JEREMIAH 17 - Lai (Hakha) Common Language Bible 2006

Judah Mi Lung Cungah Sualnak Aa Khenhchih

¹ Judah sualnak cu thir cafung in ṭial a si; an lungthin lungtlap cungah cun daimon zum in khenh a si i an biakṭheng ki hna ah cun anmah sual phawtu dingah suai an si.

² An biakṭheng le an tung thiang hna cu thingkung hring kip toiah tlang ram fing le tlang kip cungah cun an dir.

³ Nan ram chung dihlak i nan sualnak ruangah nan chawva cu hranchaw ah mi ka pek hna lai i nan rochaw cu man loin ka pek hna lai.

⁴ Kan pekmi hna nan ro kha nan sung lai. Nan hngalh lomi ram chungah nan ral kha nan rianh hna lai, zeicahtiah ka thinhunnak cu a alhmi mei a si i zungzal in a alh ko lai.

⁵ Bawipa nih hi bangin a ti: “Minung kha a bochan i minung kha aa hngatchanmi ah aa serh i Bawipa kha a mertakmi cu a cungah chiat tlung ko seh!

⁶ Amah cu thetse ram i a ummi burbuk bantuk a si, Ṭhat lonak a rat tikah zeihmanh a hmu lai lo. Ramlak i lungtamnak hmun ah cun khua a sa lai, ahohmanh an um khawh lonak cite ram ah cun, a um lai.

⁷ Sihmanhsehlaw keimah kha a ka bochan i a ka hngatchanmi cu thluachuahnak ka pek lai.

⁸ Amah cu tikam phunmi thingkung bantuk, tiva kam i hram a zammi bantuk a si. Vaupi ni a chuah tikah, ṭih awk zeihmanh a ngei lo, A hnah cu hring dildel in an um zungzal ko. Khuakhen kum a tlun tikah a zei a poi lo i a thei zong a dong lo.

⁹ Lungthin hi zeizong vialte nakin a zer bik, Aho nih dah minung lungthin hi a hngalh khawh lai? Damh khawh ti lo tiangin a zaw cang.

¹⁰ Bawipa nih minung ruahnak cu ka dah dih i an lungthin cu ka zet dih, An tuahnak nih a phut ningin le an ziaza ning cio in ka cham hna.

¹¹ Dinlonak in chawva a ngei luaimaimi cu Amah ti a si lomi ti a bu chungah a tlummi vaking bantuk a si, A chan ṭim hlanah a chawva cu a kaltak ko hna lai i A donghnak ah cun mihrut a si kha amah nih a langhter ko lai.

¹² Kan Biakinn cu sunparnak bawiṭhutdan bantuk a si. A hramthawk in tlangsang cungah a dirmi bantuk kha a si.

¹³ Maw Bawipa, nangmah cu Israel mi nih an i hngatchanmi na si, Nangmah an hlawtu vialte cu ningzahnak an phan lai; Bawipa, nangmah cu nunnak cerhti na si i Nangmah an hlawmi vialte cu leidip lak i min ṭialmi bangin an lo lai.

¹⁴ Ka damter law, Maw Bawipa, ṭha tein ka dam lai, Ka khamh law him tein ka um lai; Zeicahtiah ka thangṭhatmi cu nangmah na si.

¹⁵ Mi nih an ka thawh i, “Bawipa nih a kan hronak bia cu khuazei ah dah an si? An rat khawh ahcun atu ah ra hna ngat seh!” an ti.

¹⁶ Sihmanhsehlaw Maw Bawipa, an cungah ṭhat lonak tlunter kha kan fial bal lo i An ca i harnak caan tlun kha ka duhmi a si bal lo. Nangmah nih ka ka in a chuakmi bia vialte cu na hngalh dih, Ka chimmi bia vialte cu na hnatlakmi an si ko.

¹⁷ Ka caah ṭihnung si sawh hlah, Rawhralnak ni ah nangmah lawnglawng hi ka himnak na si.

¹⁸ A ka hremtu kha ningzahnak phakter ko hna, sihmanhsehlaw kei cu ka luatter ko, Annih cu therphang in umter ko hna, sihmanhsehlaw kei cu ka thin ka phanter hlah. An cungah rawhralnak ni kha tlunter law hrawk cikcek ko hna, a ti.

Sabbath Ni Thiang Tein Ulh Awk

¹⁹ Bawipa nih a ka thawh i, “Va kal law, Judah siangpahrang hna an luh an chuahnak Benjamin Kutka ah khan le Jerusalem i kutka dang vialte hna ah khan va dir tuah.

²⁰ Cun Bawipa bia cu thei tuah u, nannih Judah siangpahrang hna le Judah ram mi vialte le hi kutka in a lutmi Jerusalem khuami vialte hna, va ti.

²¹ Hitihin Bawipa nih a ti: Nannih nih sabbath ni ah thil nan phorh nakhnga lo le Jerusalem kutka hna zongah hin nan luhpi hna nakhnga lo, ṭha tein i ralring u.

²² Sabbath ni ah nan inn chungin thil zeihmanh nan chuahpi hna lai lo i rian zong nan ṭuan lai lo, sihmanhsehlaw nan pupa hna nawl ka pek hna bang khan sabbath ni cu thiang tein nan ulh lai.

²³ Asinain annih nih an ngai lo i zei zongah an rel lo, cawnpiaknak cu theih le ngaih an duh hrimhrim lo.

²⁴ Sihmanhsehlaw nannih cu ka bia nan ngaih i sabbath ni ah hi khuapi kutka hna chungah hin zei thil hmanh nan luhpi hna lo i khi ni cu thiang tein ul in rian nan ṭuan lo ahcun,

²⁵ hi khuapi kutka hna chungah hin David bawiṭhutdan ah a ṭhu dingmi siangpahrang hna kha an lut lai. Annih nih rangleng hna le rangtum hna kha an i cit hna lai i an ralbawi hna le Judah ram mi hna le Jerusalem khuami hna nih an cawngh hna lai: cun hi khua cu zungzal in a hmun lai, tiah Bawipa nih a ti.

²⁶ Cun Judah ram khua hna le Jerusalem khua kiangkap khua hna le Benjamin ram le Shefelah tlangram le Negeb in mi kha an ra lai i khangh thawinak le raithawinak le changvut thawinak le frankinsen zihmui kha an rak put hna lai i Bawipa inn ah lawmhnak thawinak kha an rak put fawn hna lai.

²⁷ Sihmanhsehlaw sabbath ni kha thiang tein ulh awk le sabbath ni ah thil phorh lo le Jerusalem kutka ah luhpi lo awk i ka bia kha nan ngaih lo ahcun, hi kutka hna cu mei in ka khangh hna lai; Jerusalem khua i siangpahrang inn hna kha a kangh hna lai i a mit lai lo,” tiah a ti.