HOSEA 14 - Lai (Hakha) Common Language Bible 2006

Ngaihchihnak le Ngaihthiamnak

¹ Maw Israel, Bawipa na Pathian sinah cun kir ṭhan tuah; Na sualnak nih khan an rilhter cang i an tlukter cang.

² Bawipa sinah cun kir law hihi na thlacamnak cu siter ko: “Kan sualnak vialte cu kan ngaithiam law kan thlacamnak cu kan cohlanpiak tuah, Cun kannih nih bia kan in kam cang bantukin kan in thangṭhat lai,” ti tuah.

³ Assiria nih a kan khamh kho bal lai lo, raltuknak rang nih a kan huppheng kho lai lo; Kannih nih kanmah kut in kan sermi siasal kha, “Nannih cu kan pathian nan si,” tiah kan ti ṭhan ti hna lai lo. Bawipa, bawmtu dang a ngei lomi cu na zaangfah tawn hna tiin, kan sualnak kha kan i phuang.

⁴ An zuanzamnak hi keimah nih ka damter lai i Ka lung chung taktak in ka dawt hna lai; An cung i ka thinhunnak cu a dam cang.

⁵ Israel caah cun dap bantuk ka si lai i lili pangpar bantukin a par lai. Phaizawng kung bantukin hram a thla lai i

⁶ a nge nono kha an corh hluahmah lai; Oliv thing bantukin aa dawh lai i Lebanon tlang bantukin a rim a hmui lai.

⁷ Israel cu ka thladem tangah khua a sa ṭhan lai i rawl kha tam piin an cin lai; Mitsur ruang bantukin an ṭhang hluahmah lai i Lebanon mitsur hang bantukin an min a thang lai.

⁸ Israel mi nih siasal cu zei ah dah an i tuah ti hna lai? Ka chim cang i ka fehter cang. Cucu hihi a si: Nanmah dornak an petu hna farkung cu keimah ka si; Thluachuahnak nan hmuhmi vialte a hram cu keimah ka si.

⁹ A fimmi nih cun hika i aa ṭialmi hi i hngalh hna seh law an lungchung in i cinken hna seh. Bawipa lam cu lamding an si i miding mi nih cun cu lam cu an zulh hna, sihmanhsehlaw misual mi cu an ril i an tlu.