BIAPHUAN 8 - Lai (Hakha) Common Language Bible 2006

Cakhenh Pasarihnak

¹ Tuufa nih cakhenh pasarihnak kha a phoih i vancung cu suimilam a cheu chung dai ṭhup in a um.

² Cun Pathian hmaiah a dirmi vancungmi pasarih kha ka hmuh hna i muko pasarih an pek hna.

³ A dang vancungmi pakhat, zihmui khanghnak umte pakhat aa putmi kha a ra i biakṭheng pawngah cun a ra dir. Pathian mi hna an thlacamnak i toih awkah le bawiṭhutdan hmai i a ummi sui biakṭheng cung i khangh awkah zihmui tampi an pek.

⁴ Pathian hmai i a dirmi vancungmi kut cun zihmui khu cu Pathian mi hna thlacamnak he khan an kai ṭi.

⁵ Cun vancungmi nih khan zihmui um cu aa lak i biakṭheng cung i a ummi mei kha a chungah cun a rawn i vawlei cungah a hlonh. Khua a ri; ṭek a tla, nimtlau a lek i li aa hnin.

Muko Tumnak

⁶ Cun vancungmi pasarih hna nih khan an muko pasarih cu tum awkah an i tim.

⁷ Vancungmi pakhatnak nih khan a muko cu a vun tum, rial le mei, thisen he aa cawhmi a sur in vawlei cungah an sur. Vawlei cheu thum cheu khat kha a kang dih, thingkung cheu thum cheu khat kha an kang i ram hring vialte kha an kang dih.

⁸ Vancungmi pahnihnak nih khan a muko cu a vun tum, tlang nganpi a alh hluahmahmi bantuk khi rili chungah a tla. Rili cheu thum cheu khat kha thisen ah a cang i

⁹ rili chung i a ummi thilnung cheu thum cheu khat kha an thi, cun sangphawlawng cheu thum cheu khat kha an rawk.

¹⁰ Vancungmi pathumnak nih khan a muko cu a vun tum, meifar alh bantuk a simi arfi nganpi pakhat cu van in, tiva cheu thum cheu khat le cerh cheu thum cheu khat cungah, a rung tla.

¹¹ (Cu arfi cu a min ah ‘A kha’ ti a si). Ti cu cheu thum cheu khat a kha i, ti cu a khaat caah cu ti a dingmi cu mi tampi an thi.

¹² Cun vancungmi palinak nih a muko cu a vun tum, nika cu cheu thum ah cheu khat a beuh i thlapa zong cheu thum ah cheu khat a beuh ve, arfi zong cheu thum ah cheu khat an lo fawn. Cucaah cun an ceunak cu cheu thum ah cheu khat a zor i chun ah ṭhen thum ṭhen khat chung a mui i zan zongah ṭhen thum ṭhen khat chung ceunak a um lo.

¹³ Cun khua ka hun zoh i vanlai ah sang piin a zuangmi mupi pakhat nih aw fakpi i, “Ṭih a va nung thiam dah! Ṭih a va nung thiam dah! A dang vanmi pathum hna nih an muko an tum ve tikah vawlei mi vialte hna caah zeitluk riamruam in dik ṭih a nun lai!” a ti.