2 SIANGPAHRANG 8 - Lai (Hakha) Common Language Bible 2006

Shunam Minu Lo Kha An Khirh Ṭhan

¹ Cun Elisha nih a fapa a rak nunter ṭhanmi minu sinah khan, “Tho law, na innchungkhar dihlak he kal u law, na pem khawhnak paoh ah va pem; zeicahtiah Bawipa nih mangṭam kha a kawh cang i hi ram cungah hin kum sarih chung a tla lai,” tiah a ti.

² Cucaah minu cu a tho i Pathian mi nih a chimmi bia ning khan a tuah; a innchungkhar he an i thawh i Filistin mi hna ram ah an pem i kum sarih an um.

³ Cun kum sarih a donghnak i minu cu Filistin mi hna ram in a ra kir ṭhan tikah, a inn le a lo ca i nawlnak pek awkah khan siangpahrang sinah a va chuak.

⁴ Siangpahrang cu Pathian mi sinum Gehazi he khan bia an rak i ruah i, “Elisha nih thil lianngan a tuahmi vialte ka chim tuah,” ti i a rak ti lio kha a si.

⁵ Cun anih nih, zeitindah Elisha nih a thimi a nunter ṭhannak kong kha a chimh lioah khan, zohhmanh, a fapa a nunter ṭhan minu nih khan a inn le a lo kong ah siangpahrang cu a nawl. Cun Gehazi nih a thawh i, “Maw siangpahrang, ka bawipa, minu kha mah hihi a si i a fapa Elisha nih a nunter ṭhanmi kha mah hihi a si,” tiah a ti.

⁶ Cun siangpahrang nih minu cu a hal tikah amah nih cun a rak chimh. Cucaah amah caah cun siangpahrang nih bawi pakhat kha a fial i, “Amah ta a simi vialte kha, hi ram a kaltak ni thawk in atu tiang a lo in a chuakmi vialte he, amah cu pe ṭhan dih u,” tiah a ti.

Hazael Cu Siria Siangpahrang A Cang

⁷ Elisha cu Damaskas khua ah a kal. Siria siangpahrang Benhadad cu a zaw i, “Pathian mi cu hika ah a ra,” tiah an chimh tikah,

⁸ siangpahrang nih cun Hazael kha, “Laksawng i put law Pathian mi don awkah khan va kal tuah, cun, ‘Hi zawtnak hin, ka dam ṭhan lai maw?’ tiin Pathian rak ka halpiak tuah seh,” tiah a ti.

⁹ Cucaah Hazael cu amah don awkah khan a kal i laksawng, Damaskas thilri a phun phun, kalauk sawm li phor aa phorh. Cun a phak i a hmai i a dir tikah khan, “Na fapa Benhadad, Siria siangpahrang nih keimah cu nangmah sinah a ka thlah i, ‘Hi zawtnak hin ka dam ṭhan lai maw?’ a ti,” tiah a ti.

¹⁰ Cun Elisha nih a thawh i, “Va kal law, amah cu, ‘Na dam ṭhan hrimhrim lai,’ tiah va ti; sihmanhsehlaw Bawipa nih a ka hmuhsak cang i a thi hrimhrim lai,” tiah a ti.

¹¹ Cun dengteo in a ning a zah tiang ṭhep loin a zoh. Cun Pathian mi cu a ṭap.

¹² Cun Hazael nih a thawh i, “Zeicahdah ka bawipa na ṭah?” tiah a ti. Anih nih, “Zeicahtiah ṭhat lonak Israel mi cungah na tuah ding kha ka hngalh; an ralhau kha mei in na duah hna lai i an tlangval hna cu vainam in na thah hna lai i an ngakchia hna cu na den cikcek hna lai i fa a pawimi an nule hna cu na thler dih hna lai,” tiah a ti.

¹³ Cun Hazael nih, “Uico tluk ceo a simi na sal hi zeidah ka si i cu thil lianngan ka tuah hnga cu?” tiah a ti. Elisha nih, “Nangmah cu Siria siangpahrang na si lai kha Bawipa nih a ka hmuhsak cang,” tiah a leh.

¹⁴ Cun Elisha sin cun a kal i a bawipa sinah khan a ra i, “Elisha nih zeidah na sinah a chim?” tiah a rak hal. Cun anih nih, “Na dam ṭhan hrimhrim lai, tiah a ka chimh,” tiah a leh.

¹⁵ Sihmanhsehlaw a thaizing ah aa khuhmi puan kha a lak i ti ah a hnim i a hmai a khuh i a thi. Cun Hazael cu amah hmun ah khan siangpahrang ah a cang.

Judah Siangpahrang Jehoram Pennak

¹⁶ Israel siangpahrang Ahab fapa Joram a bawi kum nganak ah khan Judah siangpahrang Jehoshafat fapa Jehoram cu pen hram aa thawk.

¹⁷ Siangpahrang a can ah kum sawm thum le kum hnih a si i Jerusalem ah kum riat a bawi.

¹⁸ Ahab innchungkhar nih an tuah bantuk khan, Israel siangpahrang hna lam kha a zul ve, zeitintiah a nupi cu Ahab fanu kha a si. Cun Bawipa mithmuh i thil ṭhalo kha a tuah.

¹⁹ Sihmanhsehlaw Judah cu Bawipa nih, a sal David ruangah khan, hrawh a duh lo; amah le a tefa hna cu zungzal in meiinn pek awkah bia a rak kam cang hna.

²⁰ Amah chan chungah cun Edom nih Judah uknak kha an doh i anmah siangpahrangte an i chiah ve.

²¹ Khi tikah Joram cu Zair ah a rangleng vialte he an kal, zan ah a tho i amah a kulhtu Edom mi vialte kha amah le a rangleng haotu bawi hna nih cun an tuk hna; sihmanhsehlaw a ralkap cu inn ah an zam.

²² Cucaah Judah uknak kha Edom nih nihin tiangin a doh. Cun Libnah zong cu caan ah cun a rak tho ve.

²³ Joram tuahsernak a tang rihmi le a tuahmi vialte cu, Judah Siangpahrang hna Chanrelnak Cauk chungah an i ṭial lo mei?

²⁴ Cuticun Joram cu a pupa hna sinah a it i a pupa hna sinah David khua chungah an vui; cun a fapa Ahaziah kha amah hmun ah khan a hung bawi.

Ahaziah Pennak

²⁵ Israel siangpahrang Ahab fapa Joram a bawi kum hleihnihnak ah, Judah siangpahrang Jehoram fapa Ahaziah cu pen hram aa thawk.

²⁶ Pen hram aa thawk ah Ahaziah cu kum kul le kum hnih a si i Jerusalem khua in kum khat a uk. A nu min cu Athaliah a si; amah cu Israel siangpahrang Omri tu a si.

²⁷ Amah zong cu Ahab innchungkhar lam kha a zul ve i amah cu Ahab inn chungkhar tu a si caah Ahab innchungkhar nih an tuah bang khan Bawipa mithmuh i thil ṭhalo kha a tuah.

²⁸ Siria siangpahrang Hazael kha Ramoth-gilead i doh awkah Ahab fapa Joram he an kal i khika ah Siria mi nih Joram cu an hliam.

²⁹ Cun Siria siangpahrang Hazael he an i tuk tikah Siria mi nih Ramah khua ah an hliamnak a hma kha damter awkah, Joram Siangpahrang cu Jezreel ah a kir. Cun amah cu a zawt caah cun, Judah siangpahrang Jehoram i a fapa Ahaziah nih khan Jezreel i a ummi Joram, Ahab fapa cu va zoh awkah a vung kal.