BIAPHUAN 9 - Lai (Hakha) Common Language Bible 2006

¹ Cun vancungmi panganak nih khan a muko cu a vun tum, van in vawlei ah arfi pakhat a tlami ka hmuh; dongh hngal lo khor tawh kha amah cu an pek.

² Dongh hngal lo khor cu arfi nih cun a vun hun i somei nganpi chung i meikhu a chuakmi bantuk meikhu kha a hung chuak hluahmah; cu dongh hngal lo khor in a chuakmi meikhu nih cun ni ceunak le thli kha a muihter dih hna.

³ Meikhu chung cun khaubawk an chuak i vawlei cungah an rung ṭum; tlangngaikuang ṭhawnnak bantuk kha khaubawk cu an pek hna.

⁴ Ram hring siseh, thingkung siseh, ramkung siseh, hrawk hna hlah u, tiah an ti hna; an cal ah Pathian hmelchunhnak a ngei lomi lawnglawng kha nan hrawh khawh hna, ti an si.

⁵ Hi mi hna thah cu khaubawk kha onh an si lo, a hrem lawng thla nga chung nan hrem hna lai, ti an si. Cu an hrem hnanak fahning cu tlangngaikuang mi henh bantuk khi a si lai.

⁶ Cu thla nga chung cu kha mi hna nih khan thih an i duh deuh lai, sihmanhsehlaw an thi kho ṭung lai lo; thih kha an i kawh lai, sihmanhsehlaw thihnak nih a zamtak ṭung hna lai.

⁷ Khaubawk cu ral tuknak rangtum he an i lo; an lu ah suiluchin bantuk an i chinh i an hmai cu minung hmai bantuk a si.

⁸ An sam cu nu sam bantuk a si i an ha cu chiandeih ha bantuk a si.

⁹ An ṭang ah thir angki bantuk an i aih i an thla khawn thawng cu, raltuknak hmun ah a le cutmatmi rangleng tampi thawng bantuk a si.

¹⁰ Tlangngaikuang bantukin mei le mi henhnak zum an ngei i an mei cun minung cu thla nga chung fahnak an pek khawh hna.

¹¹ An uktu ah siangpahrang pakhat an ngei i dongh hngal lo khor a uktu vancungmi kha a si. A min cu Hebru holh in Abaddon ti a si; Grik holh cun Apollyon ti a si i a sullam cu “Hrawktu” tinak a si.

¹² Thil ṭihnung hmasa bik cu a dih; hi hnuah hin a dang pahnih a ra ding an um rih.

¹³ Cun vancungmi paruknak nih khan a muko cu a vun tum, Pathian hmai i a dirmi sui biakṭheng kap khan aw pakhat ka theih.

¹⁴ Muko aa putmi vancungmi paruknak kha aw nih cun a thawh i, “Tiva nganpi Zufrates ah hrenmi vancungmi pali kha thlah hna,” tiah a ti.

¹⁵ Vancungmi pali cu a thlah hna, annih cu hi suimilam thengte le hi ni thengte le hi thla thengte le hi kum thengte i minung vialte cheu thum cheu khat a thattu ding i rak timhlamhmi kha an si.

¹⁶ An rangcung ralkap hna cu nuai za hnih an si tiah an ka chimh.

¹⁷ Cun langhnak ka hmuhmi ah cun rangtum hna le an cung i aa citmi cu ka hmuh hna: an ṭangphaw cu mei bantukin a sen, safaiar lungvar bantukin a dum i kat bantukin a eng. Rangtum cu an lu chiandeih lu bantuk an si i an kaa chungin mei le meikhu le kat kha an chuak.

¹⁸ Rangtum hna kaa chungin a chuakmi hremnak pathum, mei le meikhu le kat nih cun, minung cheu thum cheu khat an thah hna.

¹⁹ Rangtum cu an ṭhawnnak kha an kaa le an mei ah a um. An mei cu lu an ngei i rul bantuk an si, an mei cun mi kha an hrem hna.

²⁰ Hi hremnak pathum nih a thah lomi, a taangmi minung hna nih khan, anmah nih an ser chommi thil kha an mertak hlei hna lo. Khuachia biak kha an ngol lo i sui le ngun le dar le lung le thing in sermi siasal, khua zong a hmu kho lomi, a theih zong a thei kho lomi, a kal zong a kal kho lo mi biak kha an ngol hlei fawn lo.

²¹ Cun an lainawn le an pumsa camh le an pumsa sualnak le an fir zong kha an i ngaihchih hlei fawn lo.