JEREMIAH 48 - Lai (Hakha) Common Language Bible 2006

Moab Kong

¹ Moab kong ah Ralkapbu Bawipa, Israel Pathian nih hi bangin a ti: “Aize, Nebo cu a lo i a ṭiao cang ai! Kiriathaim cu lak a si cang i a mual a pho cang ai! Misgab cu ningzahnak a phan i a hnabei a dong cang;

² Moab minthannak cu a um ti lo. Heshbon ah a cung ṭhat lonak ding kha khua an khan: ‘Ra u law hrawk dih u sih, miphun si ti hlah seh,’ an ti. Nannih Madmen i a ummi hna zong tuk nan si lai i nan mi hna cu vainam nih a dawi hna lai.

³ Horanaim in nganfah ainak thawng cu ngai hmanh: ‘Ṭiaonak le rawknak nganpi!’ an ti.

⁴ Moab cu a rawk cang, an au thawng cu Zoar tiang a thang.

⁵ Luhith i hung kainak ah khan mi cu ṭah buin an kai; Horanaim i vung ṭumnak ah khan. ‘Rawknak,’ ti thawng kha an theih.

⁶ ‘Zam u, zam u, nan nunnak caah zam u, thetse ram i laa lee bantukin zam tuah u,’ an ti.

⁷ Moab, nangmah nih na ralhau hna le na hriamnam hna kha naa bochan caah, nang zong lak na si ve lai; na pathian Khemosh cu a tlangbawi hna le a bawi hna he saltannak chungah a kal lai.

⁸ Hrawktu kha khua kip cungah a tlung lai i khua pakhat hmanh a luatmi a um lai lo; nelrawn cu a rawk lai i tlangcung hmunrawn zong hrawh a si lai, tiah Bawipa nih a ti.

⁹ “Moab caah thlanlung phun tuah u, zeicahtiah tunaite ah a rawk lai; a khua hna cu an rawk dih lai i Khika ah ahohmanh an um lai lo.”

¹⁰ Daithlang in Bawipa rian a ṭuanmi cu chiat ko seh! Thisen chuah awkah a nam a hmang duh lomi cu chiat ko seh!

¹¹ Mitsur hang a ne a tho bal lomi bantukin Moab hi hnahnawh lo tein a um zungzal ko; Um khat hnu um khat i tlennak kha a tong lo, Saltannak kha a tong lo; Cucaah a thawtnak kha a chungah a tang i a rim zong aa thleng lo.

¹² Cucaah ralca cu a thlutu dingah mi ka thlah hna lai caan kha a ra lio; An ralca cu an thluk hna lai i an um vialte kha an tlen hna lai i an den dih hna lai.

¹³ Cun Israel cu aa bochanmi a pathian Bethel nih a deuh bantuk khan Moab cu a pathian Khemosh nih a deuh ve lai, tiah Bawipa nih a ti.

¹⁴ “Moab mi hna, zeitindah nannih nih, Kannih cu ralṭha le ralkap ṭhawng kan si,” nan ti khawh?

¹⁵ Moab le a khua hna a hrawktu cu a ra cang, A tlangval hna lak i a ṭha bikbik cu an thi dih cang, tiah Ralkapbu Bawipa a min a simi Siangpahrang nih a ti.

¹⁶ Moab tluknak ding cu a phan cuahmah cang, A rawknak ding cu a nai ko cang.

¹⁷ Amah cu ṭah tuah u, nannih a pawngkam i a ummi vialte hna, amah minthannak a hngalmi hna; nannih nih, “Aize, ralbawi fung cu a kiak ai cang, upatnak fung cu a kiak ai!” ti u.

¹⁸ Nannih Dibon khuami hna, nan sunparnak hmun khan rung ṭum u law a carmi vawlei ah hin ṭhu tuah u; zeicahtiah Moab a hrawktu cu hika a phan cang i nan ralhau kha a hrawh dih cang hna.

¹⁹ Maw Aroer i a ummi hna, lam pawngin dir u law zoh tuah u. A zammipa le a zamminu kha rak hal hna hmanh u law, ‘Zeitindah a si?’ tiah rak ti hna hmanh u.

²⁰ “Moab cu a tlu cang; ai u law ṭap tuah u! ‘Moab cu a rawk cang,’ tiah Arnon tiva hrawn ah khan va thanh u,” an in ti hna lai.

²¹ Nelrawn khuapi hna cungah khan biaceihnak cu a tlung cang: Holon, Jahzah, Mefath.

²² Dibon, Nebo, Beth-diblathaim,

²³ Kiriathaim, Beth-gamul, Beth-meon,

²⁴ Kerioth le Bozrah khua cungah khan biaceihnak cu a tlung cang. Moab ram khua vialte cungah, a hla mi he a naimi he, biaceihnak a phan cang.

²⁵ Moab ki cu tan a si cang i a ban cu a kiak cang, tiah Bawipa nih a ti.

²⁶ “Moab kha, Bawipa cu zei i a rel lo caah ritter law a luak ah khan i bual seh law nihsawhnak hmu seh.

²⁷ Moab, Israel mi kha zeitindah nihchuak capo i na ser hna kha philh hlah. Mifir hna lakah tlaihchihmi si hna seh law cu bang, cuticun na tuah hna khah.

²⁸ Maw nannih Moab ram mi hna, Khuapi kha kaltak hna u law lungkua ah va um u, Lungkua kaa kam i bu a sami ṭhuro bantuk si ko u.

²⁹ Moab porhlawtnak kha kan theih cang, aa porhlaw taktak ko — Aa uahnak le aa porhlawtnak le a ruamkainak le a lungpuamnak kha kan theih.

³⁰ A mi zeirellonak kha ka hngalh, tiah Bawipa nih a ti; Aa uanthlarnak cu pakpalawng a si, a tuahnak cu pakpalawng a si.

³¹ Cucaah Moab cu ka ṭah lai, Moab ram chung i a ummi hna paohpaoh caah cun lungfak ngaiin ka ṭap lai; Kir-heres mi hna cu ka ṭah hna lai.

³² Jazer mi ka ṭah hna nak tam deuh in Sibmah mi kha ka ṭah hna lai. Maw Sibmah khuapi, nang cu mitsur ruang a nge Rili Thi tiang a zam i Jazer tiang a phanmi bantuk na si, Sihmanhsehlaw atu cu ṭhal caan i na theitlai hna le na mitsur thei hna cu hrawh an si cang.

³³ Thei tampi a tlai tawnmi Moab ram khan Lunglawmhnak le thanuamnak kha lak an si cang; Mitsur hang nennak hmun in mitsur hang cu ka donghter cang; Lawmhnak aw thawng he a neng tawnmi kha an um ti lo, Lawmhnak au thawng zeihmanh a leng ti lo.

³⁴ Heshbon khuami hna le Elealeh khuami hna cu an ai i an ai thawng cu Jahaz tiangin a thang; Zoar i a ummi hna nih an rak theih i Horonaim le Eglath-shelishiyah tiangin a thang. Nimrim tivate hmanh kha a car dih.

³⁵ Cun Moab ram chung i khuahrumbo ah raithawinak le an pathian hna sinah zihmui khanghnak kha ka donghter lai, tiah Bawipa nih a ti.

³⁶ An ngeihmi chawva vialte kha a rawk dih cang caah Moab le Kir-heresmi hna cu, mi nih mithi zunngaih hla thonglawi in an tum bantukin, ka lung nih a ṭah hna.

³⁷ Annih nih an dihlak in an lu an i kawngh i an khahmul an i meh i an kut an i at i an tai ah buri an i venh.

³⁸ Moab ram chung i inncung hna ah le an tual kau pipi hna ah cun, ṭahnak hla dah ti lo cu zeihmanh a um lo; zeicahtiah Moab cu ahohmanh nih zei i an rel lomi um bangin ka khuai cang, tiah Bawipa nih a ti.

³⁹ Moab cu a hnabei dongh in ningzak in a zam ko. Moab cu nihsawh awkah a cang cang i a pawngkam i a ummi vialte hna caah hnabeidonghnak ah a cang cang.

⁴⁰ Bawipa nih hi bangin a ti: Zohhmanh, muvanlai nih a thla aa samh i a vun zuanhnawh bantuk khin, Moab cu miphun pakhat nih a zuanhnawh lai.

⁴¹ Khuapi hna cu lak an si lai i ralhruang hna cu tlaih an si lai; Khi ni ah cun Moab ralkap hna lung cu Naunganfah a ing liomi nu lung bantukin a dong lai;

⁴² Khi tikah Moab cu hrawh a si lai i miphun a si ti lai lo, Zeicahtiah Bawipa kha zei ah a rel lo.

⁴³ Ṭihnung, khor le rap nih khan, Moab mi cu an orh ko hna, tiah Bawipa nih a ti.

⁴⁴ Ṭihnung chungin a zam khomi kha khor chungah a tla lai, Cun khor chungin a chuak khomi kha rap ah aa foih lai. Hi thil vialte hna hi dantatnak an hmuh kum ah Moab cungah ka tlunter lai, tiah Bawipa nih a ti.

⁴⁵ Heshbon thladem tangah, Bawmtu ngei lomi mizam hna cu an i din; Sihmanhsehlaw hmasa i Siangpahrang Sihon nih a rak ukmi Heshbon kha a kang cuahmah len ko. Raldoh a duhmi Moab mi hna ramri hna le tlang sang hna cu mei nih a kangh cang hna.

⁴⁶ Aize, maw Moab, na caah ngaihchia a va si dah! Khemosh pathian a biami hna cu an lo ai cang; Zeicahtiah na fapa hna cu saltannak chungah kalpi an si cang i Na fanu hna zong kalpi an si ve ai!

⁴⁷ Sihmanhsehlaw hmailei caan ah cun Moab cu, Vanṭhatnak kha ka pek ṭhan lai, tiah Bawipa nih a ti. Hi tiang hi Moab cung i biaceihnak cu a si.