3 JOHAN 1 - Lai (Hakha) Common Language Bible 2006

¹ Khrihfa Upa nih, Ka dawt taktakmi Gaius, ca kan kuat.

² Ka dawtmi ka hawi, ngandam tein khua na sak i zeizong vialte na caah rem tein a um nakhnga thla kan campiak — thlarau leiah siarem in khua na sa ti kha ka hngalh.

³ Biatak leiah zeitluk in dah zumhawktlak in na um ti kha kan unau cheukhat nih an ra ka chimh tikah ka lung aa lawm tuk hringhran — nang cu biatak chungah na um zungzal tawn ko bantuk khan.

⁴ Ka fale biatak chungah khua an sa, ti thawng hlei in a ka lawmhter deuhtu zeihmanh a um ti lo.

Gaius Kha A Thangṭhat

⁵ Ka dawtmi ka hawi, kan unau hna kha na theihhngalh bal lomi an si nain an ca i nan rak tuahmi kha rian ṭha le zumhawktlak ngaingai a si.

⁶ Na rak dawt hnanak kha hika Khrihfabu sinah hin an chim. Hmailei an kalnak ding zongah Pathian duhnak he aa tlak dingin rak bawm ko rih hna.

⁷ Zeicahtiah Khrih rian ṭuan awk khualtlawn ah khan, a zum lomi sinin bawmhnak zeihmanh la loin, an i thawh.

⁸ Cucaah biatak rian kha a ṭuanpitu kan si nakhnga, kannih Khrihfami nih hi hna cu kan bawmh awk an si.

Diotrefes le Demetrius

⁹ Khrihfabu sinah ca tawite hi ka ṭial, sihmanhsehlaw an hruaitu si a duhmi Diotrefes nih khan cun ka chimmi hi zeihmanh ah a rel lai lo.

¹⁰ Ka rat tikah a tuahmi vialte kha ka phuan dih lai; kan konglam i thil ṭhalo tampi a chimmi le lih a chimmi tehna vialte kha. Cun cu lawng cu aa za rih lo, kan unau pawl kha an rat tikah a rak dawnh hna i kan tlung hna seh tiah a titu hna kha i tlunter hna hlah u, tiah a thlauh hna i Khrihfabu chung khan chuah a timh hna.

¹¹ Ka dawtmi ka hawi, a ṭha lomi nawl cu i cawn hlah, a ṭhami nawl tu i cawn ko. Thil ṭha a tuahmi paoh cu Pathian mi an si, thil ṭhalo a tuahmi paoh nih cun Pathian kha an hmu lo.

¹² A mi kip nih Demetrius cu an thangṭhat i biatak hrimhrim zong nih a thangṭhat. Cun kannih zong nih kan thangṭhat ve i kan chimmi cu biatak a si ti kha na hngalh.

Biatlang Kawmnak

¹³ Chimh awk tampi kan ngei ko hna, asinain ca le cahang in chimh cu ka duh lo.

¹⁴ Tuan ah ka rak in hmuh hna lai i cu tikah kan pum tu in kan i ruah hna lai.

¹⁵ Nan cungah daihnak um ko seh. Na hawile vialte nih daihnak an in kuat. Kan hawile vialte kha pumpak cio ah an kut rak kan tlaihpiak hna.