EXODUS 13 - Lai (Hakha) Common Language Bible 2006

Fater Pathian Sin Pekchanhnak

¹ Bawipa nih Moses cu a thawh i,

² “Fater, pa vialte cu keimah sinah nan ka pekchanh hna lai. Israel mi fater paohpaoh cu, minung an si ah, saram an si ah, keimah ta an si,” a ti.

Thilnu Phulh Lo Changreu Puai

³ Mi zapi kha Moses nih cun a thawh hna i, “Sal ah nan cannak inn, Izipt ram in nan chuah ni hi philh hrimhrim hlah u, zeicahtiah hi ni ah hin Bawipa nih ṭhawnnak a liannganmi he an chuahpi hna. Thilnu phulhmi changreu nan ei hrimhrim lai lo.

⁴ Abib thla chung nihin ni ah hin Izipt ram in nan chuak lai.

⁵ Kanaan mi le Hit mi le Amor mi le Hiv mi le Jabus mi an umnak ram kha nanmah pek awkah Bawipa nih nan pupa cu fek tein bia a rak kamh hna. Cu ram cu ram rum le ram ṭha a si. Cu ram chung an phakpi hna tikah hi thla ṭhiamṭhiam ah hin hi phunglam hi nan ulh lai.

⁶ Ni sarih chung thilnu phulh lo changreu nan ei lai i a ni sarihnak ni ah Bawipa caah puai nan tuah lai.

⁷ Thilnu telh lo changreu kha ni sarih chung nan ei lai; thilnu phulhmi changreu siseh, thilnu siseh, nan ram chungah nan umter hrimhrim lai lo.

⁸ Cu ni ah cun nan fapa kha nan thawh hna lai i, ‘Hi ti kan tuahmi vialte hi Izipt ram in kan rak chuah tikah khan Bawipa nih kan ca i a tuahmi philh lonak caah a si,’ tiah nan chimh hna lai.

⁹ Bawipa nih ṭhawnnak nganpi in Izipt ram in an chuahpi hna caah Bawipa phungbia cu nan chim zungzal awk a si lai, cu bantukin nan chim zungzal khawh nakhnga hi phunglam cu nan ban i nan i khihmi hmelchunhnak le nan cal i nan i ṭem chihmi ruah nolhtertu bantukin, thil an theih ṭhantertu hna a si lai.

¹⁰ Cucaah hi phung cu amahle a caan te ah khan kum khat ah voi khat lengmang nan tuah lai,” a ti hna.

Fater

¹¹ “Bawipa nih nan pupa hna le nanmah kha fek tein a rak in kamhmi hna ram ah khan an luhpi hna lai. Cu ram cu an pek hna tikah.

¹² Kha nan hrin hmasa bik fapa paohpaoh kha nan pek lai; nan saṭil nih a hrin hmasa bik fa a pa paohpaoh cu Bawipa ta an si.

¹³ Asinain la fa hmasa bik cu tuufa in nan tlanh hna lai. Tlanh nan duh lo ahcun a hngawng nan khiah hna lai. Cun nan fater pa paohpaoh cu nan tlanh hna lai.

^14-15 Hmailei ah nan fale nih, ‘Hihi a sullam zeidah a si?’ tiah an in hal hna ahcun, ‘Sal i kan cannak inn, Izipt ram chung i fater vialte kha, minung he saram he, Bawipa nih a rak thah dih hna. Cu ruangah cun fater paohpaoh Bawipa sinah raithawinak i kan pekchanh hna hi a si i kan fater hna kan tlanh hna hi a si,’ tiah nan leh hna lai.

¹⁶ Bawipa nih Izipt ram in ṭhawnnak lianngan in a kan chuahpi caah hi phunglam cu nan caah, nan ban i nan i khihmi hmelchunhnak le nan cal i nan i ṭem chihmi hmelchunhnak bantukin, thil an hngalhter ṭhantu hna a si lai,” a ti.

Minmei Tom le Mei Tom

¹⁷ An tuk awk a herhmi ral kha an hmuh hna tikah an lung i let in maw Izipt ram ah khan kir ṭhan hna lai, ti kha Pathian nih a phan caah, Faro nih Israel mi cu a kalter hna tikah khan, rili kam zulh in Filistia ram ah a hung kalmi lam kha a tawi bik a si ko nain, cu lam cu Pathian nih cun a zulhter hna lo.

¹⁸ Phihlik kheng tlang vel in a velter deuh hna i thetse ram in Rili Sen lei tu ah khan a kalpi hna. Israel mi cu ral hriamnam tling tein an ngei.

¹⁹ Josef nih Israel mi cu fek tein bia a kamter hna bantuk khan, Moses nih Josef ruh cu a kalpi. Josef nih khan zeitindah a rak ti tiah, “Pathian nih an bawmh hrimhrim hna lai; cu tikah ka ruh cu hika hmun hin nan sinah nan i kalpi lai,” a rak ti.

²⁰ Sukkoth khua cun an i thawh i thetse ram a ramri i a ummi Etham khua ah khan an riak.

²¹ Chun ah Bawipa cu an hmaiah minmei tom in annih kha lam hmuhsak awkah a kal i zan ah an hmaiah mei tom in annih kha ceunak pek awkah a kal, cucaah cun zan zongah chun zongah an kal kho.

²² Minmei tom cu Israel mi hna hmaiah khan chun ah a um zungzal i mei tom cu zan ah a um zungzal ve.