BIAPHUAN 20 - Lai (Hakha) Common Language Bible 2006

¹ Cun vanmi pakhat vancung in a rung ṭum i dongh hngal lo khor tawh le cikcin nganpi aa put kha ka hmuh.

² Rulhreu, limkeng kha a tlaih i kum thong khat a hren — cu limkeng cu Khuachia, asiloah, Satan kha a si.

³ Vanmi nih cun dongh hngal lo khor chungah khan a thlak i kum thong khat kha a dih hlantiang, mi kha a hlen khawh ti hna nakhnga lo, a hrenh i ca a khenh chih. Cu hnuah cun tlawmpal chuah a si te lai.

⁴ Cun bawiṭhutdan hna le a cung i a ṭhumi hna kha ka hmuh hna; annih cu biaceihnak nawl kha pek an si. Jesuh nih a phuanmi biatak le Pathian bia an chim ruangah thahnak a ingmi thlarau hna zong kha ka hmuh hna. Sahrang kha an bia lo, a milem zong an bia lo, an cal le an ban zongah sahrang hmelchunhnak kha an ngei lo. An hung nung i Khrih he cun siangpahrang bantukin kum thong khat chung uktu bawi an si.

⁵ (Mithi mi a dang cu kum thong khat a dih hlan kha cu an nung lo). Mah hihi mithi thawhter an si a hmasa u cu a si.

⁶ Hi mithi thawhter an si a pakhatnak i aa telmi hi cu lunglawmmi le thluachuak hringhranmi an si ko. Thih voi hnihnak nih an cungah nawl zeihmanh a ngei lo; annih cu Pathian le Khrih tlangbawi an si lai i Khrih he cun kum thong khat chung uktu bawi an si lai.

Satan A Sung

⁷ Kum thong khat kha a dih tikah Satan cu thong chung khan chuah a si lai i

⁸ vawlei kil li ah aa ṭhekmi miphun vialte kha hlen awkah aa thawh lai, cu hna cu Gog le Magog kha an si. Satan nih cun i tuk awkah a pumh ciammam hna lai i rili kam thetse zat an si lai.

⁹ Vawleicung khuazakip ah khan an i ṭhek i Pathian mi hna umnak hmun le Pathian nih a dawtmi khua kha an kulh. Sihmanhsehlaw van in mei a rung tla i a thah dih hna.

¹⁰ Cun annih a hlengtu hna, Khuachia kha, mei le kat tili chungah khan an paih, cuka cu sahrang le nal profet an rak thlaknak hna kha a si; cuka ah cun chunzan in zungzal hrem an si zungzal ko lai.

Biaceihnak Hmanung Bik

¹¹ Cun bawiṭhutdan raangpi le a cung i a ṭhumi kha ka hmuh hna. A cung i a ṭhumi hmaika cun vawlei le van kha an zaam i an um ti lo.

¹² Cun mithi mi kha, a ngan he a hme he, bawiṭhutdan hmai i an ṭhut kha ka hmuh. Cauk kha an kau hna, cun cauk a dang pakhat, nunnak cauk zong kha an kau ve. Mithi cu an rak tuahmi cauk chung i aa ṭialning khan an bia an ceih hna.

¹³ Cun rili nih a chung i a thimi kha a hun chuah hna. Thihnak le mithi khua zong nih khan, an hrenmi mithi kha an hun chuah ve hna. An dihlak in an tuahning cio khan an bia an ceih hna.

¹⁴ Cun thihnak le mithi khua cu mei tili chungah khan an paih hna. (Hi mei tili hi thih voi hnihnak cu a si).

¹⁵ Nunnak cauk chungah an min aa ṭial lomi paoh cu mei tili chungah cun an paih hna.