2 SIANGPAHRANG 15 - Lai (Hakha) Common Language Bible 2006

Azariah Pennak

¹ Israel siangpahrang Jeroboam a bawi kum kul le kum sarihnak ah Judah siangpahrang Amaziah fapa Azariah cu bawi hram aa thawk.

² Pen hram aa thawh tikah kum hleiruk a si i Jerusalem khua in kum sawm nga le kum hnih a pen hna. A nu min cu Jekoliah a si, Jerusalem khuami a si.

³ A pa Amaziah nih a rak tuahmi vialte ning khan amah nih Bawipa mithmuh i a dikmi thil kha a tuah.

⁴ Sihmanhsehlaw khuahrum bo hna kha cu an hrawk hna lo i mi nih khuahrum bo hna ah khan rai an thawi i zihmui an khangh ṭhiamṭhiam ko.

⁵ Bawipa nih siangpahrang cu a tuk i cucaah cun a thih ni tiangin mithinghmui a si i inn dangte ah a um. Cun siangpahrang fapa Jotham nih khan innchungkhar cu a zohkhenh i rammi kha a uk hna.

⁶ Azariah tuahsernak a tang rihmi hna le a tuahmi vialte hna cu, Judah Siangpahrang hna Chanrelnak Cauk chungah an i ṭial lo mei?

⁷ Cun Azariah cu a pupa hna sinah a it i David khua chungah a pupa hna sinah an vui, cun a fapa Jotham cu amah hmun ah khan a hung bawi.

Zekhariah Pennak

⁸ Judah siangpahrang Azariah a bawi kum sawm thum le kum riatnak ah Jeroboam fapa Zekhariah nih Israel cu Samaria in thla ruk a pen.

⁹ A pupa hna nih an rak tuah bang khan amah nih Pathian mithmuh ah thil ṭhalo kha a tuah. Nebat fapa Jeroboam nih Israel mi a sualternak hna sualnak kha a kaltak lo.

¹⁰ Jabesh fapa Shallum nih a rawi i Ibleam ah a tuk i a thah i amah hmun ah cun bawi ah a cang.

¹¹ Cun Zekhariah tuahsernak a tang rihmi cu, zohhmanh, Israel Siangpahrang hna Chanrelnak Cauk chungah an i ṭial.

¹² (Mah hihi Bawipa nih Jehu sinah biakamnak a pekmi cu a si, “Na fapa hna cu Israel bawi ṭhutdan cungah chan li tiang an ṭhu lai,” tiin. Cu bang cun a si taktak.)

Shallum Pennak

¹³ Jabesh fapa Shallum cu Judah siangpahrang Uzziah a bawi kum sawm thum le kum kua kum ah pennak a hram a thawk i Samaria ah thla khat a bawi.

¹⁴ Khi tikah Gadi fapa Menahem cu Tirzah khua in a hung i Samaria ah a phan i Jabesh fapa Shallum kha Samaria ah a tuk i a thah i amah hmun ah khan bawi ah a cang.

¹⁵ Shallum tuahsernak a taang rihmi hna le rawinak a tuahnak cu, zohhmanh, Israel Siangpahrang hna Chanrelnak Cauk chungah an i ṭial.

¹⁶ Khi caan ah khan Menahem nih Tappuah khua kha a tei i a chung i a ummi vialte le a ram chung Tirzah khua thawk in a ummi vialte kha a hrawh hna; annih nih khua chung luh kha an onh duh lo caah cun a hrawh; cun a chung i a ummi nu fapawi kha a thler dih hna.

Menahem Pennak

¹⁷ Judah siangpahrang Azariah a bawi kum sawm thum le kum kuanak ah Gadi fapa Menahem nih Israel cu pen hram a thawk i Samaria in kum hra a pen.

¹⁸ Cun amah nih Bawipa mithmuh i thil ṭhalo kha a tuah. Nebat fapa Jeroboam nih Israel mi a sualter hnanak sualnak vialte kha a kaltak lo.

¹⁹ Assiria siangpahrang Pul nih an ram cu a hung doh i Menahem nih cun, siangpahrang ṭhawnnak aa tlaihmi kha a feh khawh nakhnga, Pul cu ngun talen thong khat a pek.

²⁰ Menahem nih tangka cu Israel mi kha a kholh hna, Assiria siangpahrang pek awkah cun, an mirum vialte kha ngun shekel sawm nga cio a kholh hna. Cucaah Assiria siangpahrang cu aa let ṭhan i ram chungah khan a um lo.

²¹ Menahem tuahsernak a tang rihmi hna le a tuahmi vialte hna cu, Israel Siangpahrang hna Chanrelnak Cauk chungah an i ṭial lo mei?

²² Cun Menahem cu a pupa hna sinah a it i a fapa Pekahiah cu amah hmun ah khan a hung bawi.

Pekahiah Pennak

²³ Judah siangpahrang Azariah a bawi kum sawm nganak ah Menahem fapa Pekahiah nih Israel cu Samaria khua in pen hram a thawk i kum hnih a uk.

²⁴ Amah nih Bawipa mithmuh i ṭhat lonak kha a tuah; Nebat fapa Jeroboam nih Israel mi a sualter hnanak sualnak vialte kha a kaltak lo.

²⁵ Cun a ralbawi Pekah, Remaliah fapa nih khan Gilead mi sawm nga he amah cu an rawi i Samaria khua chungah khan, siangpahrang inn chung ralhruang chin chungah an thah; i amah hmun ah khan a bawi.

²⁶ Pekahiah tuahsernak a tang rihmi le a tuahmi vialte kha, zohhmanh, Israel Siangpahrang hna Chanrelnak Cauk chungah an i ṭial.

²⁷ Judah siangpahrang Azariah a bawi kum sawm nga le kum hnihnak ah Remaliah fapa Pekah nih Israel cu Samaria in uk hram a thawk i kum kul a pen.

²⁸ Amah nih Bawipa mithmuh i thil ṭhalo kha a tuah; Nebat fapa Jeroboam nih Israel mi a sualter hnanak a sualnak kha a kaltak hna lo.

²⁹ Israel siangpahrang Pekah chan ah khan Assiria siangpahrang Tiglath-pileser kha a ra i Ijon, Abel-besh maakah, Janoah, Kedesh, Hazor, Gilead le Galilee, Naftali ram vialte kha a lak; cun mi hna cu sal ah Assiria ram ah a kalpi hna.

³⁰ Cun Elah fapa Hoshea nih Remaliah fapa Pekah cu a rawi i a tuk i a thah i Uzziah fapa Jotham a bawi kum kulnak ah khan, amah hmun ah cun bawi a cang.

³¹ Pekah tuahsernak a tang rihmi le a tuahmi vialte cu zohhmanh, Israel Siangpahrang hna Chanrelnak Cauk chungah an i ṭial.

Jotham Pennak

³² Israel siangpahrang Remaliah fapa Pekah a bawi kum hnihnak ah, Judah siangpahrang Uzziah fapa Jotham cu pennak hram aa thawk.

³³ Amah cu pennak hram aa thawk tikah kum kul le kum nga a si i Jerusalem in kum hleiruk a bawi. A nu min cu Jerusha a si, Zadok fanu a si.

³⁴ A pa Uzziah nih a tuah bantuk khan, amah nih Bawipa hmaiah a dikmi thil kha a tuah.

³⁵ Asinain khuahrumbo cu an hrawk hna lo i mi nih khan khuahrumbo ah cun rai an thawi i zihmui an khangh ṭhiamṭhiam ko. Amah nih Bawipa inn cunglei kutka kha a ser.

³⁶ Jotham tuahsernak a tang rihmi le a tuahmi vialte cu, Judah Siangpahrang hna Chanrelnak Cauk chungah an i ṭial lo mei?

³⁷ Khi caan ah khan Bawipa nih Siria siangpahrang Rezin le Remaliah fapa Pekah kha Judah ram doh awkah thlah hram a thawk hna.

³⁸ Jotham cu a pupa hna sinah a it i a pu David khua chungah a pupa hna sinah an vui; cun a fapa Ahaz kha amah hmun ah cun bawi a hung cang.