2 SIANGPAHRANG 19 - Lai (Hakha) Common Language Bible 2006

Sennakherib Kut Chungin Judah A Luat

¹ Hezekiah Siangpahrang nih a theih tikah, a puan a thleh i buri aa aih i Bawipa inn chungah a lut.

² Cun inn zohkhenhtu Eliakim le caṭialtu Shebnah le tlangbawi upa hna, khumpuan aa aih ciomi hna kha, profet Isaiah, Amoz fapa, sinah a thlah hna.

³ Annih nih amah cu, “Hi bangin Hezekiah nih, ‘Nihin cu lung retheihnak le nehsawhnak le ningzahnak ni a si. Fa cu an chuah caan a tling cang nain, hrinnak caah thazang a um lo.

⁴ Assiria siangpahrang nih a nungmi Pathian zawmhtaih awkah a ralbawi ngan bik cu a rak thlah cang. Amah bia vialte cu Bawipa na Pathian nih a theih zong a theih ko cang lai i a theihmi bia cu pakpalawng ah a can zong a canter ko lai; cucaah a tang rihmi a tangmi tete hna caah hin thla cam tuah,’ a ti,” tiah an ti.

⁵ Hezekiah Siangpahrang salle hna cu Isaiah sinah an rat tikah

⁶ Isaiah nih annih cu, “Nan bawipa sinah cun, ‘Hi bangin Bawipa nih: Assiria siangpahrang sal hna nih an ka zawmhtaihnak bia na theihmi caah na thinphang hlah.

⁷ Zohhmanh, a chungah thlarau pakhat ka chiah lai i biathangchin a theih lai i amah ram ah a kir lai; cun amah ram chung lila ah vainam in ka thihter lai, a ti,’ tiah va chim u,” tiah a ti.

⁸ Assiria siangpahrang nih Lakhish kha a kaltak i Libnah a tuk tiah ralbawi ngan bik nih a theih tikah, cuka ah cun amah ton awkah khan a va kal.

⁹ Assiria mi hna nih, Izipt ralkapbu, Ethiopia siangpahrang Tirhakah haomi nih, kanmah doh awkah an i thawh cang, ti kha an theih i cucu siangpahrang nih a theih tikah, Judah siangpahrang Hezekiah cu ca a hei pek i,

¹⁰ “Naa bochanmi pathian, ‘Ka kut chungah na tla lai lo,’ an timi cu i lun hlah.

¹¹ Assiria siangpahrang nih hrawh awkah aa khinh cangmi ram hna cu zeitindah a tuah hna ti cu na hngalh ko. Ka luat hnga tiah naa ruat maw?

¹² Ka pupa hna nih Gozan khua, Haran khua, Rezef khua an hrawh hna le Telassar ah a ummi Beth-eden mi an thah hna i an pathian vialte hmanh nih an chanh khawh hna lo kha na theih ko.

¹³ Hamath khua, Arpad khua, Sefarvaim khua, Hena khua le Ivvah khua siangpahrang hna kha tah khuazei ah dah an um cang?” tiah a ti.

¹⁴ Lamkal hna kut cun Hezekiah nih ca kha a hmuh i a rel; cun Hezekiah cu Bawipa inn ah a hung kal i Bawipa hmaiah cun ca cu a samh.

¹⁵ Cun Bawipa hmaiah cun Hezekiah nih thla a cam i, “Maw Bawipa, Israel Pathian, cherubim cungah a ṭhumi, vawlei cung pennak vialte hna Pathian cu nangmah lawnglawng hi na si; nangmah nih van le vawlei kha na ser hna.

¹⁶ Maw Bawipa, na hna chi law thei tuah, na mit cu au law hmu tuah; cun Sennakherib nih a nungmi Pathian zawmhtaih awkah a chimmi bia hi thei tuah hna.

¹⁷ Maw Bawipa, Assiria siangpahrang hna nih miphun hna le an ram cu an hrawh taktak hna i,

¹⁸ an pathian hna cu mei chungah an paih taktak hna; zeitintiah annih cu pathian an si lo, mi kut serchommi men an si, thing le lung an si; cucaah cun annih cu hrawh an si.

¹⁹ Cucaah maw Bawipa, kan Pathian, vawlei cung pennak vialte nih, maw Bawipa, nangmah lawnglawng hi Pathian na si ti kha an hngalh naklai, amah kut chung hin kan khamh ko, tiah kan nawl,” tiah a ti.

²⁰ Cun Amoz fapa Isaiah nih Hezekiah sinah bia a cah i, “Hi bangin, Bawipa, Israel Pathian nih, ‘Assiria siangpahrang Sennakherib kong i na thlacamnak kha ka rak theih,’ a ti.

²¹ Mah hihi amah kong ah Bawipa nih a chimmi bia cu a si: Maw Sennakherib, nangmah cu Zion fanu nih an zawmhtaih i an nihsawh, Jerusalem fanu nih na hnulei in a lu an thinhnawh.

²² Na nihsawh i na serhsat i Na aw na perhhnawh i ruamkai ngaiin na mit na renghhnawhmi Israel mi Thiang kha a si ko!

²³ Na lamkaltu hna in Bawipa na zawmhtaih i ‘Ka rangleng tampi he tlangpar ah ka kai, Lebanon tlang a kenne tiang ka phan; a sidar thing a sang bik hna le a saipres thing a ṭha bik kha ka hau hna; a ram deng bik le a chah bik a tupi chungah ka lut;

²⁴ Tikhor ka cawh hna i ramdang ti ka din hna. Cun Izipt tiva kha ka kepha in ka kaoter,’ na ti.

²⁵ “Hlanpi in ka rak ruah cang, tiah na thei lo maw? Atu cu ka tlinter cang. Ralhruang in kulhmi khualipi hna cu rawkmi thilpon ah ser kan onh i,

²⁶ an chungah a ummi minung hna cu zeihmanh tuah kho loin khuaruahhar le vansang au in an um. Lo chung ramkung le inncung khomi belh bantuk, an ṭhan hlan i nichuahlei thli nih a cartermi hna bantuk an si.

²⁷ Sihmanhsehlaw na ṭhut, na luh, na chuah le ka cung i na thinhun kha ka hngalh ko.

²⁸ Ka cungah na thin a hun le na ruamkainak cu ka hna chungah a ra phan cang i na hnar in ka sio in kan sio lai i na kaa chungah ka chak kan hlomh lai. Cun na ratnak lam in kan kirter ṭhan lai,” a ti.

²⁹ Cun Isaiah nih Siangpahrang Hezekiah cu, hihi nangmah caah hmelchunhnak a si lai, a ti: tukum le kumvoi cu rawl a hlih nan i rinh lai; asinain a kum thumnak ah cun rawl kha nan tuh lai, nan ṭuan lai; mitsur dum kha nan ser hna lai i an theitlai kha nan ei hna lai.

³⁰ Cun Judah innchungkhar chungin a nung in a tangmi hna cu vawlei chungah thuk piin hram a thla i thei a tlaimi bantuk an si lai.

³¹ Jerusalem le Zion Tlang ah a tangmi an um lai. Ralkapbu Bawipa ṭannak nih mah hi cu a tuah lai.

³² “Cucaah Bawipa nih Assiria siangpahrang kong ah hi bangin a ti: Hi khua chungah a lut lai lo, hika ah thal zong a thlah lai lo, phaw he zong a rathnawh lai lo i a hram ah raldohnak chuntlung zong a serhnawh lai lo.

³³ A ratnak lam te khan a kir ṭhan lai i hi khua chungah a lut lai lo.

³⁴ Zeitintiah hi khua cu keimah ruang le ka sal David ruangah khamh awkah ka humhak lai,” tiah Bawipa nih a ti.

³⁵ Cun cu zan ah cun Bawipa vancungmi a kal i Assiria mi riahhmun ah cun sing khat, sang riat le thong nga a va thah hna; cun zingkate i mi nih an thawh tikah, zohhmanh, hi hna cu miruak an rak si dih ko.

³⁶ Cun Assiria siangpahrang Sennakherib cu a kal i inn ah a tlung i Nineveh ah a um.

³⁷ Cun a pathian Nisrok biakinn chungah a biak lioah khan, a fapa Adrammelek le Sharezer nih vainam in an thah i Ararat ram ah an zam. Cun a fapa Esarhaddon cu amah hmun ah khan bawi a hung cang.