2 KORIN 8 - Lai (Hakha) Common Language Bible 2006

Khrihfa Thawhlawm

¹ U le nau hna, Pathian vel nih zeitindah Masidonia ram Khrihfabu chungah rian a ṭuan ti kha hngalhter kan in duh hna.

² Harnak an innak nih khan fak piin a hneksak hna; asinain an i lawmhnak cu a ngan tuk caah an si a fak ngaingai ko nain thawhlawm ah an siang ngaingai.

³ An pek khawh chungin an pek ti kha hngalhter kan duh hna, an pekmi hi an pek khawh leng hmanh a si.

⁴ Pathian mi Judea ram i a ummi hna bawmh awkah khan anmah lungtho tein tinvo kan phaw ve u tiah an kan nawl.

⁵ An tuahmi cu ka rak i ruah ngam lengpi a si, A hmasa bik ah anmah kha Pathian sinah an i pe, cun Pathian hnatlaknak in kan sin zongah an i pe.

⁶ Cucaah nannih lak i hi rian a thawktu Titas kha hi dawtnak rian hi va lim awkah kan fial.

⁷ Zumhnak ah siseh, biachimnak ah siseh, hngalhnak ah siseh, midang bawmh duhnak ah siseh, kanmah nan kan dawtnak ah siseh, nan rum ngaingai ko. Cucaah cun hi dawtnak rian zongah hin a siangmi nan si awk kha kan in duh hna.

⁸ Phung zeihmanh kaan chiahpiak hna lo. Sihmanhsehlaw midang nih zeitluk in dah bawmhnak lei ah an lung a thawh ti ka langhternak nih hin, nan dawtnak hi a tak maw tak lo ti kha fianter seh ti ka duh.

⁹ Nannih nih kan Bawipa Jesuh Khrih vel kha nan hngalh ko: a rum nain nanmah ruangah sifak ah a cang, cuti a can cu a sifahnak khan nannih kha rumter an duh hna caah a si.

¹⁰ Hi rian kong ah hin ka ruahnak cu hi bantuk hin a si: Nikum i nan rak thawk cangmi kha atu cu nan lim ahcun a ṭha deuh ka ti. A ṭuannak lawngah si loin ṭuan thawk duhnak zongah khan lungthin a ngei hmasa bik cu nanmah kha nan rak si.

¹¹ Cucaah cun rak pehzulh u law rian cu rak lim u. Nan rak thawk lio bantuk khan a lim lei zongah lungthawhnak rak ngei peng u law nan ngeihmi ning cio ah pek rak i zuam u.

¹² Pek duhnak lungthin nan ngeih ahcun nan ngeih lomi thil zoh in si loin nan ngeihmi thil zoh in Pathian nih nan laksawng cu an cohlanpiak hna lai.

^13-14 Midang bawmhnak ah nan cung i thilrit khinh kha kaa timhmi a si lo; asinain atu cu thil tampi nan ngeih lio a si caah a herh baumi cu nan bawmh ve hrimhrim awk hna a si. Cuticun nannih zong nan herh bau ve tikah an ngeih lio a si ahcun an in bawmh ve hna lai. Cun nan phun hnih in nan i ruang kho lai i

¹⁵ Cathiang nih, “Tampi a charmi nih tam tuk an ngei hlei lo, Tlawmte a charmi nih tlawm tuk an ngei lem lo.” a ti bang khan a si lai.

Titas le A Hawile Hna

¹⁶ Nanmah bawmhnak ah kanmah tlukin Titas lung a thawhtertu Pathian cu lawm ko u sih.

¹⁷ Kan fialmi kha a kan cohlan lawng si loin nanmah bawmh kha a lung a thawh tuk caah amah lungtho tein nan sin rat kha aa tim.

¹⁸ Cun amah he hin kan unau pakhat, thawngṭha chim rian a ṭuannak ah khrihfabu kip nih an hmaizah ngaimi kha kan rak thlah.

¹⁹ Cun cu pinah Pathian sunparnak ding ca i kannih nih hi dawtnak rian kan ṭuannak ah hin, kan sin i tlawng ve dingin le bawmh kan in duh hna kha langhtertu dingah, khrihfabu hna nih khan amah cu an thim i an thiah.

²⁰ Hi siang ngaiin pekmi laksawng kan hmannak ah hin ahohmanh nih an kan soi khawh nakhnga lo ralring tein kan ṭuan.

²¹ Kan i tinhmi cu, Bawipa hmuh lawngah si loin, minung mit hmuh zongah a dingmi thil tuah kha a si.

²² Cucaah cun hi hna sinah hin kan unau a dang pakhat zong kan thlah fawn rih. Amah cu voi tampi kan hneksak cangmi a si i bawmh duhnak lungthin a ngei zungzal ti kha kan hmuh.

²³ Titas hi nanmah bawmhnak rian i kan rian ṭuan hawi a si; amah sin i a rami kan unau hna hi khrihfabu aiawh an si i Khrih thangṭhattu an si.

²⁴ An cungah nan dawtnak kha rak langhter u law khrihfabu vialte nih cucu fiang tein an hngalh lai i nanmah kong i kan i porhlawtnak kha ahmaan tiah an hmuh lai.