BIAPHUAN 7 - Lai (Hakha) Common Language Bible 2006

Israel Mi Thong Za Khat Thong Sawm Li le Thong Li

¹ Cu hnuah cun vancungmi pali vawlei kil li cung i an dir kha ka hmuh i vawlei cung thlitu pali hna kha, vawlei cungah siseh, rili cungah siseh, thingkung cungah siseh, an hrannak hnga lo an thlauh hna.

² Cun nichuahlei in vancungmi a dang pakhat a nungmi Pathian cakhenhnak he a rat kha ka hmuh. Pathian nih vawlei le rili hrawh khawhnak nawl a pekmi vancungmi pali kha aw fak piin a auh hna.

³ Vancungmi nih cun, “Kan Pathian sal hna kha an cal ah hmelchunhnak kan khenh hna hlan cu vawlei le rili le thingkung kha hrawk hna hlah u,” tiah a ti.

⁴ Cun an cal ah Pathian cakhenhnak in hmelchunhnak an khenhmi hna cu thong za khat le thong sawm li le thong li an si, Israel phun dihlak chungin an si, tiah an ka chimh.

⁵ Judah phun in thong hleihnih, Reuben phun in thong hleihnih, Gad phun in thong hleihnih,

⁶ Asher phun in thong hleihnih, Naftali phun in thong hleihnih, Manasseh phun in thong hleihnih,

⁷ Simeon phun in thong hleihnih, Levi phun in thong hleihnih, Issakhar phun in thong hleihnih,

⁸ Zebulun phun in thong hleihnih, Josef phun in thong hleihnih, Benjamin phun in thong hleihnih an si.

Mibu Nganpi

⁹ Cu hnuah cun khua ka hun zoh i mibu nganpi, ahohmanh nih a rel in an rel cawk lomi khi ka hmuh. Annih cu phun kip, ram kip, holh kip le hrin kip chungin a rami an si i bawiṭhutdan hmai le Tuufa hmaiah cun an dir i puan rang an i aih i tum hnah kha an i put.

¹⁰ Fak piin an au i, “Kan khamhnak cu bawiṭhutdan cungah a ṭhumi Pathian le Tuufa sinin a rami a si,” an ti.

¹¹ Vancungmi vialte cu bawiṭhutdan le upa hna le saram nung pali hna vel chum ah khan an dir. Cun bawiṭhutdan hmaiah cun an kun i Pathian kha an biak i

¹² “Amen! Thangṭhatnak le sunparnak le fimnak le lunglawmhnak le upatnak le ṭhawnnak le thil ti khawhnak cu zungzal in zungzal tiang kan Pathian ta a si! Amen!” an ti.

¹³ Upa pakhat nih khan a ka hal i, “Puan rang aa aihmi hna hi ahodah an si i khuazei in a rami dah an si?” tiah a ka ti.

¹⁴ “Ka hngal lo, bawipa, Nangmah nih ta na hngalh deuh lai,” tiah ka leh. Cun a ka thawh i, “Hi mi hna hi hremnak nganpi a ingmi kha an si; Tuufa thi chungah an puan kha an suk i an puan cu an vaar cang.

¹⁵ Cucaah cun Pathian bawiṭhutdan hmaiah an dir i chunzan in biakinn chungah a rian kha an ṭuan. Bawiṭhutdan cung i a ṭhumi nih khan a umpi hna i a ven hna.

¹⁶ Annih cu an ti a hal in an rawl a ṭam ti lai lo; ni nih a linh ti hna lai lo i thlanhri puak in zeihmanh nih a umter ti hna lai lo.

¹⁷ Zeicahtiah bawiṭhutdan laifang i a ummi Tuufa kha an tuukhal a si lai i nunnak tiput cerhkam ah a kalpi hna lai. Cun Pathian nih an mitthli vialte kha a hnawhpiak dih hna lai,” a ti.