BIAPHUAN 15 - Lai (Hakha) Common Language Bible 2006

Vancungmi le Hremnak Hmanung Bik Hna

¹ Cun van ah khin khuaruahhar le lianngan ngai a simi hmelchunhnak a dang pakhat ka hmuh ṭhan. Vancungmi pasarih, hremnak pasarih aa putmi kha ka hmuh hna i cu hremnak cu a hmanung bik an si cang, zeicahtiah Pathian thinhun phuannak a donghnak an si.

² Khua ka hei zoh i mei he cawhmi thlalang rili he, aa lomi kha ka hmuh. Cun a min, nambar in chimmi sahrang le a milem a teitu hna kha ka hmuh hna. Annih cu thlalang rilikam ah khan an dir i Pathian nih a pekmi hna tingtang kha an i put.

³ Annih cu Pathian sal Moses hla kha le Tuufa hla kha an sa i, “Bawipa, a lianngan bik Pathian, Zeitluk in dah na thil tuahmi hi an lianhngan i khuaruahhar an si. Miphun vialte Siangpahrang, Na lam cu zeitluk in dah a dikmi le a hmaanmi a si!

⁴ Bawipa, ahodah nangmah ṭih loin a um ngam lai? Na lianngannak chim duh loin ahodah a um lai? Nangmah lawng a thiangmi na si. Miphun vialte nih na hmaiah an ra lai i an in biak lai, Thil ding na tuahmi kha mi vialte nih hmuh a si caah,” an ti.

⁵ Cu hnuah cun vancung i biakinn aa hun kha ka hmuh i a chungah cun Biakamnak Thlam kha a um.

⁶ Hremnak pasarih aa putmi vancungmi biakinn chungin an chuah kha ka hmuh; puan rang thiang an i aih i an ṭang ah sui ṭangmenh kha an i menh.

⁷ Cun saram nung pali hna lak i pakhat nih khan vancungmi pasarih hna cu, zungzal in zungzal tiang a nungmi Pathian thinhunnak in a khatmi sui kanto pasarih kha a pek hna.

⁸ Biakinn cu Pathian sunparnak le lianhngannak meikhu in a khat i vancungmi pasarih nih hremnak pasarih an tlunpimi a dih hlantiang ahohmanh biakinn chungah cun an lut kho lo.