EZEKIEL 6 - Lai (Hakha) Common Language Bible 2006

Bawipa Nih Siasal A Duh Lo

¹ Mah hihi Bawipa nih ka sin i a chimmi bia a si:

² A ka thawh i, “Mipa, Israel ram tlanglei khi hei zoh law bia chimhnawh hna:

³ ‘Israel ram tlang hna, Bawipa Pathian bia hi ngai tuah u,’ ti hna. Mah hihi tlang hna sin le fing hna sin le nelrawn hna sin le horkuang hna sin i ka chim duhmi bia cu an si; nan cungah vainam kha ka tlunter lai i nan khuahrumbo vialte kha ka hrawh dih hna lai.

⁴ Nan biakṭheng hna cu an rawk lai i nan zihmui khanghnak biakṭheng hna cu an kuai dih lai i nan mi hna lak i thahmi hna cu nan siasal hna hmaiah khan ka hlonh hna lai.

⁵ Israel mi hna ruak cu an siasal hna hmaiah khan ka hlonh hna lai i nan ruh cu nan biakṭheng hna pawngah khan ka ṭhek hna lai.

⁶ Nan umnak hmun kip ah khan thisen aa nehmi biakṭheng cu an ṭhing lai i nan khuahrumbo cu an rawk lai. Nan biakṭheng cu an rawk an ṭhing dih lai i nan siasal hna cu an kek an kuai dih lai i santlailo an si lai, nan zihmui khanghnak biakṭheng hna cu chimh an si lai i thil nan tuahmi vialte kha hloh dih an si lai;

⁷ thahmi hna kha nan pawng i an rilh liangluang tikah Bawipa ka si kha nan ka hngalh lai.

⁸ Sihmanhsehlaw annih cu an thih tikah, miphun hna lakah khan vainam thahnak in a luatmi tlawmpal cu kan zuahpiak hna lai.

⁹ Nannih cu ram dang i ṭhek nan si tikah, hi ka zuahmi hna, miphun dang hna sin i sal i a tangmi hna nih hin, an lungthin cu zeihmanh ruat loin ka sinin an i mer i an mit cu siasal duh ah a pingah an kal ruangah, zeitluk in dah ka lungthin a fah kha an hngalh lai. Khi tikah ṭhat lonak an tuahmi vialte le fihnung an tuahmi vialte ruangah khan anmah le anmah an i fih lai.

¹⁰ Cucaah annih nih keimah cu Bawipa ka si kha an hngalh lai i an cungah ṭhat lonak ka tlunter lai ka ti tikah khan a ṭhih in a kan ṭhih men lo, ti kha an hngalh lai,” tiah a ti.

¹¹ Mah hihi Bawipa Pathian bia a si: “Nan zapei kha beng u law nan ke kha teng hna u, fihnung nan sinak kha ṭah u, maw Israel mi hna.

¹² Mi cu vainam le mangṭam le rai in an thi lai. A hlatnak hmun ah rai in an thi lai, inn ah vainam in an thi lai, cun a tangmi si hna seh, a luatmi si hna seh, mangṭam in an thi lai i cuticun a donghnak ah ka thinhunnak cu a dihnak a phan ve lai.

¹³ Ral kut in a thimi an mi hna cu an biakṭheng pawng i an siasal hna lakah siseh, fing kip le tlang kip cungah siseh, a hnah borh a ṭhami thingkung toi kip le kuhthing toi kip ah siseh, an siasal hna cu rimthaw an pekchanh hna nak hmun paoh ah, an rilh liangluang tikah, keimah cu Bawipa ka si kha nan hngalh lai.

¹⁴ Cuticun an cungah khan ka kut ka samh lai i an khuasaknak hmun kip ah khan ram cu ramcar ah ka canter lai i Riblah thetse ram nak hmanh in an car deuh lai. Cun annih nih Bawipa ka si kha an hngalh lai,” tiah a ti.