Mah hihi Jakob innchungkhar kha va chim hna u, Judah ram chungah aupi tuah u:

²¹ Maw mihrut le ruahnak a ngei lomi hna, mah hihi thei tuah u, mit a ngei nain khua a hmu lomi hna, hna a ngei nain khua a thei lomi hna.

²² Nan ka ṭih lo maw? tiah Bawipa nih a ti; Ka hmaiah nan tha a ther lai lo maw? Rili caah thetse kha ramri ah a chia i A lonh khawh lo zungzalmi dawntu a caah a chiatu keimah hmaiah hin nan tha ther loin maw nan um ko lai? Rili tilet cu an tho ko lai, sihmanhsehlaw an lonh kho lo; Tilet cu an awn ko lai, sihmanhsehlaw an pah kho lo.

²³ Sihmanhsehlaw hi mi hna hi cu an lung a khong i doh duhnak lungthin an ngei, Ral thawh hmangmi an si i atu cu an luan diam cang.

²⁴ Annih nih an lungchung in, “Anmah caante cio ah fur ruah le ṭhal ruah kha a kan pe i Rawl ṭuannak caan pelh lo tein khuacaan a kan chiahpiaktu Bawipa kan Pathian kha ṭih u sih,” an ti lo.

²⁵ Sihmanhsehlaw nan ṭhat lonak nih thil umtuning cu a lettalam in a umter dih hna i Nan sualnak nih nan cung i tlunter a duhmi a zaangfahnak cu a donh hna.

²⁶ Zeicahtiah ka mi hna lakah miṭhalo kha an um i Va rap chiahtu nih rap a chiah bantukin rap kha an chiah, Sihmanhsehlaw an rap cu minung foihnak caah a si.

²⁷ Va in a khatmi bawm bantukin an inn cu hlennak in a khat. Cucaah annih cu an ngan i an rum,

²⁸ An thau i an tlornal. Ṭhat lonak tuahnak ah khan, a za cang ti an hngal lo, Ngakṭah nih khuaawng an ton khawh nakhnga dingah biading in bia an ceih lo i sifak rethei kha an ṭanpi hna lo.

²⁹ Hi thil hna ruangah hin dantat loin maw ka um hna hnga? Miphun hi bantuk cungah hin phuhlam loin maw ka um hnga? tiah Bawipa nih a ti.

³⁰ Hi ram chungah hin khuaruahhar a simi le thil ṭhalo ngai a simi a chuak:

³¹ Profet hna nih lih in bia an chim i tlangbawi hna zong nih anmah tining paoh kha an zulh ve; Ka mi hna nih cu ti i tuah cu an duhning a si ko, Sihmanhsehlaw a donghnak a phak tikah, zeitindik nan um te fang lai.