EXODUS 11 - Lai (Hakha) Common Language Bible 2006

Fater Thihnak Kong A Chim

¹ Bawipa nih Moses cu a thawh i, “Faro le Izipt mi hna cungah hin dantatnak pakhat lawnglawng ka tlunter rih lai. Cu hnuah cun an kalter ko hna lai. An kalter hna tikah cun a ṭhawl in an ṭhawl hna lai.

² Cun na mi hna kha chim hna law nu nih siseh, pa nih siseh, an innpa cio kha sui hlawn le ngun hlawn hal cio hna seh,” a ti.

³ Bawipa nih Izipt mi cu Israel cungah khan hmaizahnak a ngeihter hna. A ngaingai ti ahcun Izipt bawi pawl le mi zapi nih khan Moses cu mingan ngaingai pakhat ah an ruah.

⁴ Moses nih khan Faro cu, “Bawipa nih hitin a ti, ‘Zan ṭim hrawngah khin Izipt mi hna lakah ka chawk lai i

⁵ Izipt ram chung i fater a simi paohpaoh kha an thi lai, Faro rocotu a bawiṭhutdan cung i a ṭhu dingmi fater thawk in facang rialnak lung i facang a rialmi salnu fater tiang an thi lai. Saṭil hna fater vialte zong an thi ve lai.

⁶ Hi hlanah a um bal lo i hmailei zongah a um bal lo ding aihramnak kha Izipt ram chung dihlak ah a tlung lai.

⁷ Sihmanhsehlaw Israel mi hna lakah cun uico nih minung siseh saṭil siseh a auh hna thawng hmanh a leng lai lo; cucaah Bawipa nih Izipt mi le Israel mi cu ka thleidan hna kha na hngalh lai,’ a ti,” tiah a ti.

⁸ “Cun na bawi vialte hna hi ka sinah an ra lai i ka hmaiah an kun lai i, ‘Nangmah le na mi hna cu va kal ko u,’ tiah an ti lai. Cu hnuah cun hi ram hin ka chuak lai,” tiah a ti fawn. Cun thinhung ngaiin Moses nih Faro cu a chuahtak.

⁹ Bawipa nih Moses cu a chawnh i, “Izipt ram chungah hin khuaruahharmi thil kha ka tuah chinchin khawh rih hna nakhnga, Faro nih hin na bia kha an ngai lai lo,” a ti.

¹⁰ Hi khuaruahharmi thil vialte hi Moses le Aaron nih Faro hmaiah khan an ser hna, sihmanhsehlaw Bawipa nih a lung a hahter caah Israel mi kha a ram chung cun a chuahter duh hna lo.