FILEMON 1 - Lai (Hakha) Common Language Bible 2006

¹ Khrih Jesuh ruangah thong i a tlami keimah Paul le kan nau Timote nih, kan hawikom le kan rianṭuan hawi a simi Filemon le

² na inn ah aa pum tawnmi Khrihfabu le kan far le kan ralkap hawi Arkhipas kha ca kan in kuat hna.

³ Pathian kan Pa le Bawipa Jesuh Khrih nih vel le daihnak in pe ko hna seh.

Filemon Zumhnak le Dawtnak

⁴ Ka nau Filemon, thla ka cam fate nangmah kong kha ka chim i ka Pathian kha ka lawmh.

⁵ Hi kaa lawmhnak cu Pathian mi vialte na dawtnak hna le Bawipa Jesuh na zumhnak kong ka rak theih caah khan a si.

⁶ Khrih chung i kan nunnak ah thluachuahnak kan hmuhmi vialte hna hi, a zummi kan si ca i kan i hawikomhnak nih hin thuk deuh in a sullam kan hngalhter seh, ti hi ka thlacamnak a si tawn.

⁷ Ka dawtmi ka nau, dawtnak na ngeihmi nih ka lung a ka lawmhter ngaingai i lungṭhawnnak tampi a ka pek. Pathian mi vialte cu an lung na lawmhter dih ko hna.

Onesimas Caah Kan Nawl

⁸ Hi bantuk mi na si ti kha ka hngalh caah na tuah awk rian a si ti i ka ruahmi ah cun, ralṭha ngaiin kan fial ngam ko hnga i Khrih chung i na unau pakhat bantukin nawl zong kan pek ngam ko hnga,

⁹ asinain dawtnak lei in ka ruah tikah a nawl tu in kan nawl ahcun a ṭha deuh, ka ti. Atu ah keimah tarpa, Khrih Jesuh ruang i thong i a tlami nih nawl kan duhmi cu,

¹⁰ thonginn chungah ka fa i a cangmi Onesimas kong hi a si.

¹¹ Hlanah cun na caah santlaihnak zeihmanh a rak ngei taktak lo, sihmanhsehlaw atu cu nangmah ca he keimah ca he santlaimi a si cang.

¹² Amah cu na sinah ka rak in kuat ṭhan i hi kan kuat ah hin ka lung kha kan kuat chih.

¹³ Thawngṭha ruang i thong chung i ka um lioah hin, nangmah can i a ka bawmtu dingah amah hi ka sinah um seh ti cu ka duh ko.

¹⁴ Sihmanhsehlaw hnekchom in i bawmhter cu kan duh lo, nangmah nih nangmah lungtho tein na ka bawmh kha ka duh deuh. Cucaah cun nangmah hnatlak lomi cu zeihmanh ka tuah lai lo.

¹⁵ Onesimas he caan tlawmpal nan i ṭhen hi zungzal in hmunkhat i nan um ṭi nakhnga ding ca tu ah a rak si deuh ko lai.

¹⁶ Atu cu sal menmen a si ti lo, sal nak let tampi ṭha, Khrihfa chung i dawtmi unau a si cang. Kei nih cun ka dawt hringhran, nang nih zeitluk in dik na dawt chinchin lai — na caah sal lawng si ti loin Bawipa chung i unau a si cang.

¹⁷ Cucaah kei cu na hawi i na ka ruah a si ahcun, keimah na ka lawmh lai bantuk tein amah hi rak lawm law ka duh.

¹⁸ Na cungah ṭhat lonak a tuahmi a um le lei an bat a si ahcun, keimah cham awkah rak chia.

¹⁹ Ka kut hrimhrim in Keimah Paul nih kan cham lai, tiin ka ṭial hih. (Na nunnak hrimhrim na ka bat kha cu, kan chimh ṭhan awk a herh lem lo.)

²⁰ Cucaah ka nau, Bawipa ruangah, hi thilte hi cu rak ka tuahpiak ko; Khrih chung i unau pakhat bantukin ka lung ka lawmhter ko.

²¹ Hi ca ka ṭial pah ah hin, kan fialmi cu na tuah lai, ti cu ka hngalh ko, kan fialmi nak tam deuh hmanh na tuah lai ti kha ka hngalh ko.

²² Cun inn zong rak ka damhpiak law ka duh hnga. Pathian nih nan thlacamnak kha an leh ṭheo hna lai i nanmah sinah a ka ratter ṭhan lai ti kha ka zumh.

Donghnak Bia

²³ Khrih Jesuh ruangah keimah sin i thong a tla vemi Epafras nih nan kut an tlaih hna.

²⁴ Cun ka rianṭuan hawi Marka le Aristarkas le Demas le Luka nih nan kut an in tlaih ve hna.

²⁵ Bawipa Jesuh Khrih vel cu nan dihlak sinah um ko seh.