EZEKIEL 29 - Lai (Hakha) Common Language Bible 2006

Izipt Kong Chimchungnak

¹ Sal kan tan kum hra kum, thla hra thla, ni hleihnih ni ah, Bawipa nih ka sinah a chimmi bia cu hihi an si:

² A ka thawh i, “Mipa, Izipt siangpahrang Faro lei khi zoh law amah cung le a ram dihlak cungah a tlung ding hi chim tuah.

³ Hihi Bawipa Pathian bia an si tiah chim: Izipt siangpahrang Faro, Nail tiva chung i aa bualmi tisartlam, Nangmah cu kan doh. Naa thawh i, ‘Ka Nail tiva cu keimah ta a si, a sertu kha keimah ka si,’ na ti.

⁴ Na kha le na kha karah sio ka chiah lai i Na phokphawher ah an i benh lai. Tiva chung khan kan sio vurmar lai i Na phokphawher ah nga i benh lulhmalh in kan hnuh lai.

⁵ Na tiva hna chung nga hna he cun thetse ram ah khan kan thlak hna lai; Ahohmanh chartu um lo le vuitu um loin vawlei ro ah khan na tla lai. Nangmah cu saram rawl le va rawl caah kan ser lai.

⁶ Cucaah Izipt ram i a ummi vialte nih Bawipa ka si kha an hngalh lai, Zeicahtiah Israel mi na bawmh hnanak cu phaikung nakin a ṭha hlei lo i

⁷ An in tlaih tikah an kut chungah na pertak hna i an zaktang ah khan na chunh hna; An in hngauh tikah na kiahtak hna i an kutke kha an ther dih.

⁸ Cucaah hihi Bawipa Pathian bia cu an si: Na cungah mi he saram he thah awkah vainam ka tlunter lai.

⁹ Nangmah nih naa thawh i, ‘Nail tiva cu keimah ta a si, a sertu cu keimah ka si,’ na ti caah, Izipt ram cu ram pakpalawng ah a cang lai i annih nih Bawipa ka si kha an hngalh lai.

¹⁰ Cucaah nangmah le na Nail tiva cu kan ralchanh hna i Izipt cu chuahtakmi ram, khuakheng nih a hrawhmi ram ah, Migdol in Sai-en tiang, cun Kush ramri tiang hrimhrim in ka ser lai.

¹¹ Mi ke zeihmanh nih a pal lai lo i saram zeihmanh nih an pal fawn lai lo; a chungah mi um loin kum sawm li chung a um lai.

¹² Izipt ram cu chuahtakmi ramlak i ramking bik ah ka ser lai; a khua hna cu a rawkmi khua hna lakah kum sawm li chung an ṭiaotakmi khua an si lai. Cun Izipt mi cu miphun hna lakah ka ṭhek hna lai i ram kip ah ka ṭhio hna lai,” a ka ti.

¹³ Mah hihi Bawipa Pathian bia cu an si: Kum sawm li a donghnak ah Izipt mi hna cu an i ṭheknak miphun hna sin khan ka pumh hna lai.

¹⁴ Izipt cu a vanṭhatnak kha ka pek ṭhan lai i an chuahkehnak ram Pathros ah khan ka kirpi ṭhan lai, cuka ah cun pennak hmete an si lai.

¹⁵ Pennak lakah pennak santlailo bik ah a cang lai i miphun dang hna cungah khan aa hlorh bal ti lai lo, zeicahtiah annih cu tlawm tuk ah ka ser hna lai caah miphun dang kha an uk kho ti hna lai lo.

¹⁶ Israel mi hna caah i bochan awk tlak an si ti lai lo; sihmanhsehlaw i bochan awkah an rak merhnawh hna ruang i an sualnak a langhtertu a si lai. Cun Bawipa Pathian ka si kha an hngalh lai, a ti.

¹⁷ Kum kul le kum sarih kum, thla khatnak thla ni khat ni i Bawipa nih ka sinah a chimmi bia cu hihi an si:

¹⁸ A ka thawh i, “Mipa, Babilon siangpahrang Nebukhadnezzar nih Tair dohnak ah a ralkap hna cu raltuknak hmun ah saupi a chiah hna i cucaah an lu zong a kolh dih i an liang zong a kok dih. Sihmanhsehlaw amah nih siseh, a ralkap hna nih si hna seh, cu ti i Tair saupi an dohnak thawng in zeihmanh a miak an hmuhmi a um lo.

¹⁹ Cucaah hihi Bawipa Pathian bia cu a si: Izipt ram cu Babilon siangpahrang Nebukhadnezzar ka pek lai. A chaw vialte kha a kalpi dih lai i a hrawh lai i a ramh lai i cu cun a ralkap cu lahkhah a pek hna lai.

²⁰ Tair a doh man ah khan Izipt ram cu ka pek lai, zeicahtiah amah nih ka rian kha a ṭuan. Mah hihi Bawipa Pathian bia hrimhrim a si.

²¹ “Khi tikah Israel nih nge no a corh ṭhan lai i annih lak i biachim khawhnak kha ka pek ṭhan lai i cun annih nih Bawipa ka si kha an hngalh lai,” a ti.