EXODUS 12 - Lai (Hakha) Common Language Bible 2006

Lanhtak Puai

¹ Izipt ram ah khan Bawipa nih Moses le Aaron cu a chawnh hna i,

² “Atu thla hi nan caah kum khat chung thla hmasa bik a si lai.

³ Atu thla a ni hra ni ah hin, pa pakhat nih mahle innchungkhar ca cio ah tuufa pakhat maw mehehfa pakhat dik, nan i thim lai.

⁴ Cun innchungkhar pakhatkhat cu, kha sa kha a pum in a ei khotu dingah mi nan tlawm tuk ahcun nan innpa nanmah an changtu hna he khan, a minung zat tuak in, cu sa cu nan i hrawm lai. Pakhat nih zeizat dah ei khawh a si ti tuak in cu sa a ei dingmi cu, cu zat cu si u sih ti khan nan khaan lai.

⁵ Cu sa cu a bei lomi, hma zeihmanh a ngei lomi, kum khat a timi a si lai; tuu zong a si ah, meheh zong a si ah, a zeipaoh kha nan i thim khawh lai.

⁶ Atu thla ni hleili ni tiang hi, nan i chiah hna lai i cu ni zanlei ah cun Israel mi vialte nih cu sa cu nan thah cio hna lai.

⁷ Cun an thi kha tlawmpal in nan lak lai i nan innka tung le nan innkaba ah khan nan nalh hna lai i inn chungah khan sa cu nan ei lai.

⁸ Cu zan ah cun sa cu a em in nan em lai i thilnu phulh lo changreu le ankha he nan ei lai.

⁹ A hring in nan ei hna lai lo, chumh zongin nan ei hna lai lo, a pumning in nan em hna lai, an lu he an ke he an chungril he nan em hna lai i cuticun nan ei hna lai.

¹⁰ An zeihmanh kha zinglei tiang nan tanter hna lai lo, a tangmi a um ahcun mei in nan khangh hrimhrim hna lai.

¹¹ Cun nan eining cu hi ti hin a si lai: nan puan kha nan i sawihnawt lai i nan kedan kha nan i danh lai i nan ṭhiangṭhunh kha nan i put lai, cuticun khulrang in nan ei lai. Cu puai cu Bawipa ca i Lanhtak Puai a si.

¹² Cu zan ah cun Izipt ram ah khan kaa chawk lai i fater vialte kha minung si hna seh, saram si hna seh, ka thah dih hna lai. Izipt ram pathian vialte kha dan ka tat dih hna lai; keimah hi Bawipa cu ka si.

¹³ Thisen hi nannih nan umnak inn hmelchunhnak a si lai. Thisen kha ka hmuh tikah nannih cu kan lanhtak hna lai i Izipt ram ka hrem tikah dantatnak nih a chuahtermi rawhralnak cu nan cungah a tlung lai lo.

¹⁴ Hi ni hi nan caah philh khawh lomi ni a si lai; Bawipa biaknak puai ah nan hman lai. A hmunmi puai ah nan ser lai i chan khat hnu chan khat in nan hman zungzal lai.

¹⁵ “ ‘Ni sarih chung thilnu phulh lo changreu kha nan ei lai. A hmasa bik ni ah, nan inn chung khan thilnu kha nan thianh dih hna lai, a ni hmasa bik ni in a ni sarihnak ni tiang thilnu phulhmi changreu a eimi cu Israel mi chung khan thlei an si lai.

¹⁶ A ni hmasa bik ni le a ni sarihnak ni ah khan biaknak pumhnak nan ngei lai. Cu ni hnih chung cu rian zeihmanh nan ṭuan lai lo, nan ei awk rawl tuahto lawng kha onh nan si.

¹⁷ Hi thilnu phulh lo changreu puai cu nannih nih nan ulh lai, zeicahtiah hi ni hi nan ralkapbu Izipt ram in ka chuahpi hna ni kha a si. Hi ni cu a hmunmi puai ni ah chan khat hnu chan khat in nan ulh lai.

¹⁸ Thla hmasa bik thla, a ni hlei li ni zanlei in a ni kul le ni khat ni zanlei tiang, thilnu phulh lo changreu kha nan ei lai.

¹⁹ Ni sarih chung, nan inn chungah thilnu nan chia hrimhrim lai lo, thilnu phulhmi changreu a eimi cu nanmah miphun chung mi a si ah, ramdang mi a si ah, Israel mi bu chungin thlei a si lai.

²⁰ Thilnu phulhmi changreu kha nan ei hrimhrim lai lo; nan inn cio ah thilnu phulh lo changreu kha nan rak ei cio lai,’ tiah Israel mi vialte kha nan thanh hna lai,” tiah a ti.

²¹ Moses nih Israel mi hruaitu pawl vialte kha a auh hna i, “Va kal u law nan innchungkhar cio caah tuufa maw meheh fa maw vaa thim u law Lanhtak sa kha va that hna u.

²² Hissop nge kha i khiah hna u law nan innleng i a ummi sathi ah khan nok hna u law nan innka tung le nan innkaba ah khan nalh hna u. Zinglei tiang, ahohmanh nan inn chungin nan chuak hrimhrim lai lo.

²³ Bawipa cu Izipt mi hna kha thah awkah Izipt ram i aa chawh tikah nan innkaba cung thi le nan innka tung cung thi kha a hmuh hna lai i cuticun hrawktu kha nanmah thah awkah nan inn chungah khan lut loin a umter lai.

²⁴ Hi phung hi nanmah le nan tefa hna caah a hmunmi phung nan zulh zungzal dingmi a si lai.

²⁵ Cun Bawipa nih, kan pek hna lai, tiah bia an kamhmi hna ram chung i nan luh tikah, hi phung hi nan zulh zungzal lai.

²⁶ Nan fale nih, ‘Hi phung hi a sullam zeidah a si?” tiah an in hal hna tikah,

²⁷ nannih nih, ‘Bawipa sinah pekmi lanhtak thawinak a si, zeicahtiah Izipt mi hna a rak thah hna ah khan Izipt ram i a um vemi Israel mi hna cu kan inn kha a lanhtak hna i kan inn cu a zuah hna,’ tiah nan leh hna lai,’ tiah a chimh hna. Mi zapi cu an khuk an i bil i Bawipa kha an biak.

²⁸ Israel mi cu an kal i mahticun an tuah; Bawipa nih Moses le Aaron a fial hna ning khan an tuah.

Fater Thihnak

²⁹ Zanṭim ah Bawipa nih Izipt ram fater vialte cu a thah hna; bawiṭhutdan cungah a ṭhu ding Faro fater thawk in thong chung i a ummi thongtla fater tiang an thi; saṭil fater vialte zong an thi.

³⁰ Faro le a bawi vialte hna le a mi vialte hna cu zan ah cun an tho i fak piin an ṭap, zeicahtiah mithi a um lonak inn pakhat hmanh a um lo.

³¹ Cu zan ṭhiamṭhiam ah cun Faro nih khan Moses le Aaron cu a auh hna i, “Nanmah le Israel mi hna cu khulrang in chuak u. Ka mi kha kaltak hna u law nan ti bangin nan Pathian cu va bia u.

³² Nan ka hal bangin nan tuu le nan meheh le nan caw kha i kalpi hna u law, chuak u. Cun thluachuahnak ka hmuh nakhnga thla ka campiak u,” a ti hna.

³³ Izipt mi nih khan, khulrang in chuak ko u, nan chuah lo ahcun kan thi dih ko lai, tiah heh tiah an nawl hna.

³⁴ Cucaah Israel mi nih cun thilnu phulh lo changnawn cu a kheng in an puan in an fun hna i an liang in an put hna.

³⁵ Israel mi nih cun Moses nih a chimh hna bang khan, Izipt mi cu sui hlawn le ngun hlawn le hnipuan kha an hal hna.

³⁶ Bawipa nih Izipt mi cu Israel mi cungah khan hmaizahnak a ngeihter hna i an halmi hna paoh kha an pek hna. Israel mi nih Izipt mi cu an ṭheh ṭipṭiap ko hna.

Israel Mi Izipt Ram In An Chuak

³⁷ Israel mi cu Rameses in an i thawh i Sukkoth ah an kal. Nu nau chim loin ke in a kalmipa thong za ruk tluk an si.

³⁸ Midang tampi le tuu le meheh le caw tampi zong an sinah cun an kal ve.

³⁹ Izipt ram in an i chuahpimi thilnu telh lo changnawn kha changreu ah an ser. Izipt ram in khulrang tuk in an ṭhawl hna caah khan thilnu cu an phulh lo. Rawl i timhlamhnak caan zeihmanh an ngei lo.

⁴⁰ Israel mi cu Izipt ram ah khan kum za li le kum sawm thum an um.

⁴¹ Kum za li le sawm thum a tlin nite ah khan Bawipa ralkapbu vialte hna cu Izipt ram cun an chuak.

⁴² Cu zan cu Bawipa nih Izipt ram chungin chuahpi awkah hngilh loin a congh hna zan kha a si. Cu zan cu Bawipa sin i pekchanhmi zan a si i Israel mi nih chan khat hnu chan khat in hngilh loin an um awk hnga zan cu a si.

Lanhtak Puai Tuah Ningcang

⁴³ Bawipa nih Moses le Aaron cu a thawh hna i, “Lanhtak Puai tuah ningcang cu hi bantukin a si lai: Ramdangmi ahohmanh nih an ei lai lo,

⁴⁴ asinain nan cawkmi hna sal nih cun, an cuarpar tan an si hnuah an ei lai.

⁴⁵ A hung um tami nih si hna seh, nan hlan tami rianṭuantu si hna seh, cu hna nih cun an ei lai lo.

⁴⁶ Sa pum pum khat kha inn pakhat chungah ei a si lai i a zeihmanh kha lengah nan chuahpi lai lo; a ruh pakhat hmanh nan khiak lai lo.

⁴⁷ Israel mi nih nan bu ning tein hi puai cu nan tuah awk a si lai.

⁴⁸ Ramdangmi pakhatkhat nan sinah a um i Bawipa sinah lanhtak puai kha tuah a duh ve ahcun a sin i a ummi pa vialte kha an cuarpar nan tan hmasa hna lai i cu hnuah cun puai ah cun aa tel kho lai; amah cu Israel mi taktak bantukin nan zoh lai. Sihmanhsehlaw cuarpar tan lomi nih cun an ei hrimhrim lai lo.

⁴⁹ Cu phunglam nih cun Israel mi taktak zong kha a nenh hna i nan sin i khua a sami ramdangmi zong kha a nenh hna,” tiah a ti.

⁵⁰ Israel mi vialte nih khan Moses le Aaron chimmi cu an ngaih i Bawipa nih Moses le Aaron a fialmi hna ning khan an tuah.

⁵¹ Cu ni hrimhrim ah cun Bawipa nih Israel mi hna cu an bu an bu cio in Izipt ram khan a chuahpi hna.