BIAPHUAN 18 - Lai (Hakha) Common Language Bible 2006

Babilon A Ril Cang

¹ Khi hnuah vancung in vanmi dang pakhat a run kha ka hmuh. Nawlngeihnak a ngan ngaingaimi a ngei i a sunparnak nih vawlei cu a ceuh dih.

² Fak piin a au i, “Nu kha a ril cang! Babilon Khualipi kha a tlu cang. Khuachia le thlarau thur nih an umhnawh cang i a thurhnawmmi le fihnung a simi vate a phunphun in a khat cang.

³ Zeicahtiah a zu kha mi vialte a pek hna i a dinter hna — a hornak zu ṭhawng kha a dinter hna. Vawlei cung siangpahrang hna nih amah he cun nu le pa sualnak an tuah i aa sum lomi a hornak nih cun vawlei cung khuazakip chawlet pawl kha a rumter hna,” a ti.

⁴ Cun vancung in aw pakhat ka theih ṭhan i, “Ka mi hna, chuak tuah u, Amah chung khan chuak tuah u! Sualnak a tuahmi ah khan i tel hlah u, Dantatnak a hmuh ding zong kha i hrawm hlah u.

⁵ Zeicahtiah a sualnak cu van tawng in aa pong i Ṭhat lonak a tuahmi kha Pathian nih a philh lo.

⁶ Amah nih a rak in tuah hna bantukte khan amah cu tuah ṭhan ve u; a let hnih in cham u, Nanmah din awkah a rak tuahmi a let hnih ṭhawng khan, Amah din awk cu a hrai chungah khan serpiak u.

⁷ Sunparnak le nuamhnak amah le amah a rak i pek zat te khan, Temhinnak le ngaihchiatnak pe ve u. Zeicahtiah aa thawh i, Keimah cu bawiṭhutdan cung i a ṭhumi siangpahrang bawinu ka si. Nuhmei ka si lo, ngaihchiatnak cu ka ing bal lai lo, a ti.

⁸ Hi ruangah hin hremnak nih khan ni khatte ah an tlakphuat lai, rai le ngaihchiatnak le mangṭam nih khan a tlakphuat lai. Amah bia a ceihtu Bawipa Pathian cu a ṭhawngmi a si caah Amah cu mei in khangh a si lai,” a ti.

⁹ A sualnak le a hornak chungah aa bual vemi vawlei cung siangpahrang hna nih khan a kanghnak meikhu cu an hmuh tikah khuapi cu an ṭah lai.

¹⁰ Temhnak a inmi kha an ṭih caah a langhlat piin an dir i cuka cun an i thawh i, “Ṭih a hei nung hringhran dah! Mi tuksa a hei pur hringhran dah! Babilon khualipi, khua lianngan le khua ṭhawng! Suimilam pakhat chungah na rawk dih ko!” an ti lai.

¹¹ Vawlei cung chawlet pawl zong amah a rawh ruangah cun an ṭap i an ngaih a chia, zeicahtiah an thilri kha ahohmanh nih an caw ti hna lo;

¹² an sui, an ngun, an lungvar, an rili lungvar, le la hmangṭhia in tahmi thilri puan sen, pu, maimaw; cun thingrua theihtlei in sermi thil phun zakip, vui ho le thing man sung in sermi thil phun kip,

¹³ nakzik le musala le zihmui le mura zihmui le frankinsen zihmui le zu le chiti le changvut le facang le caw le tuu le rang le rangleng le sal le minung hmanh kha ahohmanh nih an caw ti hna lo.

¹⁴ Chawlet pawl nih cun an thawh i, “Ngei ning ti i saduh na rak thahmi vialte kha an lo dih cang i na rumnak le na sunparnak vialte cu an liam cang; zeitikhmanh ah na hmu ṭhan ti hna lai lo,” an ti.

¹⁵ Cu khuapi chung i chaw a rak dawr tawnmi mirum hna nih khan, a temhinnak cu an ṭih caah a langhlat piin a cuanh in an cuanh lai. An ṭap an ai lai i

¹⁶ “Khua lianngan kha zeitluk in dah ṭih a nun cang. Zeitluk in dah mi tuksapur a si cang. Puan hmangṭhia le puan sen le maimaw in a rak i thuam tawn i sui hlawn le lung mansung le rili lungvar in a rak i ṭamh tawn.

¹⁷ Sihmanhsehlaw suimilam pakhat chungah a chawva vialte cu an lo dih ai!” an ti lai. Rili lawngcawng bawi vialte hna le khual tlawngmi vialte hna le tilawng rianṭuantu vialte hna le rili cung rianṭuannak in a paw a cawmmi vialte hna cu lamhlatpi in an dir i

¹⁸ a kanghnak meikhu kha an hmuh tikah, “Hi khualipi bantukin a liannganmi khua a um bal lo,” an ti.

¹⁹ An lu ah lei dip an i phulh, an ṭap an ai i, “Khua lianngan kha zeitluk in dah ṭih a nun cang. Zeitluk in dah tuksapur a si cang. Rili cungah lawng in chaw a letmi vialte hna nih amah rumnak thawngin mirum an rak si dih. Asinain suimilam pakhat chungah a chaw vialte cu an lo dih ko ee,” an ti.

²⁰ Sihmanhsehlaw amah a rawh ruangah van cu i lawm ko seh. Pathian mi hna le lamkaltu hna le profet hna, i lawm ko u! Zeicahtiah nan cung i a tuahmi ruangah khan Pathian nih amah cu dan a tat cang!

²¹ Cun a ṭhawngmi vancungmi pakhat nih facang rialnak lung nganpi tia a simi lung pakhat kha aa cawi i rili chungah a hlonh, “Hi bantuk hin Babilon khualipi hi i let luahmah in hlonh a si lai i zeitikhmanh ah hmuh ṭhan a si ti lai lo.

²² A chung i a rak um tawnmi tingtang tum thiam hna le aw dawh tum thiam hna le thonglawi tum thiam hna le muko tum thiam hna nih an tum tawnmi aw kha zeitikhmanh ah theih ṭhan a um ti lai lo. A chungah rianṭuantu an um ti lai lo i facang rialnak thawng kha theih a um ti lai lo.

²³ A chungah meiinn ceu a um ti lai lo; nupi ṭhi tlangval le va ngeimi ngaknu conglawmhnak thawng zong a um ti lai lo. A chung i a rak ummi chawlet pawl cu vawlei cung ah a ṭhawng bik an rak si i hlennak mitleh thiamnak in vawlei cung mi vialte kha an hlen dih hna,” a ti.

²⁴ Profet hna le Pathian mi hna kha a chungah an thisen an chuah hna caah Babilon cu dantat a si cang; asi, vawlei cungah thah a simi vialte hna an thisen cu amah chungah cun hmuh an si dih!