JEREMIAH 46 - Lai (Hakha) Common Language Bible 2006

Izipt Cu Karkhemish Ah A Sung Lai

¹ Miphun hna kong ah profet Jeremiah sinah Bawipa bia a rami:

² Izipt kong: Judah siangpahrang Jehoiakim, Josiah fapa a bawi kum li kum ah, Babilon siangpahrang, Nebukhadnezzar nih Zufrates tiva kam i Karkhemish khua ah a teimi Izipt siangpahrang Faro Neko i a ralkapbu kong:

³ Phawpi le phawte he khan i tim u law ral doh awkah hmaiah fong u!

⁴ Rang kha danh hna u law i cit hna u, maw rangleng ralkap hna! Thir luchin chinh in umhmun khuar tuah u, Nan fei kha ta hna u law thir angki kha i hruk hna u!

⁵ Sihmanhsehlaw ka hmuhmi hi zeidah a si kun? An hnabei a dong i hnulei ah an i mer, An ralkap hna cu an ṭhuat chih len hna i rianrang in an zam; Hnulei i her hleng loin an le dih. Ṭihnung cu thlah a si cang, tiah Bawipa nih a ti.

⁶ Khulrangmi kha an luat kho maw? Ralkap zong kha an i khamh kho maw? Chaklei ah Zufrates tiva kamah an ril i an tlu.

⁷ Nail tiva lianh bantukin a lianmi hi ahodah a si? Tiva a ti a kai uahmahmi bantuk hi?

⁸ Izipt hi Nail tiva lianh in a lian, Tiva a ti a kai uahmahmi hna bantukin. Aa thawh i, “Ka lian lai, vawlei hi ka khuh dih lai, Khuapi hna le an chung i a ummi cu ka hrawh hna lai,” a ti.

⁹ Maw rangcung ralkap hna, nam u, Maw rangleng hna, nan biatak chuah u! Ralkap bu, hmaiah fong tuah u; Ethiopia mi hna le phaw aa putmi Put mi hna. Likuk hruai cia in aa tlaihmi Lidia mi hna, chuak tuah u.

¹⁰ Hi ni cu Bawipa, Ralkapbu Pathian ni a si, phuhlam ni a si, A ral hna cung i phu aa hlam ni cu a si. Vainam nih a ei hna lai i a duhnak a riam lai, An thi cu a ri lai. Zeicahtiah Bawipa, Ralkapbu Pathian nih chaklei ram ah Zufrates tiva kamah raithawinak kha a tuah.

¹¹ Gilead ah hung kal law damnak si hung i lak tuah, Maw Izipt fanu thiang. Nangmah nih si tampi na hneksak lengmang cang i pakpalawng an si dih; Na caah damnak zeihmanh a um lo.

¹² Miphun hna nih na aunak kha an theih i, Vawlei cu na kiaonak khan a khat. Ralkap cu pakhat le pakhat an i pah i an pahnih in hmun khat ah an ril.

¹³ Babilon siangpahrang Nebukhadnezzar nih Izipt ram tuk awkah a rat tikah, Bawipa nih profet Jeremiah a chimhmi bia:

¹⁴ “Izipt ah vung thanh u law Migdol ah aupi tuah u, Memfis le Tahpanhes ah cun thanh tuah u; ‘Dir law timh cia tein um tuah, Zeicahtiah vainam nih na pawngkam cu a ei lai,’ tiah chim u.

¹⁵ Zeicahdah Apis cu a zam? Zeicahdah nangmah an cawmtu pathian cu fek tein a dir lo? Bawipa nih lengah a nam cang.

¹⁶ Izipt mizapi hna cu an ril i an tlu, pakhat le pakhat an i pah dih; ‘Tho tuah, kanmah mi hna sinah khan, kan chuahnak ram ah khan kir u sih, Hremtu vainam hi zamtak u sih,’ tiah an i ti.

¹⁷ Izipt ram siangpahrang Faro cu, ‘Thawng lawng Lian, Caan Tlolh Ṭung,’ ti min kha pe u.

¹⁸ “Ka nun bangin,” tiah Siangpahrang, a min Ralkapbu Bawipa a simi nih cun a ti. Tlang hna lak i Tabor tlang a san cem bantuk le Karmel tlang cu rili cung sangpi ah aa hlorh bantukin Nangmah an dohtu dingmi a ṭhawnnak cu a si lai.

¹⁹ Saltang dingin nan thil i tim u, Maw Izipt ram mi hna! Zeicahtiah Memfis hi pakpalawng ah a cang lai i a chungah ahohmanh um loin a ṭiao lai.

²⁰ Izipt cu aa dawhmi cawla note a si, Sihmanhsehlaw chaklei in tlep nih a run ṭumhnawh cang.

²¹ A ram chung i man phalh in a ṭuanmi ralkap hna cu cenhmi cawfa bantuk an si; Sihmanhsehlaw annih zong an i let i an zam, an umhmun ah a dir ngammi ahohmanh an um lo. An ṭumchuk ni cu an cungah a phan cang, biaceih an si ni caan cu.

²² Izipt cu ral nih an fuh caah a zam i rul awnh in a awn; Mi nih thing an hau bantukin hreitlung he an tuk.

²³ A tupi cu an vah dih i aa porhlaw ti lo, tiah Bawipa nih a ti; Zeicahtiah an minung hna cu rel cawk lo an si i an ralkap hna cu khaubawk nakin an tam deuh.

²⁴ Izipt mi hna cu ningzahnak an phan, chaklei miphun kut chungah sal ah an tang cang.

²⁵ Thebes khua pathian Ammon cu dan ka tat lai, Izipt cu a pathian hna le a bawi hna he khan dan ka tat lai; Faro le amah aa bochanmi vialte hna kha dan ka tat hna lai.

²⁶ Annih cu anmah hrawh aa tim hrimhrimmi Babilon siangpahrang Nebukhadnezzar le a ralkap hna kut chungah ka chanh hna lai; Sihmanhsehlaw hmailei caan ah cun ram cu hlan bantukin mi an um ṭhan lai, tiah Ralkapbu Bawipa nih a ti.

²⁷ “Sihmanhsehlaw maw ka sal Jakob, ṭih hlah, Maw Israel, na hnabei dong hlah; Zeicahtiah ram hlapi khan him tein kan kirpi ṭhan hna lai i Nan tefa hna cu sal i an tannak ram khan ka kirpi ṭhan hna lai. Jakob cu thadam tein a um ṭhan lai i Nunnuam le thinphang lo tein khua a sa ṭhan lai.

²⁸ Bawipa nih, ṭih hlah, maw Jakob, ka sal, Zeicahtiah na sinah ka um ko. Nanmah kan dawi hnanak miphun hna cu an donghnak phakter hna hmanh ning law nannih cu kan donghter hna lai lo. Nan i tlak bantukin dan in tat hna hmanh ning law, A hloh cu kan hlo hna lai lo, tiah a ti.