JEREMIAH 22 - Lai (Hakha) Common Language Bible 2006

^1-2 Bawipa nih Judah siangpahrang inn ah khan kal a ka fial i, “Maw Judah siangpahrang, David bawiṭhutdan ah a ṭhumi nangmah le na bawi hna le na mi hna, hi kutka chungin a chuak a lutmi hna nih ngai tuah u, hihi Bawipa bia cu a si.

³ Thil nan tuah tikah dingte le hmaan tein tuah u, hremmi kha a hremtu kut chungin chuah u, ramdangmi le ngakṭah le nuhmei hna cungah ṭhat lonak siseh, zaang-ennak siseh, tuah hlah u.

⁴ Hi bia nan ngaih lawnglawng ah, David bawiṭhutdan cungah a ṭhumi siangpahrang hna, rangleng le rangtum i cit in an miṭhi hna le an lalang hna he hi inn kutka chungah a lutmi an um rih lai.

⁵ Sihmanhsehlaw hi bia hi zei ah nan rel hna lo ahcun, hi inn hi a rawk lai tiin keimah min chalh in chiat ka ser, tiah Bawipa nih a ti.

⁶ Zeicahtiah Judah siangpahrang inn kong ah Bawipa nih hi bangin a ti: Nangmah cu ka caah Gilead bantuk le Lebanon tlangpar bantukin i dawh hmanh law, Ahohmanh an um lonak hmun thetse ram ah kan canter lai.

⁷ Nangmah dotu dingah hriamnam he a um ṭhepṭhupmi bu, a rawl a ṭammi bu kha ka rak thlah lai. Na sidar thing ṭha bikbik hna cu an hau hna lai i Mei chungah an paih hna lai.

⁸ “Cun miphun tampi hna chung mi cu hi khua pawng hin an kal te lai i pakhat le pakhat cu, ‘Zeicahdah Bawipa nih hi bang hin hi khuapi cungah hin a tuah hnga?’ tiah an i ti te lai.

⁹ Cun an i lehnak cu, ‘Annih nih Bawipa an Pathian biakamnak kha an hlawt i pathian dang kha an biak hna i an rian an ṭuan hna caah a si,’ ti a si lai,” a ti.

¹⁰ Nannih Judah mi hna, Siangpahrang Josiah kha ṭah hlah u, A thih zun zong ngai hlah u; Sihmanhsehlaw a fapa Shallum tu kha lunghno ngaiin ṭah u, Zeicahtiah kir ti lo dingin an kalpi lai, A chuahnak ram kha zeitik hmanh ah a hmu ṭhan ti lai lo.

¹¹ Judah siangpahrang Shallum, Josiah fapa, a pa Josiah a chaangtu kong ah Bawipa nih, “Hika hmun hin a chuak cang i a ra kir ṭhan ti lai lo.

¹² An kalpinak ram ah khan a va thi lai i hi ram hi a hmu ṭhan ti lai lo,” tiah a ti.

Jehoiakim Kong I Jeremiah Bia

¹³ Dinlonak in a inn a sa i Hlennak in a inn cungdot khaan hna kha a ser i Man loin a rammi kha rian a ṭuanter i An ṭuan man nihlawh a pe duh lomi cu A cungah ningzahnak tlung ko seh.

¹⁴ ‘Keimah caah inn nganpi pakhat ka sak lai i Cungdot khaan kau pipi ka ser hna lai, Thlalangawng ka ser hna lai, Sidar thing in ka ṭamh lai i si sen ka thuh lai,’ a timi cu A cungah ningzahnak tlung ko seh.

¹⁵ Na sidar thing kha a ṭhat deuh ahcun cu nih cun siangpahrang na si kha a langhter maw? Na pa kha ruat hmanh: tlamtling tein ei awk din awk a ngeimi a si, dingte le aa ruang tein thil a timi a si, Cucaah a caah zeizong vialte a ṭha dih.

¹⁶ Mirethei le misifak cungah khan bia ding tein a ceih, Cu nih cun keimah a ka hngalh kha a langhter a si lo maw, tiah Bawipa nih a ti.

¹⁷ Sihmanhsehlaw nang cu miaknak dah ti lo ahcun mit na ngei lo, Zei dang ruat loin miaknak lawnglawng kha na ruat. A sual lomi thisen chuah khawh nakding le Hremnak le zaang-ennak tuah khawh nakding lawng kha naa ruah chih, tiah a ti.

¹⁸ Cucaah Judah siangpahrang Josiah fapa Jehoiakim kong ah Bawipa bia cu hi bangin a si: ‘Aize, ka nau, ka dawtmi ka nau,’ tiin siseh, ‘Aize, ka bawipa le ka siangpahrang,’ tiin siseh, a ṭahtu ahohmanh an um lai lo.

¹⁹ Laa vui bantukin amah cu vui a si lai i Jerusalem kutka lengah khan an hnuh lai i an hlonh lai.”

Jerusalem Kongah Jeremiah Bia

²⁰ Jerusalem khuami hna, Lebanon ah khin hung kal u law hung au tuah u, Bashan ah khin fak piin hung au tuah u; Abirim in fak piin au u, zeicahtiah nanmah sin i a ṭangmi vialte kha an sung cang.

²¹ Nan tlam a tlin lioah kan chawnh hna, Sihmanhsehlaw ngaih nan duh lo. Mah hihi nan tlanval lio in nan umtuning a si tawnmi a si; Zeitikhmanh ah ka bia nan ngai bal lo.

²² Nan hawile vialte cu thlitu nih a kalpi hna lai i Nanmah an dawtu vialte hna kha saltannak chungah an lut lai. Khi tikah nan ṭhat lonak ruangah ningzahnak le nautatnak nan in lai.

²³ Maw Lebanon i a ummi hna, Sidar thing lak i bu a sami hna, Nau nganfahnak bantuk nganfahnak nan cung i a phak tikah, Zeitluk in dik nan hei i lawngh len te lai!

Koniah Cungah Pathian Biaceihnak

²⁴ “Ka nun bangin,” tiah Bawipa nih a ti: Jehoiakim fapa Koniah, Judah Siangpahrang cu ka orhlei kut cung i min khenhnak kutdonghrolh na si ti lai lo. Koniah, nangmah cu kan phawi lai.

²⁵ Nangmah thah an duhmi, nangmah nih na ṭihmi hna Babilon siangpahrang Nebukhadnezzar le Khaldi mi hna kut chungah khan nangmah cu kaan chanh lai.

²⁶ Cun nangmah le an hringtu na nu cu nan chuahkehnak ram a si lomi ramdang ah kan hlonh vurmar hna lai i khika ah nan pahnih in nan thi lai.

²⁷ Nanmah ram, nan ngaih ngaingaimi ram ah khan nan kir ṭhan ti lai lo.

²⁸ Hi mipa Koniah hi mi nawl lawng in a ummi, zeihmanh i rel awk tlak lo le santlailo, ahohmanh i duh lomi thil a si maw? Amah le a fale hna cu an hngalh bal lomi ram ah hlonh vurmar le dawi an si hi zeidang ruangah a si hnga maw?

²⁹ Maw ram, ram, ram, Bawipa nih a chimmi cu ngai tuah.

³⁰ “Hi pa hi upatnak vialte chuh dihmi, Amah chan chung i a hlawhtling lo ding, David bawiṭhutdan cung i ṭhu ding siseh, Judah ram chung a uktu ding siseh, Tefa zeihmanh a thlau lomi, tiin ṭial tuah,” tiah Bawipa nih a ti.